ಕಾರ್ಕಳ, ಹೆಬ್ರಿಯಲ್ಲಿ ಹೆಚ್ಚಿದ ಅಡಕೆ ಎಳೆಕಾಯಿ ಉದುರುವಿಕೆ

ರಾಂ ಅಜೆಕಾರು

ಕಾರ್ಕಳ, ಹೆಬ್ರಿ ತಾಲೂಕಿನಲ್ಲಿ 28227 ಹೆಕ್ಟೇರ್ ಪ್ರದೇಶದಲ್ಲಿ ಕೃಷಿ ಮತ್ತು ತೋಟಗಾರಿಕಾ ಬೆಳೆಯಿದೆ. 19677 ಹೆಕ್ಟೇರ್ ಪ್ರದೇಶದಲ್ಲಿ ತೋಟಗಾರಿಕಾ ಬೆಳೆಯಿದೆ. ಅದರಲ್ಲಿ ಅಡಕೆ, ತೆಂಗು, ಬಾಳೆಗಳನ್ನು ಬೆಳೆಯುತ್ತಿದ್ದಾರೆ. ಅಡಕೆ ಎಳೆಕಾಯಿ ಉದುರುವಿಕೆಯನ್ನು ಹತೋಟಿಗೆ ತರಲು ಕಾರ್ಕಳ ತೋಟಗಾರಿಕಾ ಇಲಾಖೆಯ ಹಿರಿಯ ನಿರ್ದೇಶಕ ಶ್ರೀನಿವಾಸ್ ಬಿ.ವಿ., ವಲಯ ಕೃಷಿ ಹಾಗೂ ತೋಟಗಾರಿಕೆ ಸಂಶೋಧಾನಾ ಕೇಂದ್ರ, ಬ್ರಹ್ಮಾವರದ ವಿಜ್ಞಾನಿಗಳ ತಂಡ ಭೇಟಿ ನೀಡಿ ಪರಿಶೀಲನೆ ನಡೆಸುತ್ತಿದೆ‌.* ಪೆಂಟಾಟೋಮಿಡ್ ಕೀಟ ಬಾಧೆ:

ಹೆಬ್ರಿ ತಾಲೂಕಿನ ಹಂದಿಕಲ್ಲು ಹಾಗೂ ಕುಚ್ಚೂರು ಗ್ರಾಮದ ಕೆಲವು ಅಡಕೆ ತೋಟಗಳಲ್ಲಿ ತೀವ್ರ ರೀತಿಯಲ್ಲಿ ಸಿಂಗಾರ ಒಣಗುವ ರೋಗ ಕಂಡುಬಂದಿದೆ. ಈ ಕುರಿತಂತೆ ಹೆಚ್ಚಿನ ಪರೀಕ್ಷೆಗೆ ವಿಜ್ಞಾನಿಗಳು ರೋಗ ಬಾಧಿತ ಸಿಂಗಾರದ ಮಾದರಿಗಳನ್ನು ಸಂಗ್ರಹಿಸಿದ್ದಾರೆ. ಸಾಮಾನ್ಯವಾಗಿ ಈ ರೋಗ ಬಾಧೆಯು ಕೊಲೆಟೋಟ್ರೈಕಮ್ ಶಿಲೀಂಧ್ರದಿಂದ ಉಂಟಾಗುತ್ತಿದ್ದು, ಅಡಕೆ ಬೆಳೆಯಲ್ಲಿ ಸರಿಯಾದ ಪೋಷಕಾಂಶಗಳ ನಿರ್ವಹಣೆ, ಬಸಿಗಾಲುವೆ ನೀಡುವಿಕೆ ಹಾಗೂ ಸೂಕ್ತ ರಾಸಾಯನಿಕಗಳ ಸಿಂಪರಣೆಯಿಂದ ಈ ರೋಗವನ್ನು ನಿಯಂತ್ರಿಸಬಹುದಾಗಿದೆ. ಈ ರೋಗದ ಬಾಧೆ ಕಂಡುಬಂದಲ್ಲಿ ಎಳೆಯ ಸಿಂಗಾರಗಳು ಹಳದಿಯಾಗಿ ಹೆಣ್ಣು ಹೂಗಳು ಪೂರ್ಣ ಉದುರಿ ಸಿಂಗಾರ ಪೂರ್ಣ ಒಣಗಿ ಕಪ್ಪಾಗುತ್ತದೆ. ಇಂತಹ ಕಪ್ಪಾದ ಸಿಂಗಾರಗಳನ್ನು ತೆಗೆದು ಹಾಕಿ ಹೊಸದಾಗಿ ಬರುವ ಸಿಂಗಾರಗಳಿಗೆ ಕಾರ್ಬನ್‍ ಡೇಜಮ್ ಮತ್ತು ಮ್ಯಾಂಕೋಜೆನ್ (2.5 ಗ್ರಾಂ/ಲೀ ನೀರಿಗೆ) ಅಥವಾ ಜೈನೆಬ್ (2.5 ಗ್ರಾಂ 1 ಲೀ. ನೀರಿಗೆ) ಬೆರೆಸಿ 20-25 ದಿನಗಳ ಅಂತರದಲ್ಲಿ ಸಿಂಗಾರದ ಹೆಣ್ಣು ಹೂ ಅರಳುವಿಕೆ ಪ್ರಾರಂಭವಾದ ಬೇಸಿಗೆ ಸಮಯದಲ್ಲಿ ಸಿಂಪರಣೆ ಮಾಡಬೇಕು.* ಅಧಿಕಾರಿಗಳ ತಂಡ ಭೇಟಿ:

ಬ್ರಹ್ಮಾವರ ಕೃಷಿ ಮತ್ತು ತೋಟಗಾರಿಕೆ ಸಂಶೋಧನಾ ಕೇಂದ್ರದ ತೋಟಗಾರಿಕೆ ತಜ್ಞರಾದ ಡಾ.ಚೈತನ್ಯ, ಸೂಕ್ಷ್ಮಾಣು ಜೀವಿ ತಜ್ಞ ಡಾ.ಸಂತೋಷ ಗೌಡ ಜಿ.ಬಿ. ಹಾಗೂ ಸಸ್ಯರೋಗ ತಜ್ಞ ಡಾ.ಸಂಜೀವ ಜಕಾತಿಮಠ ಒಳಗೊಂಡ ತಂಡ ಮಾಳ, ಹಿರ್ಗಾನ, ಚಾರ ಹಾಗೂ ಕುಚ್ಚೂರು ಗ್ರಾಮದ ರೈತರ ತೋಟಗಳಲ್ಲಿ ಪರಿಶೀಲನೆ ನಡೆಸಿತು. ತಂಡದೊಂದಿಗೆ ಕಾರ್ಕಳ ತಾಲೂಕಿನ ಹಿರಿಯ ಸಹಾಯಕ ತೋಟಗಾರಿಕೆ ನಿರ್ದೇಶಕರ ಶ್ರೀನಿವಾಸ ಬಿ.ವಿ. ಉಪಸ್ಥಿತರಿದ್ದರು.