ವಿದ್ಯೆ ಜೊತೆಗೆ ಉದ್ಯೋಗವೂ ಲಭ್ಯವಾಗಲಿದೆ: ಮುರಳೀಧರ ಹಾಲಪ್ಪ

ಕನ್ನಡಪ್ರಭ ವಾರ್ತೆ ತುಮಕೂರು

ಹೀರೆಹಳ್ಳಿ ಕೈಗಾರಿಕಾ ಪ್ರದೇಶದಲ್ಲಿರುವ ಜಿಟಿಟಿಸಿ ಕೇಂದ್ರದಲ್ಲಿ ಜಿಟಿಟಿಸಿ ಮತ್ತು ಗ್ರಾಮೀಣಾಭಿವೃದ್ದಿ ಮತ್ತು ಸ್ವಯಂ ಉದ್ಯೋಗ ತರಬೇತಿ ಸಂಸ್ಥೆ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ಹತ್ತನೇ ತರಗತಿ ನಂತರ ಗ್ರಾಮೀಣ ಭಾಗದ ಯುವಕರಿಗೆ ಇರುವ ಅವಕಾಶಗಳು ಎಂಬ ವಿಚಾರ ಕುರಿತು ಮಾಹಿತಿ ಕಾರ್ಯಾಗಾರದಲ್ಲಿ ಮಾತನಾಡಿದರು.

ಜಿಟಿಟಿಸಿಯ ಪ್ರಾಂಶುಪಾಲ ಅಶ್ವಿನ್ ಕುಮಾರ್ ಸೋಮಣ್ಣ ಮಾತನಾಡಿ, ತುಮಕೂರಿನ ಹಿರೇಹಳ್ಳಿ ಕೈಗಾರಿಕಾ ಪ್ರದೇಶದಲ್ಲಿ 2008 ರಲ್ಲಿ ಅರಂಭವಾದ ನಮ್ಮ ಸಂಸ್ಥೆ ಇದುವರೆಗೂ ಸುಮಾರು 2 ಸಾವಿರಕ್ಕೂ ಅಧಿಕ ಜನರಿಗೆ ತರಬೇತಿ ನೀಡಿದೆ. ಯಾರೊಬ್ಬರು ನಿರುದ್ಯೋಗಿಯಾಗಿಲ್ಲ. ಅಲ್ಲದೆ ಇಂದಿನ ಕೈಗಾರಿಕೆಗಳ ಅಗತ್ಯತೆಯನ್ನು ಅರಿತು, ಅದನ್ನು ಪಠ್ಯಕ್ರಮದಲ್ಲಿ ಅಳವಡಿಸಿಕೊಳ್ಳುವುದರಿಂದ ಕೌಶಲ್ಯಭರಿತ ಕೆಲಸಗಾರರನ್ನು ತಯಾರಾಗುತ್ತಾರೆ. ಅಲ್ಲದೆ ನಾಲ್ಕು ವರ್ಷಗಳ ಕೋರ್ಸ್ ನ ಕೊನೆಯ ವರ್ಷ ಕನಿಷ್ಠ 14 ಸಾವಿರ ಮಾಸಿಕ ಶಿಷ್ಯವೇತನದೊಂದಿಗೆ ಸಂಸ್ಥೆಯೊಂದಿಗೆ ಒಪ್ಪಂದ ಮಾಡಿಕೊಂಡಿರುವ ಕೈಗಾರಿಕೆಗಳಲ್ಲಿ ಇನ್‌ಟ್ರನ್‌ಶಿಪ್‌ ಮಾಡುವುದರಿಂದ ಮತ್ತಷ್ಟು ನುರಿತ ಕೌಶಲ್ಯಭರಿತ ಕೆಲಸಗಾರರಾಗುವುದರಲ್ಲಿ ಸಂದೇಹವೇ ಇಲ್ಲ. ದೇಶದಲ್ಲಿ ಸುಮಾರು 400 ಹಾಗೂ ತುಮಕೂರಿನಲ್ಲಿ ಸುಮಾರು 30 ಕಂಪನಿಗಳ ಜೊತೆಗೆ ಒಪ್ಪಂದವನ್ನು ಜಿಟಿಟಿಸಿ ಮಾಡಿಕೊಂಡಿದೆ. ಇದರ ಸದುಪಯೋಗವನ್ನು ಯುವಜನರು ಪಡೆದುಕೊಳ್ಳಬೇಕೆಂದರು.

ಕ್ಷೇತ್ರ ಶಿಕ್ಷಣಾಧಿಕಾರಿ ಡಾ. ಸೂರ್ಯಕಲಾ ಮಾತನಾಡಿ, ಸ್ವಾವಲಂಬನೆಯ ಜೀವನ ನಡೆಸಬೇಕೆಂಬ ಇಚ್ಛೆ ಇರುವ ಯುವಕರಿಗೆ ಜಿಟಿಟಿಸಿ ಮತ್ತು ಸ್ವಯಂ ಉದ್ಯೋಗ ತರಬೇತಿ ಕೇಂದ್ರ ಮೊದಲ ಆಯ್ಕೆಯಾಗಿದೆ. ಇಂದು ದೇಶದ ದೊಡ್ಡ ಕಂಪನಿಗಳು ಎನಿಸಿಕೊಂಡ, ಟಾಟಾ, ಅಂಬಾನಿ, ಅದಾನಿ ಅವರೆಲ್ಲರ ಆರಂಭ ಒಂದು ಚಿಕ್ಕ ಉದ್ಯಮದಿಂದಲೇ ಎಂಬುದನ್ನು ನಾವು ಅರ್ಥ ಮಾಡಿಕೊಳ್ಳಬೇಕು. ಇದು ದೇಶದ ಅರ್ಥಿಕತೆಗೆ ಪೂರಕವಾಗಿದೆ. ಹಾಗಾಗಿ ಶಾಲಾ ಶಿಕ್ಷಣ ಇಲಾಖೆವತಿಯಿಂದ ಆಯೋಜಿಸುವ ಸಭೆ, ಸಮಾರಂಭ, ಸಮಾಲೋಚನಾ ಸಭೆಗಳಲ್ಲಿ ಈ ವಿಚಾರವನ್ನು ಹತ್ತನೇ ತರಗತಿಯ ವಿದ್ಯಾರ್ಥಿಗಳಿಗೆ ತಿಳಿಸಿ, ಇದರ ಪ್ರಯೋಜನ ಪಡೆದುಕೊಳ್ಳುವಂತೆ ಸಲಹೆ ನೀಡಲಾಗುವುದು. ಕೆಲಸ ಸಿಗದೆ ಸಮಾಜ ವಿದ್ರೋಹಿ ಶಕ್ತಿಗಳಾಗಿ ಬದುಕುವುದಕ್ಕಿಂತ ಈ ರೀತಿ ತರಬೇತಿ ಪಡೆದು ಸ್ವಯಂ ಉದ್ಯೋಗ ಮಾಡುತ್ತಾ ಸ್ವಾವಲಂಬನೆಯ ಜೀವನ ನಡೆಸುವುದು ಒಳ್ಳೆಯದೆಂದರು.