ರಡ್ಡಿ ಲಿಂಗಾಯತ ಎಂದೇ ನಮೂದಿಸಿ: ರೇವಣಸಿದ್ದಪ್ಪ

- ಗಿರಿಯಾಪುರ ಗ್ರಾಮದ ಶ್ರೀ ಹೇಮರಡ್ಡಿ ಮಲ್ಲಮ್ಮ ಶತಮಾನೋತ್ಸವ ಭವನದಲ್ಲಿ ಸುದ್ದಿಗೋಷ್ಠಿ

ಸೆ. 22 ರಿಂದ ಅ.7 ರವರೆಗೆ ರಾಜ್ಯ ಸರ್ಕಾರ ನಡೆಸಲಿರುವ ಸಾಮಾಜಿಕ, ಆರ್ಥಿಕ ಮತ್ತು ಶೈಕ್ಷಣಿಕ ಗಣತಿಯಲ್ಲಿ ರಡ್ಡಿ ಲಿಂಗಾಯತ ಜನಾಂಗದವರು ರಡ್ಡಿ ಲಿಂಗಾಯತ, ಉಪ ಪಂಗಡ ರಡ್ಡಿ ಎಂದು ಬರೆಸುವಂತೆ ಬಡಗನಾಡು ಹೇಮರಡ್ಡಿ ಲಿಂಗಾಯತ ಜನಾಂಗ ಸಂಘದ ಕೇಂದ್ರ ಸಮಿತಿ ಅಧ್ಯಕ್ಷ ಎಚ್.ಸಿ.ರೇವಣಸಿದ್ದಪ್ಪ ಮನವಿ ಮಾಡಿದ್ದಾರೆ.ತಾಲೂಕಿನ ಗಿರಿಯಾಪುರ ಗ್ರಾಮದ ಶ್ರೀ ಹೇಮರಡ್ಡಿ ಮಲ್ಲಮ್ಮ ಶತಮಾನೋತ್ಸವ ಭವನದಲ್ಲಿ ಭಾನುವಾರ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದರು. ರಡ್ಡಿ ಲಿಂಗಾಯತ ಜನಾಂಗದ ಸಂಘ 107 ವರ್ಷ ಪೂರೈಸಿ ಶತಮಾನೋತ್ಸವ ಆಚರಿಸಿದೆ. ಅಖಿಲ ಭಾರತ ವೀರಶೈವ ಮಹಾಸಭಾ ಅಥವಾ ಜಾಗತಿಕ ಲಿಂಗಾಯತ ಮಹಾಸಭಾಕ್ಕಿಂತ ಮೊದಲೇ ಇದ್ದ ಸಂಘ ರಾಜ್ಯದ 17 ಜಿಲ್ಲೆಗಳಲ್ಲಿ ಅಸ್ತಿತ್ವ ಹೊಂದುವ ಮೂಲಕ 4 ಲಕ್ಷಕ್ಕಿಂತ ಅಧಿಕ ಜನಸಂಖ್ಯೆ ಹೊಂದಿದೆ. ರಾಜ್ಯ ಸರ್ಕಾರ ಕಳೆದ ಬಾರಿ 1074 ಎಂದು ಕೋಡ್ ನಂಬರ್ ಕೊಟ್ಟಿತ್ತು, ಈಗ ಬದಲಿಸಿ ಎ-1192 ಎಂದು ಘೋಷಿಸಿದೆ. ಗಣತಿಗೆ ಬರುವ ಸಂದರ್ಭದಲ್ಲಿ 60 ಪ್ರಶ್ನೆಗಳ ನಮೂನೆ ಇರಲಿದೆ. ಅದರಂತೆ ನಮ್ಮ ಸಮುದಾಯದವರು ಧರ್ಮ ಕಾಲಂ ಹೊರತು ಪಡಿಸಿ ಜಾತಿ ರಡ್ಡಿ ಲಿಂಗಾಯತ ಎಂದೇ ನಮೂದಿಸಬೇಕು. ಇದೇ 20 ರಂದು ಅಂತಿಮ ನಮೂನೆ ಘೋಷಣೆ ನಂತರ ಧರ್ಮ ಕಾಲಂನಲ್ಲಿ ಏನು ನಮೂದಿಸಬೇಕು ಎಂದು ತಿಳಿಸಲಾಗುವುದು ಎಂದು ಮಾಹಿತಿ ನೀಡಿದರು.

ಪತ್ರಿಕಾಗೋಷ್ಠಿಗೂ ಮುನ್ನ ಬಡಗನಾಡು ಹೇಮರಡ್ಡಿ ರಾಜ್ಯ ಸಂಘದ ಉಪಾಧ್ಯಕ್ಷ ಎಚ್.ಸಿ.ರಾಜಪ್ಪ, ಪ್ರಧಾನ ಕಾರ್ಯದರ್ಶಿ ಈಶ್ವರಪ್ಪ, ಮೈಸೂರು ಘಟಕದ ಜಿ.ಎಂ.ವಾಮದೇವ, ಕೇಂದ್ರ ಸಂಘದ ಉಪಾಧ್ಯಕ್ಷ ಜಿ.ಎಚ್.ಗಿರೀಶ್, ಅಜ್ಜಂಪುರ ಘಟಕದ ಹೇಮಂತ್‌ ಕುಮಾರ್, ಕಡೂರು ಘಟಕದ ಜಿ.ಬಿ.ಆನಂದಮೂರ್ತಿ ಮುಂತಾದವರ ನೇತೃತ್ವದಲ್ಲಿ ಸಭೆ ನಡೆಸಿ ಕೇಂದ್ರ ಸಂಘದ ನಿರ್ಣಯಕ್ಕೆ ಬದ್ಧ ಎನ್ನುವ ಒಕ್ಕೊರಲಿನ ಅಭಿಪ್ರಾಯಕ್ಕೆ ಬರಲಾಯಿತು. ಇದೇ ಸಂದರ್ಭದಲ್ಲಿ ಜಿ.ಬಿ.ಶಿವಶಂಕರ್, ಹೇಮರಡ್ಡಿ, ಚನ್ನಾಪುರ ಸಿದ್ದೇಗೌಡ್ರು, ಜಿ.ಪಿ. ಪ್ರಭುಕುಮಾರ್, ಬಾರ್ಗೇಶಪ್ಪ, ಗ್ರಾ.ಪಂ. ಸದಸ್ಯ ಉಮಾ ಮಹೇಶ್ವರಪ್ಪ, ಜಿ.ಸಿ. ಜಯಸೋಮನಾಥ, ನೀಲಲೋಚನಸ್ವಾಮಿ, ಸಿ.ಜಿ.ಯಶವಂತಕುಮಾರ್ ಮುಂತಾದವರು ಇದ್ದರು.14ಕೆಕೆಡಿಯು1.