ಕಲಬುರಗಿ ಹನಿಟ್ರ್ಯಾಪ್‌ ಪ್ರಕರಣ ಸಿಬಿಐ ತನಿಖೆಗೆ ವಹಿಸಿ

ಕನ್ನಡಪ್ರಭ ವಾರ್ತೆ ಕಲಬುರಗಿ

ಇದೇ ಸೆ.17ರಂದು ಕಲಬುರಗಿಯಲ್ಲಿ ನಡೆಯುತ್ತಿರುವ ಸಂಪುಟ ಸಭೆಯಲ್ಲಿ ಮೊದಲು ಈ ನಿರ್ಣಯ ಕೈಗೊಂಡು ಕಲಬುರಗಿ ನೆಮ್ಮದಿ ಹಾಳಾಗಿರೋದನ್ನ ಸರಿಪಡಿಸಿ ಎಂದು ಬಿಜೆಪಿ ವಕ್ತಾರ ರಾಜಕುಮಾರ್‌ ತೇಲ್ಕೂರ್‌, ಶಾಸಕರಾದ ಬಸವರಾಜ ಮತ್ತಿಮಡು, ಡಾ. ಅವಿನಾಶ ಜಾಧವ್‌, ಜಿಲ್ಲಾಧ್ಯಕ್ಷ ಶಿವರಾಜ ಪಾಟೀಲ್‌ ರದ್ದೇವಾಡಗಿ, ನಗರಾಧ್ಯಕ್ಷ ಚಂದು ಪಾಟೀಲ್‌ ಆಗ್ರಹಿಸಿದ್ದಾರೆ.

ರಾಜ್ಯ ಪೊಲೀಸ್‌ ತನಿಖೆ ಮೇಲೆ, ಅದರಲ್ಲೂ ಕಲಬುರಗಿ ಪೊಲೀಸರ ತನಿಖೆ ಮೇಲೆ ನಂಬಿಕೆಯೇ ಇಲ್ಲ. ಇವರು ಆಡಳಿತದಲ್ಲಿರೋರ ಮಾತು ಕೇಳಿ ತನಿಖೆ ಮಾಡಿ ಮುಗಿಸಿಬಿಡುತ್ತಾರೆ. ಮತ್ತೆ ದಂಧೆಕೋರರು ಚಿಗುರುತ್ತಾರೆಂದು ದೂರಿದ ತೇಲ್ಕೂರ್‌ ಹನಿಟ್ರ್ಯಾಪ್‌ ದಂಧೆಗೆ ಕಾಯಂ ಬ್ರೆಕ್‌ ಬೀಳಲು ಸಿಬಿಐ ತನಿಖೆಯೇ ನಡೆಯಬೇಕೆಂದರು.

ಹಣಮಂತ ಯಳಸಂಗಿ ಮತ್ತವರ ಗ್ಯಾಂಗ್‌ ಬಂಧನವಾಗಿದೆ. ಆದರೆ ಈ ಬಂಧನ ತೋರಿಕೆಗೆ ಆಗಬಾರದು. ಆರೋಪಗಳ ಸಂಪೂರ್ಣ ತನಿಖೆಯಾಗಬೇಕು. ಆರೋಪಿಗಳು ಕಂಬಿ ಎಣಿಸುವಂತಾಗಬೇಕು. ಪ್ರಕರಣ ಮುಚ್ಚಿಹೋಗುವ ಭೀತಿ ಕಾಡುತ್ತಿದೆ. ಆರೋಪಿಗಳು ಪ್ರಭಾವಿಗಳಾಗಿದ್ದಾರೆ. ಇದನ್ನೆಲ್ಲ ಮೀರಿದ ತನಿಖೆ ನಡೆಯಬೇಕೆಂದರೆ ಸಿಬಿಐ ಒಂದೇ ಪರಿಹಾರವೆಂದರು.

ಇದಲ್ಲದೆ ಇನ್ನೂ 30ರಿಂದ 50 ಯುವತಿರು, ಗೃಹಿಣಿಯರು ಈ ಗ್ಯಾಂಗ್‌ನಿಂದ ಸಂತ್ರಸ್ತರಾಗಿರುವ ಶಂಕೆ ಇದೆ. ಸಂತ್ರಸ್ತೆಯರೇ ಬಾಯಿ ಬಿಟ್ಟಿದ್ದಾರೆ. ಪೊಲೀಸರ ತನಿಖೆ ಮೇಲೆ ನಂಬಿಕೆಯೇ ಇಲ್ಲವಾಗಿದೆ. ಮುಚ್ಚಿಹಾಕುವ ಕೆಲಸವಾಗಬಾರದು ಎಂದರೆ ಪ್ರಕರಣದ ಸಿಬಿಐ ತನಿಖೆಯಾಗಲಿ, ಈ ದುಷ್ಟರ ಕೂಟದ ಹೆಡಮುರಿ ಕಟ್ಟಲು ಸರಕಾರ ತನ್ನ ಬದ್ಧತೆ ತೋರಿಸಲಿ ಎಂದರು.