ಗಮನ ಸೆಳೆದ ಕನ್ನಡ ತೇರು, ಭುವನೇಶ್ವರಿ ಮೆರವಣಿಗೆ

ಕಂಪ್ಲಿ: ತಾಲೂಕು ದ್ವಿತೀಯ ಕನ್ನಡ ಸಾಹಿತ್ಯ ಸಮ್ಮೇಳನದ ಅಂಗವಾಗಿ ಶುಕ್ರವಾರ ಪಟ್ಟಣದಲ್ಲಿ ಹಮ್ಮಿಕೊಂಡಿದ್ದ ತಾಯಿ ಭುವನೇಶ್ವರಿ ಭಾವಚಿತ್ರ ಹಾಗೂ ಸಮ್ಮೇಳನಾಧ್ಯಕ್ಷರ ಭವ್ಯ ಮೆರವಣಿಗೆ ಸಾರ್ವಜನಿಕರ ಗಮನ ಸೆಳೆಯಿತು.

ಪಟ್ಟಣದ ಕೋಟೆ ಪಂಪಾಪತಿ ದೇಗುಲದ ಬಳಿಯಿಂದ ಆರಂಭಗೊಂಡ ಮೆರವಣಿಗೆಗೆ ಮುಖಂಡ ಅರವಿ ಬಸವನಗೌಡ ಸೇರಿದಂತೆ ಗಣ್ಯರು ಚಾಲನೆ ನೀಡಿದರು. ವಿಶೇಷವಾಗಿ ಅಲಂಕರಿಸಲಾಗಿದ್ದ ಕನ್ನಡ ತೇರು, ತಾಯಿ ಭುವನೇಶ್ವರಿ ಭಾವಚಿತ್ರ ಗಮನ ಸೆಳೆಯಿತು.

ಮೆರವಣಿಗೆಯಲ್ಲಿ ಪಾಲ್ಗೊಂಡಿದ್ದ ವಿವಿಧ ಜನಪದ ಕಲಾತಂಡ ತಮ್ಮ ಕಲಾ ಪ್ರದರ್ಶನದ ಮೂಲಕ ಕನ್ನಡದ ಸಾಂಸ್ಕೃತಿಕ ಶ್ರೀಮಂತಿಕೆ ಅನಾವರಣಗೊಳಿಸಿದವು. ಗರಡಿಗೊಂಬೆ, ಡೊಳ್ಳು ಕುಣಿತ, ತಾಷಾ ರಂಡೋಲ್, ಮಂಗಳವಾದ್ಯ ಹಾಗೂ ಮಂಗಳಮುಖಿಯರ ನೃತ್ಯ ಪ್ರದರ್ಶನ ಮೆರವಣಿಗೆಗೆ ಮತ್ತಷ್ಟು ಮೆರುಗು ನೀಡಿದವು. ಅಲೆಮಾರಿ ಸಮುದಾಯದ ಹಕ್ಕಿಪಿಕ್ಕಿ ಮಹಿಳಾ ತಂಡದ ಕಲಾ ಪ್ರದರ್ಶನವೂ ವಿಶೇಷ ಗಮನ ಸೆಳೆಯಿತು.

ದಾರ್ಶನಿಕರು, ಮಹನೀಯರು ಹಾಗೂ ಸ್ವಾತಂತ್ರ್ಯ ಹೋರಾಟಗಾರರ ವೇಷಭೂಷಣ ಧರಿಸಿದ್ದ ವಿದ್ಯಾರ್ಥಿಗಳು ನಾಡಿನ ಇತಿಹಾಸ ಮತ್ತು ಮಹನೀಯರ ಆದರ್ಶ ಸ್ಮರಿಸುವಂತೆ ಮಾಡಿದರು. ಸುಮಾರು 100 ಅಡಿ ಉದ್ದದ ಕನ್ನಡ ಧ್ವಜ ಮೆರವಣಿಗೆಯಲ್ಲಿ ರಾರಾಜಿಸುವ ಮೂಲಕ ಕನ್ನಡಾಭಿಮಾನ ಸಾರಿತು.