ಕೋಡ್ಲಿ ವೃತ್ತ ನವೀಕರಣ ನನೆಗುದಿಗೆ: ಸಂಚಾರಕ್ಕೆ ತೊಂದರೆ

ಕನ್ನಡಪ್ರಭ ವಾರ್ತೆ ಚಿಂಚೋಳಿ

ಚಿಂಚೋಳಿ ಮೀಸಲು ಮತಕ್ಷೇತ್ರದ ಅತ್ಯಂತ ದೊಡ್ಡ ಗ್ರಾಮವಾಗಿರುವ ಕೋಡ್ಲಿ ಗ್ರಾಮದ ಮುಖ್ಯರಸ್ತೆಯಲ್ಲಿರುವ ವೃತ್ತವನ್ನು ಸೌಂದರೀಕರಣಗೊಳಿಸುವುದಕ್ಕಾಗಿ ಲೋಕೋಪಯೋಗಿ ಇಲಾಖೆಯಿಂದ ೨೦೨೨-೨೩ನೇ ಸಾಲಿನ ಯೋಜನೆ ಅಡಿಯಲ್ಲಿ ₹೨.೫೦ಕೋಟಿ ಮಂಜೂರಿಯಾಗಿದೆ.

ಕೋಡ್ಲಿ ವೃತ್ತದಲ್ಲಿ ನಗರ ಪ್ರದೇಶಗಳಿಗೆ ಹೋಗುವ ಪ್ರಯಾಣಿಕರಿಗೆ ಹಣ್ಣಿನ ಅಂಗಡಿ, ಚಹಾ ಅಂಗಡಿ, ಹೂವು ಅಂಗಡಿಗಳ ಮಾರಾಟಗಾರರಿಗೆ ತೊಂದರೆ ಆಗುತ್ತಿದೆ. ಜನರು ನಿಲ್ಲಲು ಸಹಾ ಸ್ಥಳ ಇಲ್ಲ ಸುತ್ತಲು ಗುಂಡಿ ತೋಡಿದ್ದರಿಂದ ಶಾಲೆ ಕಾಲೇಜಿಗೆ ಮತ್ತು ಆಸ್ಪತ್ರೆಗೆ ಬರುವ ಜನರು ತೊಂದರೆ ಪಡಬೇಕಾಗಿದೆ ಎಂದು ಕೋಡ್ಲಿ ಗ್ರಾಮದ ರೇವಣಸಿದ್ದಪ್ಪ ಕಟ್ಟಿಮನಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕೋಡ್ಲಿ-ಕಾಳಗಿ,ಮಹಾಗಾಂವ,ಚಿಂಚೋಳಿ ರಸ್ತೆ ಸಂಚಾರಕ್ಕೆ ಇದೇ ಏಕೈಕ ಮಾರ್ಗ ಆಗಿರುವುದರಿಂದ ಪ್ರಯಾಣಿಕರು,ವಾಹನಗಳ ಸವಾರರು ತೊಂದರೆ ಪಡಬೇಕಾಗಿದೆ.ಸಂಬಂಧಪಟ್ಟ ಅಧಿಕಾರಿಗಳು ಕೂಡಲೇ ಗಮನಹರಿಸಿ ಕಾಮಗಾರಿ ಪೂರ್ಣಗೊಳಿಸಬೇಕೆಂದು ಕೋಡ್ಲಿ ಗ್ರಾಮದ ಗ್ರಾಪಂ ಸದಸ್ಯ ಮಲ್ಲಿಕಾರ್ಜುನ ಚಿಂತಕೋಟಿ ದೂರಿದ್ದಾರೆ.