ಕೊಲ್ಲೂರು ಮೂಕಾಂಬಿಕೆ ಸನ್ನಿಧಿಯಲ್ಲಿ ಮತ್ತೆ ಆನೆ ಘೀಂಕಾರ?

ಶ್ರೀಕಾಂತ್ ಹೆಮ್ಮಾಡಿ

ಕೊಲ್ಲೂರು ಕ್ಷೇತ್ರದ ಆನೆ ಎಂದರೆ ಮೊದಲು ನೆನಪಾಗುವುದು ‘ಇಂದಿರಾ’. ದಾನಿಯೊಬ್ಬರ ಕಾಣಿಕೆಯಾಗಿದ್ದ ಈ ಹೆಣ್ಣಾನೆ ಸುಮಾರು ಆರು ದಶಕಗಳ ಕಾಲ ಶ್ರೀ ಮೂಕಾಂಬಿಕಾ ದೇವಿಯ ಸೇವೆಯಲ್ಲಿ ನಿರಂತರವಾಗಿ ಪಾಲ್ಗೊಂಡಿತ್ತು. ಉತ್ಸವಗಳು, ಮೆರವಣಿಗೆಗಳು, ವಿಶೇಷ ಪೂಜೆಗಳು ಹಾಗೂ ದೈನಂದಿನ ಧಾರ್ಮಿಕ ಕಾರ್ಯಕ್ರಮಗಳ ಅವಿಭಾಜ್ಯ ಅಂಗವಾಗಿದ್ದ ಇಂದಿರಾ ಸಾವಿರಾರು ಭಕ್ತರ ಭಾವನಾತ್ಮಕ ನೆನಪಿನ ಭಾಗವಾಗಿತ್ತು. 2019ರ ಆಗಸ್ಟ್‌ನಲ್ಲಿ 62ನೇ ವಯಸ್ಸಿನಲ್ಲಿ ಅನಾರೋಗ್ಯದಿಂದ ಇಂದಿರಾ ಮೃತಪಟ್ಟ ಬಳಿಕ ದೇವಸ್ಥಾನ ಆನೆಯಿಲ್ಲದೆ ಉಳಿದಿದೆ. ಬಳಿಕ ಹಲವು ದಾನಿಗಳು, ಭಕ್ತರು ಹಾಗೂ ದೇವಸ್ಥಾನದ ಆಡಳಿತ ಮಂಡಳಿ ಹೊಸ ಆನೆ ತರಲು ಪ್ರಯತ್ನಿಸಿದರೂ, ಯಾವುದೇ ಪ್ರಯತ್ನ ಯಶಸ್ವಿಯಾಗಿರಲಿಲ್ಲ.ಈಗ ಮೊದಲ ಬಾರಿಗೆ ಕರ್ನಾಟಕ ಸರ್ಕಾರವೇ ಅಧಿಕೃತವಾಗಿ ಮುಂದಾಗಿದೆ. ಕಾನೂನು ದಾರಿ ಸುಗಮವಲ್ಲ:

ಕೊಲ್ಲೂರು ಶ್ರೀ ಮೂಕಾಂಬಿಕಾ ಕ್ಷೇತ್ರಕ್ಕೆ ಕೇರಳದೊಂದಿಗೆ ಅನನ್ಯವಾದ ಧಾರ್ಮಿಕ ನಂಟಿದೆ. ಆದಿ ಶಂಕರಾಚಾರ್ಯರು ಪ್ರತಿಷ್ಠಾಪಿಸಿದ ಶ್ರೀ ಮೂಕಾಂಬಿಕಾ ದೇವಿಯನ್ನು ಕೇರಳದ ಲಕ್ಷಾಂತರ ಕುಟುಂಬಗಳು ತಮ್ಮ ಕುಲದೇವತೆ ಹಾಗೂ ಮನೆದೇವತೆಯಾಗಿ ಆರಾಧಿಸುತ್ತವೆ. ಕೊಲ್ಲೂರಿಗೆ ಹೊರರಾಜ್ಯಗಳಿಂದ ಆಗಮಿಸುವ ಭಕ್ತರಲ್ಲಿ ಅತಿ ಹೆಚ್ಚಿನ ಸಂಖ್ಯೆಯವರು ಕೇರಳದವರೇ. ತ್ರಿಶೂರ್ ಪೂರಂ, ಗುರುವಾಯೂರು, ಅರಟ್ಟುಪುಳ ಪೂರಂ, ಚಿನ್ನಕ್ಕತ್ತೂರು ಪೂರಂ, ನೆನ್ಮಾರ ವೆಲ್ಲಂಗಿ ವೇಲಾ ಸೇರಿದಂತೆ ಅನೇಕ ಉತ್ಸವಗಳಲ್ಲಿ ಆನೆಗಳು ಧಾರ್ಮಿಕ ಸಂಪ್ರದಾಯದ ಅವಿಭಾಜ್ಯ ಭಾಗವಾಗಿವೆ. ಕೇರಳದ ವಿವಿಧ ಆನೆ ಶಿಬಿರಗಳಲ್ಲೂ ಸಾಕಷ್ಟು ಸಾಕಾನೆಗಳಿವೆ. ಈ ಹಿನ್ನೆಲೆ ಕರ್ನಾಟಕದ ಮನವಿಗೆ ಧಾರ್ಮಿಕ ಹಾಗೂ ಮಾನವೀಯ ನೆಲೆಯಲ್ಲಿ ಸಕಾರಾತ್ಮಕ ಸ್ಪಂದನೆ ದೊರೆಯುವ ಸಾಧ್ಯತೆ ಇದೆ ಎಂಬ ಆಶಾವಾದವೂ ವ್ಯಕ್ತವಾಗುತ್ತಿದೆ. ಇತ್ತೀಚೆಗೆ ಕೊಲ್ಲೂರಿಗೆ ಭೇಟಿ ನೀಡಿದ್ದ ಕೇರಳ ಮುಖ್ಯಮಂತ್ರಿ ವಿ.ಡಿ. ಸತೀಶನ್ ಅವರ ಭೇಟಿಯ ಸಂದರ್ಭದಲ್ಲೂ ಕ್ಷೇತ್ರದಲ್ಲಿ ಆನೆ ಇಲ್ಲದಿರುವ ವಿಚಾರ ಪ್ರಸ್ತಾಪವಾಗಿತ್ತು.

ಕೊಲ್ಲೂರು ಕ್ಷೇತ್ರಕ್ಕೆ ಬರುವ ಹೆಚ್ಚಿನ ಭಕ್ತರಿಗೆ ಅದರಲ್ಲೂ ವಿಶೇಷವಾಗಿ ಮಕ್ಕಳಿಗೆ ಅನೇಕ ವರ್ಷಗಳಿಂದ ಇಲ್ಲಿನ ಆನೆಯೊಂದಿಗೆ ಭಾವನಾತ್ಮಕವಾದ ಸಂಬಂಧ ಇತ್ತು.

ಕ್ಷೇತ್ರದ ಧಾರ್ಮಿಕ ಹಾಗೂ ಇತರ ಕಾರಣಗಳಿಗಾಗಿ ಆನೆಯ ಅವಶ್ಯಕತೆ ಇದೆ ಎನ್ನುವುದನ್ನು ಕೇರಳದ ಮುಖ್ಯಮಂತ್ರಿ ಗಮನಕ್ಕೂ ತರಲಾಗಿದೆ. ಈ ಕುರಿತು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ ಅವರು ಪತ್ರ ಬರೆದಿರುವುದು ಸ್ವಾಗತಾರ್ಹ.