ಕೊಣ್ಣೂರ ಪುರಸಭೆ; ವಿನೋದ ಅಧ್ಯಕ್ಷ, ಯಲ್ಲವ್ವ ಉಪಾಧ್ಯಕ್ಷೆ

ಕನ್ನಡಪ್ರಭ ವಾರ್ತೆ ಗೋಕಾಕ

ಬುಧವಾರ ಜರುಗಿದ ಪುರಸಭೆಯ ಅಧ್ಯಕ್ಷ-ಉಪಾಧ್ಯಕ್ಷರ ಚುನಾವಣೆಯಲ್ಲಿ ತಲಾ ಒಂದೊಂದು ನಾಮಪತ್ರಗಳು ಸಲ್ಲಿಕೆಯಾಗಿದ್ದರಿಂದ ಎರಡು ಸ್ಥಾನಗಳು ಅವಿರೋಧವಾಗಿ ಆಯ್ಕೆಯಾಗಿವೆ ಎಂದು ಚುನಾವಣಾಧಿಕಾರಿಯಾಗಿದ್ದ ತಹಸೀಲ್ದಾರ್ ಡಾ.ಮೊಹನ ಬಸ್ಮೆ ಘೋಷಿಸಿದರು.

ಚುನಾವಣೆ ಬಳಿಕ ನೂತನ ಅಧ್ಯಕ್ಷ ವಿನೋದ ಗೋವಿಂದ ಕರನಿಂಗ ಮಾತನಾಡಿ, ಶಾಸಕ ರಮೇಶ ಜಾರಕಿಹೊಳಿ ಅವರ ಮಾರ್ಗದರ್ಶನದಲ್ಲಿ ಹಾಗೂ ಪುರಸಭೆಯ ಸದಸ್ಯರು ಹಾಗೂ ಹಿರಿಯರನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಕೊಣ್ಣೂರ, ನಾಯಿಕವಾಡಿ, ಮರಡಿಮಠ, ಮಾನಿಕವಾಡಿ ಮತ್ತು ಗೋಕಾಕ ಫಾಲ್ಸ್‌ ಅಭಿವೃದ್ಧಿಗೆ ಪಕ್ಷಾತೀತವಾಗಿ ಶ್ರಮಿಸುತ್ತೇನೆಂದು ತಿಳಿಸಿದರು.

ಈ ಸಂದರ್ಭದಲ್ಲಿ ಮುಖ್ಯಾಧಿಕಾರಿ ಶಿವಾನಂದ ಹಿರೆಮಠ, ಪುರಸಭೆಯ ಸದಸ್ಯರು, ಶಾಸಕರ ಆಪ್ತ ಸಹಾಯಕ ಸುರೇಶ ಸನದಿ, ಗ್ರಾಮಲೆಕ್ಕಾಧಿಕಾರಿ ಟಿ.ಎಲ್. ಪಮ್ಮಾರ, ಗ್ರಾಮೀಣ ಪೊಲೀಸ್‌ ಠಾಣೆಯ ಎಎಸ್‌ಐ ಟಿ.ಎಸ್. ದಳವಾಯಿ, ಸಿಬ್ಬಂದಿ ಹಣಮಂತ ಗೌಡಿ, ನಾಗರಾಜ ದುರದುಂಡಿ ಮತ್ತು ಮುಖಂಡರಾದ ಈರಪ್ಪ ಮಲ್ಲಪ್ಪ ಕಮತ, ಮಡಿವಾಳಪ್ಪ ಶಿಗಿಹಳ್ಳಿ, ಶ್ರೀಶೈಲ ಕಮತ್ ಇದ್ದರು.