ಶಾಸಕರ ನಿರ್ಧಾರಕ್ಕೆ ನಿವೇಶನದಾರರು ಬದ್ಧ

ರಾಮನಗರ ನಗರಾಭಿವೃದ್ಧಿ ಪ್ರಾಧಿಕಾರದ ವ್ಯಾಪ್ತಿಯ ಬಡಾವಣೆಗಳ ಅಭಿವೃದ್ಧಿಗೆ ಪ್ರತಿ ಚದರ ಅಡಿಗೆ 200 ರು. ನಿಗದಿ ಪಡಿಸಿರುವ ಸಂಬಂಧ ಸೇರಿದ್ದ ನಿವೇಶನರಾದರರಲ್ಲಿ ಮೂರ್ನಾಲ್ಕು ಮಂದಿಯನ್ನು ಹೊರತುಪಡಿಸಿದರೆ ಉಳಿದೆಲ್ಲರು ಶಾಸಕರು ಮತ್ತು ಪ್ರಾಧಿಕಾರದ ಅಧಿಕಾರಿಗಳ ಕ್ರಮಕ್ಕೆ ಬೆಂಬಲ ಸೂಚಿಸಿದರು.

ಈ ಹಿಂದೆ ಇದ್ದ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳ ಬೇಜವಾಬ್ದಾರಿ ಹಾಗೂ ಭ್ರಷ್ಟಾಚಾರದಿಂದ 2010ರಲ್ಲಿ ಬಡಾವಣೆ ನಿರ್ಮಿಸಿ ನಿವೇಶನ ಹಂಚಿದ್ದರೂ ಅಲ್ಲಿ ಮನೆ ನಿರ್ಮಿಸಿಕೊಂಡು ವಾಸ ಮಾಡಲು ಅಗತ್ಯ ಮೂಲಸೌಕರ್ಯ ಕಲ್ಪಿಸಲು ಸಾಧ್ಯವಾಗಿರಲಿಲ್ಲ ಎಂದು ಇಕ್ಬಾಲ್ ಹುಸೇನ್ ವಿಷಾದಿಸಿದರು.

ಮೂರು ಬಡಾವಣೆಗಳಿಗೆ ಮೂಲ ದಾಖಲೆಗಳೇ ಇರಲಿಲ್ಲ. ಕೇವಲ 2 ರು. ಹಾಗೂ 5 ರು. ಬಾಂಡ್ ಪೇಪರ್‌ಗಳಲ್ಲಿ ನೋಂದಣಿಯಾಗದ ಅಗ್ರಿಮೆಂಟ್ ಮಾಡಿಕೊಂಡು, ಯಾವುದೇ ಆಧಾರಗಳಿಲ್ಲದೆ ಜಮೀನು ಮಾಲೀಕರಿಗೆ ಕೋಟ್ಯಂತರ ಹಣ ಪಾವತಿ ಮಾಡಲಾಗಿತ್ತು. ಡಿಮ್ಯಾಂಡ್ ರಿಜಿಸ್ಟರ್‌ನಲ್ಲಿ ಫಲಾನುಭವಿಗಳ ಹೆಸರುಗಳೇ ಇಲ್ಲ, ಕೆಲ ಹೆಸರುಗಳನ್ನು ಬದಲಾವಣೆ ಮಾಡಲಾಗಿತ್ತು. ನಿವೇಶನ ಕೋರಿ ಅರ್ಜಿ ಸಲ್ಲಿಸಿದವರ ಹೆಸರುಗಳೇ ನಾಪತ್ತೆಯಾಗಿದ್ದವು. ಹೀಗೆ ಹಲವಾರು ನ್ಯೂನತೆಗಳು ಇದ್ದವು. ಬಡಾವಣೆಗೆ ಭೂಮಿ ನೀಡಿದ್ದವರು ನಿಧನರಾಗಿದ್ದರೂ ಅವರ ವಾರಸುದಾರರನ್ನು ಕರೆತಂದು, ಸಹಿ ಪಡೆದು, ಕಾನೂನು ಬದ್ಧಗೊಳಿಸಿ ನಿಮಗೆ ನಿವೇಶನಗಳನ್ನು ಕ್ರಯ ಮಾಡಿಕೊಡುವ ಹಂತಕ್ಕೆ ತಂದಿದ್ದೇವೆ ಎಂದು ತಿಳಿಸಿದರು.

ಪ್ರತಿ ನಿವೇಶನದಾರರಿಂದ 200 ರು.ಗಳಂತೆ ಅಭಿವೃದ್ಧಿ ಶುಲ್ಕ ಸಂಗ್ರಹಿಸಿದರೆ ಒಟ್ಟು 40 ಕೋಟಿ ಆಗಲಿದೆ. ಇನ್ನುಳಿದ ಸುಮಾರು 40-50 ಕೋಟಿ ಹಣವನ್ನು ಸರ್ಕಾರದ ಅನುದಾನ ಪಡೆದು ಬಡಾವಣೆಗಳಿಗೆ ಮೂಲ ಸೌಕರ್ಯ ಒದಗಿಸಲು ನೀಲನಕ್ಷೆ ಸಿದ್ಧಪಡಿಸಲಾಗಿದೆ ಎಂದು ಭರವಸೆ ನೀಡಿದರು.