ಸಹಕಾರ ಚಳವಳಿ ಮತ್ತಷ್ಟು ಪ್ರಬಲವಾಗಲಿ: ವಿಷ್ಣು ಭಟ್ಟ

ಶಿರಸಿ: ಉತ್ತಮ ಸಹಕಾರ ಸಂಘಗಳನ್ನು ನೋಡಿ ಸಂತೋಷಪಡುವುದ ಜತೆ ನ್ಯೂನತೆಯನ್ನು ಹೊಂದಿರುವ ಸಹಕಾರಿ ಸಂಘಗಳ ಕುರಿತು ಚಿಂತನೆ ನಡೆಸಿ, ಅವರನ್ನು ಮೇಲೆತ್ತುವ ಕೆಲಸ ಆಗಬೇಕಿದೆ ಎಂದು ಜಿಲ್ಲಾ ಸಹಕಾರಿ ಯುನಿಯನ್ ಅಧ್ಯಕ್ಷ ವಿಷ್ಣು ಭಟ್ಟ ಅಳ್ಳಂಕಿ ತಿಳಿಸಿದರು.ಶುಕ್ರವಾರ ನಗರದ ಟಿಎಂಎಸ್ ಸಭಾಭವನದಲ್ಲಿ ಶಿರಸಿ ತಾಲೂಕು ವ್ಯವಸಾಯ ಹುಟ್ಟುವಳಿಗಳ ಸಹಕಾರ ಮಾರಾಟ ಸಂಘದ ವತಿಯಿಂದ ೭೧ನೇ ಸಹಕಾರ ಸಪ್ತಾಹದ ಅಂಗವಾಗಿ ಸಂಘದ ಸದಸ್ಯರಿಗೆ, ಖರೀದಿದಾರರಿಗೆ ಹಾಗೂ ವಿಶೇಷ ಸಾಧಕರಿಗೆ ಸನ್ಮಾನ ಕಾರ್ಯಕ್ರಮ ಉದ್ಘಾಟಿಸಿ, ಮಾತನಾಡಿದರು.ಸಹಕಾರ ಚಳವಳಿಯನ್ನು ಪ್ರಬಲಗೊಳಿಸುವುದು ಮುಖ್ಯ. ಸಹಕಾರ ಚಳವಳಿಗೆ ೧೨೦ ವರ್ಷ ಸಂದಿದೆ. ಸಹಕಾರ ಸಂಘಗಳು ಜನತೆಗೆ ಆರ್ಥಿಕ ಶಕ್ತಿ ಗಟ್ಟಿಗೊಳಿಸುವುದರ ಜತೆ ದೇಶದ ಅಭಿವೃದ್ಧಿಗೆ ಮಹತ್ತರ ಪಾತ್ರ ನಿರ್ವಹಿಸಿದೆ. ಹಲವಾರು ಅಗ್ರಗಣ್ಯ ನಾಯಕರು ತನು, ಮನ ಧನ ತ್ಯಾಗ ಮಾಡಿ ಸಹಕಾರಿ ಚಳವಳಿ ಬೆಳೆಸಿದ್ದಾರೆ. ಸಹಕಾರ ಸಪ್ತಾಹದ ಅಂಗವಾಗಿ ಜಿಲ್ಲಾ ಸಹಕಾರಿ ಯುನಿಯನ್‌ನಿಂದಲೂ ಜಿಲ್ಲೆಯ ತಾಲೂಕುಗಳಲ್ಲಿ ಸಹಕಾರಿ ಸಪ್ತಾಹ ಕಾರ್ಯಕ್ರಮ ಆಯೋಜಿಸಲಾಗುತ್ತಿದೆ ಎಂದರು.ಅಧ್ಯಕ್ಷತೆ ವಹಿಸಿದ್ದ ಟಿಎಂಎಸ್ ಅಧ್ಯಕ್ಷ ಜಿ.ಟಿ. ಹೆಗಡೆ ತಟ್ಟೀಸರ ಪ್ರಾಸ್ತಾವಿಕವಾಗಿ ಮಾತನಾಡಿ, ಸಹಕಾರ ಆಂದೋಲನ ನಡೆದು ೧ ಶತಮಾನಗಳು ಕಳೆದಿದೆ. ದೇಶಾದ್ಯಂತ ಸಹಕಾರ ಸಂಸ್ಥೆಗಳು ಕೆಲಸ ಮಾಡುತ್ತಿವೆ. ಸಹಕಾರಿಗೆ ಜಗತ್ತಿನಾದ್ಯಂತ ಸಂಘಟನೆಗಳಿದ್ದು, ಸಹಕಾರ ತತ್ವದಲ್ಲಿ ಹೇಳಿರುವಂತೆ ಸಹಕಾರಿ ಯುನಿಯನ್ ನಡೆದುಕೊಳ್ಳಬೇಕು ಎಂಬ ಹಕ್ಕುಗಳ ಜತೆ ಕರ್ತವ್ಯವನ್ನು ನೀಡಿದೆ ಎಂದರು.