ಸೈನ್ಯಕ್ಕೆ ಸೇರುವವರ ಸಂಖ್ಯೆ ಹೆಚ್ಚಾಗಲಿ: ಮಾಜಿ ಸಚಿವ ಅಮರೇಗೌಡ ಪಾಟೀಲ ಬಯ್ಯಾಪುರ

ಕುಷ್ಟಗಿ:

ಪಟ್ಟಣದ ಶ್ರೀಬುತ್ತಿ ಬಸವೇಶ್ವರ ದೇವಸ್ಥಾನದ ಸಭಾಂಗಣದಲ್ಲಿ ಬಸವ ಸಮಿತಿ, ಜಾಗತಿಕ ಲಿಂಗಾಯತ ಮಹಾಸಭಾ, ಅಖಿಲ ಭಾರತ ವೀರಶೈವ ಲಿಂಗಾಯತ ಮಹಾಸಭಾ ಹಾಗೂ ಮುಸ್ಲಿಂ ಯೂತ್‌ ಕಮಿಟಿ ವತಿಯಿಂದ ಸಾಮರಸ್ಯ ಸಂಗಮ ಕಾರ್ಯಕ್ರಮದಲ್ಲಿ ಮಾಜಿ ಸೈನಿಕರ ಸನ್ಮಾನ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಸೈನ್ಯಕ್ಕೆ ಸೇರುವಂತಾಗಬೇಕು ಎಂದರು.

ಸಾಂಸ್ಕೃತಿಕ ನಾಯಕ ಬಸವಣ್ಣ ಹಾಗೂ ಸಂವಿಧಾನ ಶಿಲ್ಪಿ ಡಾ. ಬಿಆರ್. ಅಂಬೇಡ್ಕರ್‌ ಸೇರಿದಂತೆ ಅನೇಕ ಮಹನಿಯರು ಸಮಸಮಾಜದ ನಿರ್ಮಾಣಕ್ಕಾಗಿ ಶ್ರಮಿಸಿದ್ದಾರೆ. ಅವರ ತತ್ವಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡು ಜೀವನ ಸಾಗಿಸಬೇಕು ಎಂದರು.

ಇಳಕಲ್ಲಿನ ಮೌಲ್ವಿ ಮುಕ್ತಿ ಫಾರೂಖ್‌ ಮಾತನಾಡಿ, ದೇಶದ ಭದ್ರತಾ ದೃಷ್ಟಿಯಿಂದ ಗಡಿಯಲ್ಲಿ ಹಗಲಿರುಳೆನ್ನದೆ ಗಡಿ ಕಾಯುವ ಯೋಧರೆ ನಿಜವಾದ ದೇವರು. ಯೋಧರಿಗೆ ಆತ್ಮಸ್ಥೈರ್ಯ ತುಂಬುವ ಕಾರ್ಯಕ್ರಮ ಮಾಡುತ್ತಿರುವುದು ಶ್ಲಾಘನೀಯ. ಭಾರತೀಯ ಸೈನ್ಯ ಪ್ರಬಲವಾಗಿದೆ. ಭಯೋತ್ಪಾದನಾ ಪಿಡುಗು ತಡೆಯಬೇಕಾದರೆ ಎಲ್ಲರೂ ಒಂದಾಗಬೇಕು. ಭಾವೈಕ್ಯತೆ ಬೆಸೆಯಬೇಕು, ಭಯೋತ್ಪಾದನೆ ಬಿತ್ತುವ ಮನಸ್ಥಿತಿಯನ್ನು ವಿರೋಧಿಸಿ ಭಾರತದ ಐಕ್ಯತೆ ಸಾರೋಣ ಎಂದು ಕರೆ ನೀಡಿದರು.

ಮಾಜಿ ಶಾಸಕ ಕೆ. ಶರಣಪ್ಪ, ಜಾಗತಿಕ ಲಿಂಗಾಯತ ಮಹಾಸಭಾ ಅಧ್ಯಕ್ಷ ಟಿ. ಬಸವರಾಜ ಸೇರಿದಂತೆ ಅನೇಕರು ಮಾತನಾಡಿದರು. ನಂತರ ಸೈನಿಕರನ್ನು ಸನ್ಮಾನಿಸಲಾಯಿತು. ಈ ವೇಳೆ ಶಿವಸಂಗಪ್ಪ ಬಿಜಕಲ್, ಮಹಾಂತೇಶ ಕಲ್ಲಬಾವಿ, ವಸಂತ ಮೇಲಿನಮನಿ, ಭೀಮನಗೌಡ ಜಾಲಿಹಾಳ, ಹನುಮಂತಪ್ಪ ವೆಂಕಟಾಪುರ, ಮುರ್ತುಜಾಸಾಬ್‌ ಪೇಂಟರ್, ಸಂಗಪ್ಪ ನಂದಾಪುರ, ಹಂಪನಗೌಡ ಪಾಟೀಲ, ತಿಪ್ಪಣ್ಣ, ಜೀವನಸಾಬ್‌ ಬಿನ್ನಾಳ, ಶಿವಬಸಪ್ಪ ಹಡಪದ ಹಾಗೂ ಮುಸ್ಲಿಂ ಯೂತ್‌ ಕಮಿಟಿ ಸದಸ್ಯರು ಇದ್ದರು.