ಮನೆಗೆ ತೆರಳಲು ದಾರಿ ಬಿಡಿಸಿಕೊಡಿ: ಹಾಸನ ಡಿಸಿಗೆ ಆಲೂರಿನ ನಾಕಲಗೋಡು ಗ್ರಾಮದ ನಿವಾಸಿ ಎನ್.ಆರ್ ಆನಂದ್ ಮೊರೆ

ಡಿಸಿ ಸತ್ಯಭಾಮಗೆ ಮನವಿ । ಆಲೂರಿನ ನಾಕಲಗೋಡು ಗ್ರಾಮದ ನಿವಾಸಿ ಎನ್.ಆರ್ ಆನಂದ್ ಅಳಲು । ಮನೆಗೆ ಅಡ್ಡಲಾಗಿ ಬೇಲಿ ನಿರ್ಮಾಣ

ಸ್ಥಳೀಯ ಜಮೀನಿನವರು ಅಡ್ಡಲಾಗಿ ಬೇಲಿ ನಿರ್ಮಾಣ ಮಾಡಿದ್ದು ಕಳೆದ ಮೂವತ್ತು ವರ್ಷಗಳಿಂದ ವಾಸವಿದ್ದ ಮನೆಗೆ ಹೋಗಲು ಯಾವುದೇ ರಸ್ತೆ ಇಲ್ಲದೆ ಸಾಕಷ್ಟು ತೊಂದರೆ ಅನುಭವಿಸುತ್ತಿದ್ದೇವೆ ಎಂದು ಆಲೂರು ತಾಲೂಕಿನ ನಾಕಲಗೋಡು ಗ್ರಾಮದ ನಿವಾಸಿ ಎನ್.ಆರ್.ಆನಂದ್ ಅಳಲು ತೋಡಿಕೊಂಡರು.

‘ಕಸಬಾ ಹೋಬಳಿ ಕಣತೂರು ಗ್ರಾಪಂ ನಿಂದ ಪತ್ನಿ ಪ್ರಭಾವತಿ ಹೆಸರಿಗೆ ಇ-ಸ್ವತ್ತು ಪಡೆದಿದ್ದೇವೆ. ೧೯೯೪ ರಿಂದ ಮನೆಗೆ ವಿದ್ಯುತ್ ಸಂಪರ್ಕ ಕೂಡ ಪಡೆದಿದ್ದೇವೆ. ಅಂದಿನಿಂದಲೂ ಸರ್ವೆ ನಂ. ೫೫ ರಲ್ಲಿ ನಾವು ಸಂಚಾರ ನಡೆಸುತ್ತಿದ್ದೆವು. ಹೀಗಿರುವಾಗ ಗ್ರಾಮದ ತಿಮ್ಮೇಗೌಡ ಮತ್ತು ಸುಂದರರಾಜು ಎಂಬುವವರು ಸ.ನಂ.೫೫ ನಲ್ಲಿ ಸರ್ಕಾರದಿಂದ ೧-೨೦ಗುಂಟೆ ಜಾಗವನ್ನು ಮಂಜೂರು ಮಾಡಿಸಿಕೊಂಡಿದ್ದಾರೆ. ನಮಗೆ ತಿಳಿಯದ ರೀತಿಯಲ್ಲಿ ಮಂಜೂರಾತಿ ಮಾಡಿಸಿ ಸರ್ವೆಯರ್ ರವರಿಂದ ಹದ್ದುಬಸ್ತು ಮಾಡಿಸಿಕೊಂಡು ನಮಗೀಗ ಸಂಚಾರ ನಡೆಸಲು ರಸ್ತೆ ಇಲ್ಲದಂತೆ ಮಾಡಿದ್ದಾರೆ’ ಎಂದು ದೂರಿದರು.

ಈ ವೇಳೆ ಮಾತನಾಡಿದ ಆನಂದ್ ಪತ್ನಿ ಪ್ರಭಾವತಿ, ‘ರಸ್ತೆ ಸಮಸ್ಯೆ ಬಗೆಹರಿಸುವಂತೆ ಕೆಲ ಸಂಘಟನೆಗಾರರು ಅಧಿಕಾರಿಗಳಿಗೆ ಒತ್ತಡ ಹಾಕಿದ ನಂತರ ತಹಸೀಲ್ದಾರ್ ಹಾಗೂ ಪೊಲೀಸ್ ಅಧಿಕಾರಿಗಳು ಸ್ಥಳ ಪರಿಶೀಲನೆಗೆ ಜೂ.೨೪ ರಂದು ಆಗಮಿಸಿದ್ದರು. ವಾಸ್ತವ ತಿಳಿದು ಮಂಜೂರುದಾರರಿಗೆ ಮನೆಗೆ ಹೋಗಲು ರಸ್ತೆ ಬಿಡಬೇಕು ಎಂದು ಅಧಿಕಾರಿಗಳು ಸ್ಥಳೀಯ ಜಮೀನುದಾರರಿಗೆ ಹೇಳಿದಾಗ ಅವರು ಒಪ್ಪಲಿಲ್ಲ. ಇದರಿಂದ ಹತಾಶರಾಗಿದ್ದ ಆನಂದ್ ಆತ್ಮಹತ್ಯೆಗೆ ಯತ್ನಿಸಿದ್ದರು. ಈ ವೇಳೆ ಸ್ಥಳದಲ್ಲೆ ಇದ್ದ ಪೋಲಿಸ್ ಅಧಿಕಾರಿ ಒಬ್ಬರ ಸಮಯಪ್ರಜ್ಞೆಯಿಂದ ಬಾಗಿಲು ಒಡೆದು ಕಾಪಾಡಿದರು’ ಎಂದರು.