ಮಂಗಳೂರು: 10ರಂದು ಇಸ್ಕಾನ್ ೨೦ನೇ ವಾರ್ಷಿಕ ಶ್ರೀ ಕೃಷ್ಣ - ಬಲರಾಮ ರಥಯಾತ್ರೆ

ಕನ್ನಡಪ್ರಭ ವಾರ್ತೆ ಮಂಗಳೂರುಅಂತಾರಾಷ್ಟ್ರೀಯ ಕೃಷ್ಣ ಪ್ರಜ್ಞಾ ಸಂಘ ಸಂಸ್ಥೆ ಕೊಡಿಯಾಲ್ ಬೈಲ್ ಮಂಗಳೂರು ಶಾಖೆಯ ಆಶ್ರಯದಲ್ಲಿ ೨೦ನೇ ವಾರ್ಷಿಕ ಶ್ರೀ ಶ್ರೀ ಕೃಷ್ಣ ಬಲರಾಮ ರಥಯಾತ್ರಾ ಉತ್ಸವ ಫೆ.10ರಂದು ನಗರದ ಪಿ.ವಿ.ಎಸ್. ಮಂದಿರದಲ್ಲಿ ಸಂಜೆ ೪.೩೦ ರಿಂದ ನಡೆಯಲಿದೆ ಎಂದು ಇಸ್ಕಾನ್ ಅಧ್ಯಕ್ಷ ಗುಣಕರ ರಾಮದಾಸ ಬುಧವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು. ಈ ಉತ್ಸವ ಶ್ರೀ ಕೃಷ್ಣ ಬಲರಾಮ ಸಹೋದರರು ದ್ವಾಪರಯುಗದಲ್ಲಿ ವೃಂದಾವನದ ಮಥುರಾ ನಗರದಲ್ಲಿ ರಥದಲ್ಲಿ ಆಸೀನರಾಗಿ ತಮ್ಮೂರಿನ ಸರ್ವ ಭಕ್ತಾಭಿಮಾನಿಗಳಿಗೆ ದರ್ಶನ ನೀಡಿದ ಸನ್ನಿವೇಶವನ್ನು ಪುನರ್ ರಚಿಸಲಾಗುವುದು. ಶ್ರೀ ಕೃಷ್ಣ ಭಗವನಂತನನ್ನು ನಮ್ಮ ಹೃದಯದೆಡೆಗೆ ಎಳೆಯುವ ಶೃಂಗಾರಪೂರ್ಣ ಅಲಂಕಾರದ ರಥಯಾತ್ರೆ ನಡೆಯಲಿದೆ ಎಂದರು. ಮಂಗಳೂರು ದಕ್ಷಿಣ ಶಾಸಕ ವೇದವ್ಯಾಸ ಕಾಮತ್, ಮೂಡುಬಿದಿರೆ ಆಳ್ವಾಸ್ ಶಿಕ್ಷಣ ಸಂಸ್ಥೆ ಅಧ್ಯಕ್ಷ ಡಾ. ಮೋಹನ್ ಆಳ್ವ, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಆನಂದ್, ಮಂಗಳೂರು ನಗರಪಾಲಿಕೆ ಸದಸ್ಯೆ ಜಯಶ್ರೀ ಕುಡ್ವ, ಎ.ಕೆ. ಬನ್ಸಲ್ ಸಂಸ್ಥೆ ನಿರ್ದೇಶಕ ಅಭಿನವ್‌ ಬನ್ಸಲ್‌ ಅತಿಥಿಗಳಾಗಿ ಪಾಲ್ಗೊಳಲಿರುವರು ಎಂದರು.

ರಥೋತ್ಸವ ವೇಳೆ 5 ಸಾವಿರ ಮಂದಿಗೆ ಉಚಿತ ಪ್ರಸಾದ ಹಂಚಲಾಗುವುದು. ರಥೋತ್ಸವ ಬಳಿಕ ಪಿವಿಎಸ್‌ ಕಲಾಕುಂಜದಲ್ಲಿ ಅನ್ನಸಂತರ್ಪಣೆ ನಡೆಯಲಿದೆ. ರಾಜ್ಯದಿಂದ ನೂರಾರು ಭಕ್ತಾದಿಗಳು, ಅನುಯಾಯಿಗಳು ಸಕ್ರಿಯರಾಗಿ ಭಾಗವಹಿಸಲಿದ್ದಾರೆ ಎಂದರು.ಈ ಸಂದರ್ಭ ಉತ್ಸವದ ಆಮಂತ್ರಣ ಪತ್ರಿಕೆಯನ್ನು ಬಿಡುಗಡೆಗೊಳಿಸಲಾಯಿತು.