ಮಾವು ಬೆಲೆ ತೀವ್ರ ಕುಸಿತ: ತತ್ತರಿಸಿದ ರೈತ

ಕನ್ನಡಪ್ರಭ ವಾರ್ತೆ ಕೋಲಾರ

ಕಳೆದ ೫-೬ ವರ್ಷದಿಂದಲೂ ಮಾವಿಗೆ ಮಾರುಕಟ್ಟೆಯಲ್ಲಿ ಉತ್ತಮ ಧಾರಣೆ ಸಿಗದೆ ರೈತರು ಕಂಗಾಲಾಗಿದ್ದಾರೆ. ಕೋಲಾರ ಜಿಲ್ಲೆಯಲ್ಲಿ ೫೭ ಸಾವಿರಕ್ಕೂ ಹೆಚ್ಚಿನ ಭೂ ಪ್ರದೇಶದಲ್ಲಿ ಮಾವು ಬೆಳೆಯುತ್ತಿದ್ದಾರೆ. ವಿಶೇಷವಾಗಿ ಶ್ರೀನಿವಾಸಪುರ ತಾಲೂಕು ಒಂದರಲ್ಲಿಯೇ ೪೫ ಸಾವಿರಕ್ಕೂ ಹೆಚ್ಚು ಹೆಕ್ಟೇರ್ ಪ್ರದೇಶದಲ್ಲಿ ಮಾವು ಬೆಳೆಯುತ್ತಿದ್ದಾರೆ.

ರೈತರ ನಿರಂತರ ಹೋರಾಟಗಳ ಪರಿಣಾಮ ಕಳೆದ ೨ ವರ್ಷದಿಂದ ಮಾವಿಗೆ ಬೆಂಬಲ ಬೆಲೆ ನೀಡುತ್ತಿದ್ದಾರೆ, ಅದು ಸರ್ಕಾರ ಕೊನೆ ಗಳಿಗೆಯಲ್ಲಿ ಬೆಂಬಲ ಬೆಲೆ ಘೋಷಣೆ ಮಾಡುತ್ತದೆ, ಹಲವಾರು ತೋಟಗಳಲ್ಲಿ ಮಾವು ಕೊಳೆತು ಹೋಗಿರುತ್ತದೆ ಮತ್ತು ಕೆಲವರು ಕಡಿಮೆ ಬೆಲೆಗೆ ಮಾರಾಟ ಮಾಡಿದ್ದಾರೆ, ಆಗ ಬೆಂಬಲ ಬೆಲೆ ನಿಜವಾದ ಮಾವು ಬೆಳೆಗಾರರಿಗೆ ಹೊರೆತುಪಡಿಸಿ ಹೋರಾಟಗಾರರು ಎನಿಸಿಕೊಂಡವರಿಗೆ ಮತ್ತು ಅಧಿಕಾರದಲ್ಲಿರುವ ಬಲಾಢ್ಯರು ಮಾತ್ರ ಬೆಂಬಲ ಬೆಲೆಯ ಅನುಕೂಲ ಪಡೆದುಕೊಳ್ಳುತ್ತಿದ್ದಾರೆ.

ಸತತ ಮಾವು ಬೆಲೆ ಕುಸಿತ, ಸರ್ಕಾರ ಮತ್ತು ಜನಪ್ರತಿನಿಧಿಗಳ ನಿರ್ಲಕ್ಷ್ಯ, ಔಷಧಿಗಳ ದುಬಾರಿ, ಕೀಟನಾಶಕಗಳ ದುಬಾರಿಯಿಂದ ಬೇಸತ್ತಿರುವ ರೈತ ತೋತಾಪುರಿ ಸೇರಿದಂತೆ ಇತರೆ ಮಾವಿನ ಮರಗಳನ್ನು ತೆರವು ಮಾಡಿ ಪರ್ಯಾಯ ಬೆಳೆಗಳನ್ನು ಬೆಳೆಯಲು ಶ್ರೀನಿವಾಸಪುರದ ರೈತರು ಮುಂದಾಗಿದ್ದಾರೆ.

ಕಳೆದ ೧೦ ವರ್ಷದಿಂದ ಮಾವು ಫಸಲಿನಿಂದ ನಷ್ಟ ಅನುಭವಿಸಿ ಸಾಕಾಗಿ ಹೋಗಿತ್ತು, ಪ್ರತಿ ವರ್ಷವೂ ಬೆಲೆ ಕುಸಿತದಿಂದ ರೋಸಿ ಹೋಗಿತ್ತು, ಆದ ಕಾರಣದಿಂದ ನಾಲ್ಕು ಎಕರೆ ಮಾವಿನ ಮರಗಳನ್ನು ಕಟಾವು ಮಾಡಲಾಗುತ್ತಿದೆ, ಒಣ ಬೇಸಾಯಕ್ಕೆ ರಾಗಿ ಬೆಳೆದುಕೊಂಡರೂ ಪ್ರತಿ ಕ್ವಿಂಟಲ್ ರಾಗಿಗೆ ೫೨೦೦ ರು. ಕೊಟ್ಟು ಸರ್ಕಾರ ಖರೀದಿಸುತ್ತದೆ, ಒಂದು ಎಕರೆಗೆ ಕನಿಷ್ಠ ೧೫-೨೦ ಕ್ವಿಂಟಲ್ ರಾಗಿ ಬೆಳೆಯಬಹುದು, ಒಂದು ಎಕರೆಗೆ ಸುಮಾರು ಒಂದು ಲಕ್ಷ ರು. ಬರುತ್ತದೆ. ಈ ಕಾರಣದಿಂದ ಮಾವಿನ ಸಹವಾಸ ಸಾಕಾಗಿ ಕಳೆದ ಒಂದು ವಾರದಿಂದ ಮರಗಳನ್ನು ಕಡಿಯಲಾಗುತ್ತಿದೆ.- ಶಿವಾಜಿ, ಚಲ್ದಿಗಾನಹಳ್ಳಿ, ಶ್ರೀನಿವಾಸಪುರ ತಾಲೂಕು