ಶಾಸಕ ಜನಾರ್ದನ ರೆಡ್ಡಿ ವಿರುದ್ಧ ಸಂಸದ ತುಕಾರಾಂ ಕೆಂಡಾಮಂಡಲ

ಸಂಡೂರು: ಸಂಡೂರು- ಹೊಸಪೇಟೆ, ತೋರಣಗಲ್- ಕೂಡ್ಲಿಗಿ, ಕುಮಾರಸ್ವಾಮಿ ದೇವಸ್ಥಾನದ ರಸ್ತೆಗಳನ್ನು ತಮ್ಮ ಅಧಿಕಾರ ಅವಧಿಯಲ್ಲಿ ನಿರ್ಮಿಸಲಾಗಿದೆ ಎಂದು ಬಿಜೆಪಿ ನಾಯಕರು ಸಾರ್ವಜನಿಕರಿಗೆ ಸುಳ್ಳು ಮಾಹಿತಿ ನೀಡಿ, ಜನರನ್ನು ದಾರಿ ತಪ್ಪಿಸುವ ಕೆಲಸ ಮಾಡುತ್ತಿದ್ದಾರೆ ಎಂದು ಸಂಸದ ಈ.ತುಕಾರಾಂ ಆಕ್ರೋಶ ವ್ಯಕ್ತಪಡಿಸಿದರು.

ಜನಾರ್ದನ ರೆಡ್ಡಿ, ಕರುಣಾಕರ ರೆಡ್ಡಿ ಮಾಲೀಕತ್ವದ ರಾಘವೇಂದ್ರ ಕನ್‌ಸ್ಟ್ರಕ್ಷನ್ ಆ್ಯಂಡ್ ಕಂಪನಿ ಹೆಸರಿನಲ್ಲಿ ಸಂಡೂರು ಹೊಸಪೇಟೆ 28 ಕಿ.ಮೀ. ರಸ್ತೆ ನಿರ್ಮಾಣ ಗುತ್ತಿಗೆ ಕೆಲಸವನ್ನು 2001ರ ಮಾರ್ಚ್ 9ರಂದು ಜರುಗಿದ ಟೆಂಡರ್ ಪ್ರಕ್ರಿಯೆಯಲ್ಲಿ ₹2.38 ಕೋಟಿಗೆ ಪಡೆಯುತ್ತಾರೆ. ಅಂದಿನ ಮಂತ್ರಿ ಎಂ.ವೈ. ಘೋರ್ಪಡೆ ಅವರಿಂದ ಭೂಮಿಪೂಜೆ ಮಾಡಿಸುತ್ತಾರೆ. ಕಾಮಗಾರಿ ಕೆಲಸ ಪೂರ್ಣಗೊಳಿಸಲಿಲ್ಲ. ಗುತ್ತಿಗೆಯನ್ನು ಪಿಡಬ್ಲುಡಿ ಕಾರ್ಯಪಾಲಕ ಅಭಿಯಂತರರ ಕಚೇರಿಯಿಂದ ಗುತ್ತಿಗೆ ರದ್ದುಪಡಿಸಿದಾಗಲೇ ಬ್ಲಾಕ್ ಲಿಸ್ಟ್‌ಗೆ ಸಂಸ್ಥೆ ಸೇರಿಸಿ ಇಎಂಡಿ ₹2.30 ಲಕ್ಷ ಭದ್ರತಾ ಠೇವಣಿ ₹1.92 ಲಕ್ಷ ಸರ್ಕಾರ ಮುಟ್ಟುಗೋಲು ಹಾಕಿಕೊಂಡು ಶೇ.7.50ರಷ್ಟು ದಂಡ ವಿಧಿಸಿದೆ.

ಸಂಡೂರು -ಹೊಸಪೇಟೆ ರಸ್ತೆ ನಿರ್ಮಾಣಕ್ಕೆ ಹಣಕಾಸಿನ ಕೊರತೆ ಎಂದು ಹೇಳಲಾಯಿತು. 2010ರಲ್ಲಿ ಎಂಎಂಎಲ್‌ ಕಂಪನಿಯಿಂದ ₹50 ಕೋಟಿ ಇಕ್ವಿಟಿ ಷೇರ್‌ನ್ನು ಕೆಆರ್‌ಡಿಸಿಎಲ್‌ಗೆ ಡೆಪಾಸಿಟ್ ಮಾಡಿಸಿ ಹುಡ್ಕೊದಿಂದ ₹135 ಕೋಟಿ ಬಿಒಟಿ ಅಡಿ ಸಾಲ ಪಡೆದು ಟೋಲ್ ಮೂಲಕ ಸಾಲ ತೀರಿಸುವ ಕೆಲಸ ಮಾಡಿ ರಸ್ತೆ ನಿರ್ಮಿಸಲಾಗಿದೆ. 2010ರ ಅ.31ರಂದು ಜಿಲ್ಲಾಧಿಕಾರಿ ಕಲ್ಯಾಣಿ ಎಚ್.ಟಿ. ಅವರು ಜೆಎಸ್‌ಡಬ್ಲು, ವಿ.ಎಸ್. ಲಾಡ್, ಬಿಕೆಜಿ, ವೆಸ್ಕೊ, ಎಚ್.ಆರ್.ಜಿ. ಸ್ಮಯೋರ್, ಬಿಎಂಎಂ, ಗಣಿ ಸಂಸ್ಥೆಗಳಿಗೆ ಐತಿಹಾಸಿಕ ಕುಮಾರಸ್ವಾಮಿ ರಸ್ತೆಯನ್ನು ನಿರ್ಮಾಣ ಮಾಡುವಂತೆ ಪತ್ರ ಬರೆದಿದ್ದರು. 2010ರ ಡಿ.20ರಂದು ₹23.49 ಕೋಟಿಗೆ ಪಿಡಬ್ಲ್ಯೂಡಿ ಇಲಾಖೆ ಎಸ್ಟಿಮೇಟ್ ಮಾಡುತ್ತದೆ. ಅದರಂತೆ ಗಣಿ ಕಂಪನಿಗಳು ಶೇ. 10 ಹಣ ₹3.35 ಕೋಟಿ ಅಡ್ವಾನ್ಸ್‌ನ್ನು ಬಳ್ಳಾರಿ ಮೂಲದ ಆರ್‌ಕೆ ಇನ್‌ಫ್ರಾ ಎಂಜಿನಿಯರಿಂಗ್ ಕಂಪನಿಗೆ ಕೊಟ್ಟ ಹಣವನ್ನು ತೆಗೆದುಕೊಂಡು ಹೋದರು. ಆದರೆ, ಕೆಲಸ ಮಾಡಲಿಲ್ಲ.

ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರಾದ ಜಿ. ಏಕಾಂಬ್ರಪ್ಪ, ಸಿ. ಸತೀಶಕುಮಾರ್, ವಾಡಾ ಮಾಜಿ ಅಧ್ಯಕ್ಷ ರೋಷನ್‌ಜಮೀರ್ ಇತರರಿದ್ದರು.