ವರ್ಷವೂ ಬರಕ್ಕೆ ತುತ್ತಾಗುವ ನೇತ್ರಾವತಿ ಈ ಬಾರಿ ಬತ್ತಿಲ್ಲ!

ವಿಶೇಷ ವರದಿ

ಎಲ್ಲೆಡೆ ನೀರ ನೆಲೆಗಳೆಲ್ಲಾ ಬತ್ತಿ ಹೋಗಿ ಬರದ ಕಾವು ಕಾಡುತ್ತಿದ್ದರೆ, ಕಳೆದ ವರ್ಷ ಬತ್ತಿ ಹೋಗಿದ್ದ ನೇತ್ರಾವತಿ ನದಿಯ ಒಡಲು ಈ ಬೇಸಿಗೆಯಲ್ಲಿ ಜಲರಾಶಿಯಿಂದ ತುಂಬಿದೆ. ನೇತ್ರಾವತಿ ನದಿಗೆ ಬಿಳಿಯೂರು ಎಂಬಲ್ಲಿ ನಿರ್ಮಿಸಲಾದ ಅಣೆಕಟ್ಟಿನಿಂದಾಗಿ ನಾಲ್ಕು ಮೀಟರ್ ಎತ್ತರದಲ್ಲಿ ಜಲ ರಾಶಿ ಸಂಗ್ರಹಗೊಂಡು ಉಪ್ಪಿನಂಗಡಿ ಪ್ರದೇಶದುದ್ದಕ್ಕೂ ಹಿನ್ನೀರು ಸಂಗ್ರಹಗೊಳ್ಳುವಂತಾಗಿ ನೀರಿನ ಕೊರತೆ ನೀಗಿಸಿದಂತಾಗಿದೆ.

ನದಿ ಬತ್ತಿ ಹೋಗಲು ಎತ್ತಿನಹೊಳೆ ಯೋಜನೆಯೇ ಕಾರಣವೆಂದು ಆಪಾದಿಸಿ ಎತ್ತಿನಹೊಳೆ ಯೋಜನೆಯ ಜನಕರಾದ ರಾಜಕೀಯ ನಾಯಕರ ಮುಖವಾಡ ಧರಿಸಿ ಕ್ರಿಕೆಟ್ ಆಟ ಆಡಲಾಗಿತ್ತು.

೨೦೨೩ ರ ಡಿಸೆಂಬರ್ ಆರಂಭದಿಂದಲೇ ಅಣೆಕಟ್ಟನ್ನು ಕಾರ್ಯಾಚರಣೆಗೆ ಒಳಪಡಿಸಲಾಗಿದ್ದು, ಒಟ್ಟು ೪ ಮೀಟರ್ ಎತ್ತರದ ಗೇಟು ಅಳವಡಿಸಲಾಗಿದೆ. ಮೊದಲ ಎರಡುವರೆ ತಿಂಗಳಲ್ಲಿ ನೀರಿನ ಹರಿವು ಇದ್ದು ಗೇಟು ದಾಟಿ ನೀರು ಹೊರಗೆ ಹರಿಯುತ್ತಿತ್ತು. ಪ್ರಸಕ್ತ ನಾಲ್ಕು ಮೀಟರ್ ಗೇಟಿನ ಮಿತಿಯಲ್ಲಿ ನೀರಿನ ಸಂಗ್ರಹವಿದೆ. ಹೊರ ಹರಿವು ನಿಂತಿದೆ.

ನೇತ್ರಾವತಿ ನದಿಯಲ್ಲಿ ೬ ಕಿ ಮೀ ವ್ಯಾಪ್ತಿಯುದ್ದಕ್ಕೂ ಅಣೆಕಟ್ಟಿನ ಹಿನ್ನೀರು ಸಂಗ್ರಹಗೊಂಡ ಪರಿಣಾಮ ನದಿಯ ಈ ಭಾಗದ ಸುತ್ತಮುತ್ತಲಿನ ಪರಿಸರದಾದ್ಯಂತ ಅಂತರ್ಜಲ ವೃದ್ಧಿಸಲ್ಪಟ್ಟಿದೆ. ಏಳೆಂಟು ಕಿ.ಮೀ. ದೂರದ ಕೃಷಿ ಪ್ರದೇಶದಲ್ಲಿ ನೀರಿಲ್ಲದೆ ಸೊರಗಿದ್ದ ಕೊಳವೆ ಬಾವಿಗಳಲ್ಲಿ , ಕೆರೆ ಬಾವಿಗಳಲ್ಲಿ ಈ ಬಾರಿ ನೀರು ಯಥೇಚ್ಛ ಸಂಗ್ರಹಣೆಗೊಂಡು ಕೃಷಿಕರ ಮನದಲ್ಲಿ ಸಂತಸ ಮೂಡಿದೆ. ಎಲ್ಲೆಡೆ ನೀರಿಲ್ಲದೆ ಬವಣೆ ಪಡುವ ವ್ಯಥೆಯ ಕಥೆಗಳೇ ಕೇಳಿ ಬರುತ್ತಿರುವ ಸಂಧರ್ಭದಲ್ಲಿ ಪುತ್ತೂರು, ಬಂಟ್ವಾಳ, ಬೆಳ್ತಂಗಡಿ ಈ ಮೂರು ತಾಲೂಕಿನ ಹಲವು ಗ್ರಾಮಗಳು ಜಲರಾಶಿಯ ಪ್ರಯೋಜನ ಪಡೆಯುತ್ತಿವೆ.

ಈ ಹಿಂದಿನ ಯಾವುದೇ ವರ್ಷಗಳಲ್ಲಿ ಈ ಪ್ರದೇಶದಲ್ಲಿ ಕಾಣಿಸಿಕೊಳ್ಳದ ಕಾಡಾನೆಗಳು ಈ ಬಾರಿ ನೇತ್ರಾವತಿ ನದಿಯ ಅಂಚಿನಲ್ಲಿ ನಿರಂತರ ಕಾಣಿಸತೊಡಗಿವೆ. ಸುಡುವ ಬಿಸಿಲ ಝಳದ ನಡುವೆ ದಾಹ ತೀರಿಸಲು ನೇತ್ರಾವತಿ ಒಡಲಿನಲ್ಲಿ ಯಥೇಚ್ಛವಾಗಿರುವ ನೀರನ್ನು ಆಶ್ರಯಿಸಿ ಕಾಡಾನೆ ಸಹಿತ ಕಾಡು ಪ್ರಾಣಿಗಳು ಈ ಪ್ರದೇಶದಲ್ಲಿ ಆಗಾಗ ಕಾಣಲಾರಂಭಿಸಿದೆ. ಕೆಲ ದಿನಗಳಿಂದ ಮೊಗ್ರು, ಬಂದಾರು ಗ್ರಾಮದಲ್ಲಿ ಕಾಣಿಸಿಕೊಂಡಿರುವ ಕಾಡಾನೆ ನದಿ ನೀರಿನಲ್ಲಿ ನೀರಾಟವಾಡುತ್ತಿದ್ದ ದೃಶ್ಯಗಳನ್ನು ಇಲ್ಲಿ ಸ್ಮರಿಸಬಹುದಾಗಿದೆ. ನೇತ್ರಾವತಿ ನದಿಯ ಉಪ ನದಿಗಳು ಬತ್ತುತ್ತಿದ್ದರೂ ನೇತ್ರಾವತಿ ಈ ಭಾಗದಲ್ಲಿ ತನ್ನ ಒಡಲಿನಲ್ಲಿ ಮೈ ತುಂಬಾ ಜಲಸಿರಿಯನ್ನು ಹೊಂದಿರುವುದು ಕಾಡುಪ್ರಾಣಿಗಳಿಗೂ ಅನುಕೂಲ ಕಲ್ಪಿಸಿದೆ.

ಶತಮಾನಗಳಿಂದ ಪೂಜಿಸಿಕೊಂಡು ಬರಲಾಗುತ್ತಿದ್ದ ಉಪ್ಪಿನಂಗಡಿಯ ನೇತ್ರಾವತಿ ನದಿ ಗರ್ಭದಲ್ಲಿರುವ ಉದ್ಭವಲಿಂಗಕ್ಕೆ ಈ ಬಾರಿ ಹಿನ್ನೀರು ನದಿಯಲ್ಲಿ ಆವರಿಸಿಕೊಂಡಿರುವ ಕಾರಣ ನೇರವಾಗಿ ಪೂಜೆ ಸಲ್ಲಿಸಲಾಗಲಿಲ್ಲ. ಆದರೆ ಜಲಾಧಿವಾಸ ಸ್ಥಿತಿಯಲ್ಲಿಯೇ ಮಳೆಗಾಲದಲ್ಲಿ ಸಲ್ಲಿಸಲಾಗುತ್ತಿದ್ದ ಪೂಜೆಯ ಕ್ರಮವನ್ನೇ ಈ ಬಾರಿ ವರ್ಷದುದ್ದಕ್ಕೂ ಅನುಷ್ಠಾನಿಸಲಾಗಿದೆ.