ಹೊಸ ವರ್ಷಾಚರಣೆ: ರೆಸಾರ್ಟ್‌ ಬಾಡಿಗೆ ಲಕ್ಷ ರು.!

ಗೋಕರ್ಣ: ಹೊಸ ವರ್ಷಾಚರಣೆಗೆ ಗೋಕರ್ಣ ಸಜ್ಜಾಗುತ್ತಿದ್ದು, ವಸತಿಗೃಹದ ಒಂದು ದಿನದ ಬಾಡಿಗೆ ದರ ಒಂದು ಲಕ್ಷ ರು. ವರೆಗೂ ಏರಿಕೆಯಾಗಿದೆ!

ಈಗಾಗಲೇ ಅಧಿಕ ಸಂಖ್ಯೆಯಲ್ಲಿ ಜನರು ಆಗಮಿಸುತ್ತಿದ್ದು, ಮಂಗಳವಾರ ಮತ್ತಷ್ಟು ಹೆಚ್ಚಾಗಲಿದೆ. ಇಲ್ಲಿನ ಓಂ, ಕುಡ್ಲೆ, ಪ್ಯಾರಡೈಸ್, ಮುಖ್ಯಕಡಲತೀರ, ದುಬ್ಬನಸಶಿ, ಗಂಗಾವಳಿಯವರಿಗಿನ ಕಡಲ ತೀರಗಳ ರೆರ್ಸಾಟ್‌ಗಳು ಮುಂಗಡವಾಗಿ ಕಾಯ್ದಿರಿಸಿದ್ದು ಎಲ್ಲವೂ ಭರ್ತಿಯಾಗಿದೆ. ಇನ್ನೂ ಪೇಟೆಯಲ್ಲಿ ವಸತಿ ಗೃಹ , ಹೋಮ್ ಸ್ಟೇ ಸಹ ಜನರಿಂದ ತುಂಬಿದೆ.

ಹಲವು ಕಡೆ ಡಿ.ಜೆ. ಹಾಡಿಗೆ ಹೆಜ್ಜೆ ಹಾಕಲು ವೇದಿಕೆ ನಿರ್ಮಿಸಿದ್ದಾರೆ. ಇನ್ನೂ ಅನೇಕ ಕಡೆ ಪ್ರವಾಸಿಗರಿಗೆ ವಿಶೇಷ ಮನೋರಂಜನಾ ಚಟುವಟಿಕೆ ಆಯೋಜಿಸಿದ್ದಾರೆ. ಮಧ್ಯರಾತ್ರಿ ಆಗುತ್ತಿದ್ದಂತೆ ಕುಣಿದು ಕುಪ್ಪಳಿಸುವ ಕ್ಷಣಕ್ಕೆ ಅಣಿಯಾಗುತ್ತಿದ್ದಾರೆ.

ಡಿ. 28ರಿಂದ ಜ. 1ನೇ ತಾರೀಖಿನ ವರೆಗೆ ಇಲ್ಲಿನ ರೆಸಾರ್ಟ್‌, ವಸತಿ ಗೃಹದಲ್ಲಿ ಯಾವುದೇ ಕೊಠಡಿ ದೊರೆಯುತ್ತಿಲ್ಲ. ಸಾಮಾನ್ಯ ಪ್ರವಾಸಿಗ ಬಂದರೆ ಬಸ್ ನಿಲ್ದಾಣ, ಇಲ್ಲವೇ ರಸ್ತೆ ಅಂಚಿನಲ್ಲಿ ರಾತ್ರಿ ಕಳೆಯಬೇಕಿದೆ. ಮುಂಗಡವಾಗಿ ಕಾಯ್ದಿರಿಸಿದ ಹಲವು ರೆಸಾರ್ಟ್‌ಗಳನ್ನು ಆನ್‌ಲೈನ್‌ನಲ್ಲಿ ಹುಡುಕುತ್ತ ಸಾಗಿದರೆ, ಕನಿಷ್ಠ ಐದು ಸಾವಿರದಿಂದ ಒಂದು ಲಕ್ಷದ ವರೆಗೆ ಒಂದು ದಿನಕ್ಕೆ ಬಾಡಿಗೆ ನಿಗದಿಯಾಗಿದ್ದು, ಕೇವಲ ಒಂದೇ ಕೊಠಡಿ ಲಭ್ಯವಿದ್ದು, ಬೇಕಿದ್ದರೆ ಈಗಲೇ ಬುಕಿಂಗ್ ಮಾಡಿ ಎಂಬ ಮಾಹಿತಿ ದೊರೆಯುತ್ತಿದೆ. ಮಿರ್ಜಾನ್‌ನಿಂದ ಗೋಕರ್ಣದ ವರೆಗೆ ಎಲ್ಲೆಡೆ ವಸತಿ ಗೃಹ, ಹೋಮ್ ಸ್ಟೇ ಆಗಿದ್ದರೂ ಎಲ್ಲಿಯೂ ಒಂದು ಕೊಠಡಿ ಈ ದಿನಗಳಲ್ಲಿ ದೊರೆಯುತ್ತಿಲ್ಲ. ಅಂದರೆ ಪ್ರವಾಸಿಗರ ಭೇಟಿ ಸಂಖ್ಯೆ ಅದೆಷ್ಟು ಹೆಚ್ಚಾಗಿದೆ ಎಂಬುದು ತಿಳಿಯುತ್ತದೆ.

ಪೊಲೀಸ್ ಭದ್ರತೆ

ಅಹಿತಕರ ಘಟನೆ ನಡೆಯದಂತೆ ಮುನ್ನೆಚ್ಚರಿಕೆ ಕ್ರಮವನ್ನು ಈಗಾಗಲೇ ತೆಗೆದುಕೊಂಡಿದ್ದು, ಬಿಗಿ ಭದ್ರತೆ ಏರ್ಪಡಿಸಲಾಗಿದೆ. ಹೊಟೇಲ್, ರೆಸಾರ್ಟ್ ಮಾಲಕರಿಗೂ ನಿಯಮದಂತೆ ಹೊಸವರ್ಷಾಚರಣೆಗೆ ಖಡಕ್ ಸೂಚನೆ ನೀಡಿದ್ದೇವೆ.