ಮೆಕ್ಕೆಜೋಳಕ್ಕಿಲ್ಲ ಬೆಲೆ: ರಾಶಿ ಮಾಡಲು ಮುಂದಾಗದ ರೈತ

ಪರಶಿವಮೂರ್ತಿ ದೋಟಿಹಾಳ ಕುಷ್ಟಗಿ

ಹೌದು. ತಾಲೂಕಿನ ಕಡೇಕೊಪ್ಪ ಗ್ರಾಮದ ಬಸವರಾಜ ಜಿಗೇರಿ ಎಂಬ ರೈತರು ಐದು ಎಕರೆ ಜಮೀನಿನಲ್ಲಿ ಮೆಕ್ಕೆಜೋಳ ಬೆಳೆದಿದ್ದು, ಫಸಲು ಸಮೃದ್ಧವಾಗಿ ಬಂದಿದ್ದರೂ ಸೂಕ್ತ ಬೆಲೆ ಇಲ್ಲದೆ ಮೆಕ್ಕೆಜೋಳ ತೆನೆ ಮುರಿಯದೆ ಹಾಗೇ ಬಿಟ್ಟಿದ್ದಾರೆ.

ಸಾವಿರಾರು ಖರ್ಚು: ಬಿತ್ತನೆಯ ಸಮಯದಲ್ಲಿ ಗೊಬ್ಬರ, ಬೀಜ ಖರೀದಿ, ಬಿತ್ತನೆ ಖರ್ಚು, ಕೂಲಿ ಆಳು, ಕ್ರಿಮಿನಾಶಕ ಸಿಂಪಡಣೆ ಸೇರಿದಂತೆ ಅನೇಕ ಕೃಷಿ ಕಾರ್ಯಗಳ ಸಲುವಾಗಿ ಒಂದು ಎಕರೆಗೆ ಸುಮಾರು ₹10 ಸಾವಿರಗಳಂತೆ ಸಾವಿರಾರು ಖರ್ಚು ಮಾಡಿಕೊಂಡಿರುವ ಮೆಕ್ಕೆಜೋಳ ಬೆಳೆದ ರೈತನ ಬಾಳು ಹೇಳತೀರದಾಗಿದೆ.

ಕಡೇಕೊಪ್ಪ ಗ್ರಾಮದ ಐದು ಎಕರೆಯ ಜಮೀನಿನಲ್ಲಿ ಮೆಕ್ಕೆಜೋಳ ಬೆಳೆಯಲಾಗಿದ್ದು, ಸಮೃದ್ಧವಾಗಿ ಬೆಳೆ ಬಂದಿದ್ದರೂ ಸಹಿತ ದರ ಕಡಿಮೆ ಇರುವ ಕಾರಣ ಇನ್ನೂ ರಾಶಿ ಮಾಡಲು ಮುಂದಾಗಿಲ್ಲ. ತಾಲೂಕಿನಲ್ಲಿ ಬಹುತೇಕ ರೈತರು ಮೆಕ್ಕಜೋಳ ಮಾರುಕಟ್ಟೆಗೆ ತೆಗೆದುಕೊಂಡು ಹೋಗಿಲ್ಲ, ಸಾಲ ಮಾಡುವ ಮೂಲಕ ಬೆಳೆ ಬೆಳೆಯಲಾಗಿದ್ದು, ಸರ್ಕಾರ ರೈತರ ಕಷ್ಟ ಅರಿತುಕೊಂಡು ತಾಲೂಕಿನಲ್ಲಿ ಖರೀದಿ ಕೇಂದ್ರ ಪ್ರಾರಂಭ ಮಾಡಿದರೆ ರೈತರಿಗೆ ಅನೂಕೂಲಕರವಾಗಲಿದೆ ಎಂದು ಕಡೇಕೊಪ್ಪ ಗ್ರಾಮದ ರೈತ ಬಸವರಾಜ ಜಿಗೇರಿ ತಿಳಿಸಿದ್ದಾರೆ.