ವಿಬಿ ರಾಮ್‌ ಜಿಗೆ ವಿರೋಧ ಹಾಸ್ಯಾಸ್ಪದ: ಟೆಂಗಿನಕಾಯಿ

ಕೊಪ್ಪಳ: ವಿಬಿ ರಾಮ್ ಜಿಗೆ ಕಾಂಗ್ರೆಸ್‌ ವಿರೋಧ ಮಾಡುತ್ತಿರುವುದು ಹಾಸ್ಯಾಸ್ಪದ. ಕಾಂಗ್ರೆಸ್‌ನವರು ಯೋಜನೆಗಳಲ್ಲಿನ ಅಂಶಕ್ಕೆ ವಿರೋಧವೋ ಅಥವಾ ಹೆಸರಿಗೆ ಎಂಬುದನ್ನು ಸ್ಪಷ್ಟಪಡಿಸಬೇಕು ಎಂದು ಶಾಸಕ ಮಹೇಶ ಟೆಂಗಿನಕಾಯಿ ಹೇಳಿದ್ದಾರೆ.

ಈ ಯೋಜನೆಗೆ 2013-14ರಲ್ಲಿ ₹33 ಸಾವಿರ ಕೋಟಿ ಇತ್ತು. ಈಗ ₹2.86 ಲಕ್ಷ ಕೋಟಿ ಅನುದಾನ ನೀಡಲಾಗಿದೆ. ಎಲ್ಲ ರೀತಿಯಿಂದ ಬಡವರಿಗೆ ಅನುಕೂಲವಾಗುವ ಯೋಜನೆ ಬದಲಾವಣೆಯಾಗಿದೆ. ನರೇಗಾದಲ್ಲಿ 10 ಲಕ್ಷ ದೂರು ಬಂದಿದ್ದವು. ಈಗ ದೂರುಗಳ ಸಂಖ್ಯೆ ಕಡಿಮೆಯಾಗಿದೆ. ಇನ್ನೂ ಬದಲಾವಣೆ ತರಲಾಗುವುದು. ಬಯೋಮೆಟ್ರಿಕ್, ಎಐ ಟೆಕ್ನಾಲಾಜಿ ಬಳಕೆ ಮಾಡಿ ನಿಗಾ ವಹಿಸಲಾಗಿದೆ. ಹಲವಾರು ಯೋಜನೆ, ಸಂಘ ಸಂಸ್ಥೆಗಳು ನಕಲಿ ಗಾಂಧಿ ಹೆಸರಿನಲ್ಲಿವೆ. ರಾಜ್ಯದ ಪಾಲನ್ನು 60-40 ಮಾಡಿದ್ದರೆ ತಪ್ಪಿಲ್ಲ. ರಾಜ್ಯ ಸರ್ಕಾರವು ಹುಬ್ಬಳ್ಳಿ ಧಾರವಾಡ ಮಹಾನಗರ ಪಾಲಿಕೆಗೆ ತನ್ನ ಪಾಲಿನ ₹370 ಕೋಟಿ ಕೊಡಬೇಕು. ಇಲ್ಲಿ ಯಾಕೆ ರಾಜ್ಯದವರು ಮಾಡುತ್ತಿಲ್ಲ ಎಂದು ಪ್ರಶ್ನಿಸಿದರು.

ಗೃಹಲಕ್ಷ್ಮಿ ಯೋಜನೆಯಲ್ಲಿ ಹಣ ನೀಡದೆ ಇರುವ ಕುರಿತು ಅಧಿವೇಶನದಲ್ಲಿ ಮಾತನಾಡಿದೆ. ಎರಡು ತಿಂಗಳ ಗೃಹಲಕ್ಷ್ಮಿ ಯೋಜನೆಯ ಹಣ ಇನ್ನೂ ಹೋಗಿಲ್ಲ. ಆ ಹಣ ಎಲ್ಲಿದೆ? ಎಲ್ಲಿ ಹೋಗಿದೆ ಎಂಬುದನ್ನು ಸರ್ಕಾರ ಸ್ಪಷ್ಟಪಡಿಸಬೇಕು. ಸಚಿವರು ಹಾಗು ಸಿಎಂ ಮಧ್ಯದ ಭಿನ್ನಾಭಿಪ್ರಾಯ ಇರಬಹುದು. ತಾಂತ್ರಿಕವಾಗಿ ಈ ಹಣ ನೀಡಬೇಕು. ಈ ಕುರಿತು ಹೋರಾಟ ಮಾಡುತ್ತೇವೆ ಎಂದರು.

ವಿಧಾನ ಪರಿಷತ್‌ ಸದಸ್ಯೆ ಹೇಮಲತಾ ನಾಯಕ್‌, ಮಾಜಿ ಸಚಿವ ಹಾಲಪ್ಪ ಆಚಾರ, ಡಾ. ಬಸವರಾಜ ಕ್ಯಾವಟರ್, ಮಾಜಿ ಶಾಸಕ ಪರಣ್ಣ ಮುನವಳ್ಳಿ, ಚಂದ್ರಶೇಖರ ಹಲಗೇರಿ, ಪ್ರಮೋದ ಕಾರಕೂನ, ಮಹೇಶ ಕ್ಯಾವಟರ್ ಸೇರಿದಂತೆ ಇತರರು ಉಪಸ್ಥಿತರಿದ್ದರು.