ಸಾರ್ವಜನಿಕರ ಸೇವೆಗೆ ನಮ್ಮ ವಕೀಲರ ಬಳಗ ಸ್ಥಾಪನೆ: ಕೆ.ಎಲ್.ಲಿಂಗರಾಜು

ತರೀಕೆರೆ: ಕುಂದುಕೊರತೆ ನಿವಾರಿಸಲು ಸಾರ್ವಜನಿಕರ ಸೇವೆಗಾಗಿ ನಮ್ಮ ವಕೀಲರ ಬಳಗ ಸ್ಥಾಪಿಸಲಾಗಿದೆ ಎಂದು ಹಿರಿಯ ವಕೀಲ ಕೆ.ಎಲ್.ಲಿಂಗರಾಜು ಹೇಳಿದ್ದಾರೆ.

ವಕೀಲ ಬಿ.ಪಿ.ವಿಕಾಸ್ ಮಾತನಾಡಿ, ಸಮಾನ ಮನಸ್ಕರು ಒಂದುಗೂಡಿ ನಮ್ಮ ವಕೀಲರ ಬಳಗವನ್ನು ಸಂಘಟಿಸಲಾಗಿದೆ, ವಕೀಲರ ಬಳಗಕ್ಕೆ ಸರ್ವರ ಸಹಕಾರ ಇದೆ. ಕಾನೂನು ಅರಿವು ಮತ್ತು ಶಿಕ್ಷಣದ ಬಗ್ಗೆ ಜಾಗೃತಿ ಮೂಡಿಸುವುದು, ಭ್ರಷ್ಟಾಚಾರ ರಹಿತವಾಗಿ ಸಾರ್ವಜನಿಕರ ಕುಂದು ಕೊರತೆ ನಿವಾರಿಸುವುದು, ಪರಿಸರ ರಕ್ಷಣೆ, ಪ್ರಾಣಿಸಂಕುಲ ರಕ್ಷಣೆ, ಊರಿನ ಕೆರೆಗಳ ಸಂರಕ್ಷಣೆ, ಶಾಲಾ ಕಾಲೇಜುಗಳಲ್ಲಿ ಕಾನೂನು ಅರಿವು ಮೂಡಿಸುವ ಕಾರ್ಯಕ್ರಮ ಸಂಘಟಿಸುವುದು, ನಾಗರಿಕರ ಹಕ್ಕು ರಕ್ಷಣೆ, ವಿದ್ಯಾರ್ಥಿಗಳ ಹಿತರಕ್ಷಣೆಗೆ ನಮ್ಮ ವಕೀಲರ ಬಳಗ ಸ್ಥಾಪಿಸಲಾಗಿದೆ ಎಲ್ಲರೂ ಸಹಕರಿಸಬೇಕೆಂದು ಹೇಳಿದರು.

ಹಿರಿಯ ವಕೀಲ ಎಸ್.ಸುರೇಶ್ ಚಂದ್ರ ಮಾತನಾಡಿ, ಬಳಗದಿಂದ ತರೀಕೆರೆ ಮತ್ತು ಅಜ್ಜಂಪುರ ತಾಲೂಕುಗಳಲ್ಲಿ ಪರಿಣಾಮಕಾರಿಯಾಗಿ ಸಾಮಾಜಿಕ ಕಾರ್ಯ ನಿರ್ವಹಿಸಲಾಗುತ್ತದೆ. ಒಗ್ಗಟ್ಟಿನಿಂದ ಎಲ್ಲರೂ ಬಳಗದಲ್ಲಿ ಸೇರಿ ಉತ್ತಮ ಸಾಮಾಜಿಕ ಸೇವೆ ನಿರ್ವಹಿಸಲಾಗುತ್ತದೆ ಎಂದು ತಿಳಿಸಿದರು.