ಸಹಕಾರಿ ಸಂಘದಲ್ಲಿ ರಾಜಕಾರಣ ಬೇಡ: ಶಿವರಾಮ ಹೆಬ್ಬಾರ

ಮುಂಡಗೋಡ: ಸಹಕಾರಿ ಸಂಘಕ್ಕೆ ಯಾವತ್ತೂ ರಾಜಕಾರಣ ತರಬಾರದು. ಯಾವುದೇ ಜಾತಿ, ಪಕ್ಷ ನೋಡಿ ಕೆಲಸ ಮಾಡಬಾರದು ಎಂದು ಕೆಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಹಾಗೂ ಶಾಸಕ ಶಿವರಾಮ ಹೆಬ್ಬಾರ ಹೇಳಿದರು.

ಸೊಸೈಟಿಗಳ ಒತ್ತಡ ತಪ್ಪಿಸುವ ದೃಷ್ಟಿಯಿಂದ ತಾಲೂಕಿನ ಪಾಳಾ ಭಾಗದ ತಲಾ ೫ ಸೊಸೈಟಿಗಳ ಸಾಲ ವಿತರಣೆಯನ್ನು ಈ ಬ್ಯಾಂಕ್ ಮೂಲಕ ಮಾಡಲಾಗುತ್ತದೆ. ಅದೇ ರೀತಿ ಇಂದೂರ ಗ್ರಾಮದಲ್ಲಿ ತೆರೆಯಲಾಗುವ ಶಾಖೆಯಲ್ಲಿ ೫ ಸೊಸೈಟಿಗಳಿಗೆ ಸಾಲ ವಿತರಣೆ ಮಾಡಲಾಗುತ್ತದೆ. ಮುಂಡಗೋಡ ಕೆಡಿಸಿಸಿ ಬ್ಯಾಂಕ್‌ನಲ್ಲಿ ೬ ಸೊಸೈಟಿಗಳಿಗೆ ಸಾಲ ವಿತರಣೆ ಮಾಡಲಾಗುವುದು ಎಂದರು.

ಕೇವಲ ರೈತರು ಮಾತ್ರವಲ್ಲ, ಶೇ. ೫೦ರಷ್ಟು ಕೃಷಿಯೇತರ ಸಾಲ ನೀಡಲಾಗುತ್ತದೆ. ಸ್ವ ಉದ್ಯೋಗ ಮಾಡುವವರು ಕೂಡ ಪ್ರಾಮಾಣಿಕ ವ್ಯವಹರಿಸುತ್ತಿದ್ದು, ಮರುಪಾವತಿ ಕೂಡ ಶೇ. ೯೯.೨೧ರಷ್ಟಿದೆ. ಇದರಿಂದಲೇ ನಮ್ಮ ಬ್ಯಾಂಕ್ ನಿರಂತರ ೬ ಬಾರಿ ರಿಸರ್ವ್‌ ಬ್ಯಾಂಕ್‌ನಿಂದ ಪ್ರಶಸ್ತಿ ಪಡೆದಿದೆ. ಅಲ್ಲದೇ ಅಪೆಕ್ಸ್ ಬ್ಯಾಂಕ್ ನಿಂದಲೂ ಕೂಡ ೩೬ ಬಾರಿ ಪ್ರಶಸ್ತಿ ಪಡೆದಿದೆ. ಹೀಗೆ ರಾಜ್ಯದಲ್ಲಿ ಪ್ರತಿಷ್ಠಿತ ಪ್ರಶಸ್ತಿ ಪಡೆದ ಹೆಗ್ಗಳಿಕೆ ನಮ್ಮದಾಗಿದೆ ಎಂದು ಹೆಬ್ಬಾರ್‌ ವಿವರಿಸಿದರು.

ಕಳೆದ ೩ ವರ್ಷದಲ್ಲಿ ರೈತರಿಗೆ ಮನೆ ಕಟ್ಟಲು ಸಾಲ, ಮಕ್ಕಳ ಶಿಕ್ಷಣಕ್ಕಾಗಿ ಹಾಗೂ ಜಮೀನು ಖರೀದಿಸಲು ಸಾಲ ಸೇರಿದಂತೆ ಹತ್ತು ಹಲವು ಯೋಜನೆಗಳನ್ನು ನಮ್ಮ ಜಿಲ್ಲಾ ಮಧ್ಯವರ್ತಿ ಬ್ಯಾಂಕ್ ಮಾಡಿದೆ. ಈ ಯೋಜನೆಗಳು ರಾಜ್ಯದ ಯಾವ ಜಿಲ್ಲಾ ಮಧ್ಯವರ್ತಿ ಬ್ಯಾಂಕ್‌ನಲ್ಲಿ ಕೂಡ ಇಲ್ಲ. ಇದು ನಮ್ಮ ಹೆಮ್ಮೆ ಎಂದು ಹೇಳಿದರು.