ಮಂಡ್ಯ ಜಿಲ್ಲಾದ್ಯಂತ ವರಮಹಾಲಕ್ಷ್ಮಿ ಹಬ್ಬಕ್ಕೆ ಸಡಗರದ ಸಿದ್ಧತೆ

ಕನ್ನಡಪ್ರಭ ವಾರ್ತೆ ಮಂಡ್ಯ

ಲಕ್ಷ್ಮಿಯನ್ನು ಪ್ರತಿಷ್ಠಾಪಿಸಲು ಸುಮಂಗಲಿಯರು-ಯುವತಿಯರು ಸಂಭ್ರಮ-ಸಡಗರದ ಸಿದ್ಧತೆ ನಡೆಸಿದ್ದಾರೆ. ಮನೆಯನ್ನೆಲ್ಲಾ ಸ್ವಚ್ಛಗೊಳಿಸಿ ಬಗೆ ಬಗೆಯ ತಿಂಡಿ-ತಿನಿಸುಗಳ ತಯಾರಿಕೆಯಲ್ಲಿ ತೊಡಗಿದ್ದಾರೆ. ಹಬ್ಬದ ಪ್ರಯುಕ್ತ ಹೂವು-ಹಣ್ಣಿನ ಬೆಲೆ ಕೊಂಚ ದುಬಾರಿಯಾಗಿದೆ.

ಬೆಳ್ಳಿಯ ಲಕ್ಷ್ಮಿ ಮುಖವಾಡಕ್ಕೆ ಬೇಡಿಕೆ:

ವರಮಹಾಲಕ್ಷ್ಮಿ ಹಬ್ಬಕ್ಕೆ ಶ್ರೀಮಂತರು ಚಿನ್ನ, ಬೆಳ್ಳಿ ಮುಖವಾಡವನ್ನು ಕಲಶದಲ್ಲಿ ಪ್ರತಿಷ್ಠಾಪಿಸಿ ಅಲಂಕರಿಸಿದರೆ, ಮಧ್ಯಮವರ್ಗದವರು ಮತ್ತು ಬಡವರು ತೆಂಗಿನಕಾಯಿಗೆ ಲಕ್ಷ್ಮಿಯನ್ನು ಚಿತ್ರಿಸಿ ಅಲಂಕಾರ ಮಾಡುವುದು ವಾಡಿಕೆ. ಬೆಳ್ಳಿಯ ಲಕ್ಷ್ಮಿಯ ಮುಖವಾಡವನ್ನು ಪ್ರತಿಷ್ಠಾಪಿಸುವವರು ಕನಿಷ್ಠ ೮೦ ಗ್ರಾಂನಿಂದ ೧೫೦ ಗ್ರಾಂವರೆಗೆ ಕೊಳ್ಳುವುದುಂಟು. ಈ ಮುಖವಾಡಗಳಿಗೆ ಕನಿಷ್ಠ ೮ ಸಾವಿರ ರು.ನಿಂದ ೧೮ ಸಾವಿರ ರು.ವರೆಗೂ ಬೆಲೆ ಇದೆ. ಆದರೂ ಬೆಳ್ಳಿಯ ಮುಖವಾಡಗಳನ್ನು ಕೊಳ್ಳುವವರ ಸಂಖ್ಯೆ ಕಡಿಮೆಯಾಗಿಲ್ಲ.

ಹೂವು-ಹಣ್ಣು ಬೆಲೆ ದುಪ್ಪಟ್ಟು:

ಇನ್ನು ಸೇವಂತಿಗೆ ಹೂವು ಪ್ರತಿ ಮಾರಿಗೆ ೧೦೦ ರಿಂದ ೧೨೦ ರು., ಮಲ್ಲಿಗೆ- ೧೫೦-೨೦೦ ರು., ಕಾಕಡಾ-೧೫೦ ರು., ಬಿಡಿ ಹೂ ೧೦೦ ಗ್ರಾಂಗೆ ೪೦ ರು., ಮಾವಿನ ಸೊಪ್ಪುಜೊತೆ ೨೦ ರು., ಬಾಳೆ ಕಂದು ೩೦-೫೦ ರು., ಚೆಂಡು ಹೂ ಕೆಜಿಗೆ ೧೦೦ ರು., ತಾವರೆ ಹೂ ಜೊತೆ ೫೦ ರಿಂದ ೮೦ ರು.ಗೆ ಮಾರಾಟವಾಗುತ್ತಿತ್ತು.

ತರಕಾರಿ ಬೆಲೆಯೂ ಸಾಮಾನ್ಯದರದಲ್ಲೇ ಇತ್ತು. ಪ್ರತಿ ಕೆಜಿ ಮಿಕ್ಸ್ ತರಕಾರಿ ೫೦ ರು., ಬೀನಿಸ್-೮೦, ಕ್ಯಾರೆಟ್-೮೦, ಗಡ್ಡೆಕೋಸು-೬೦ ರು., ದಪ್ಪ ಮೆಣಸಿನಕಾಯಿ-೮೦ ರು., ಅವರೆಕಾಯಿ -೧೦೦ (ಎರಡೂವರೆ ಕೆಜಿ) ರು., ಪ್ರತಿ ಕೆಜಿಗೆ ಟಮೋಟೋ-೪೦, ನುಗ್ಗೆಕಾಯಿ-೪೦ ರು. ಬೀಟ್‌ರೋಟ್-೫೦, ಸಬ್ಬಸಿಗೆ ಸೊಪ್ಪು ಪ್ರತಿ ಕಟ್ಟಿಗೆ ೧೦ ರು., ಮೆಂತ್ಯ ಸೊಪ್ಪು-೧೦ರಿಂದ ೨೦ ರು.ನಂತೆ ಮಾರಾಟವಾಗುತ್ತಿತ್ತು.

ಲಕ್ಷ್ಮಿಪೂಜೆಗಾಗಿ ವಿವಿಧ ಮಾದರಿಯ ತಿನಿಸುಗಳನ್ನು ಮಹಿಳೆಯರು ಮನೆಯಲ್ಲಿ ಸಿದ್ಧಪಡಿಸಿಟ್ಟುಕೊಂಡಿದ್ದಾರೆ. ಸಕ್ಕರೆ ಮಿಠಾಯಿ, ರವೆಉಂಡೆ, ಹೋಳಿಗೆ, ಚಕ್ಕುಲಿ, ಕೋಡುಬಳೆ, ಕಜ್ಜಾಯ, ಕರ್ಜಿಕಾಯಿ, ಬಾದಾಮಿ, ಕರ್ಜೂರ, ಒಣದ್ರಾಕ್ಷಿ, ಗೋಡಂಬಿ, ಕಲ್ಲುಸಕ್ಕರೆ ಜೊತೆಗೆ ಗೋಧಿ ಪಾಯಸ, ಕಡಲೆಬೇಳೆ ಪಾಯಸ, ಹೆಸರುಬೇಳೆ ಪಾಯಸವನ್ನು ನೈವೇದ್ಯ ರೂಪದಲ್ಲಿಡುವ ಖಾದ್ಯಗಳ ತಯಾರಿಯಲ್ಲಿ ಮಹಿಳೆಯರು ತೊಡಗಿಸಿಕೊಂಡಿದ್ದರು.