ಸಂತ್ರಸ್ತ ರೈತರ ಭೂಮಿಗೆ ಬೆಲೆ ನಿಗದಿ ಐತಿಹಾಸಿಕ ನಿರ್ಧಾರ: ಅಜಯಕುಮಾರ ಸರನಾಯಕ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ನಗರದ ಪತ್ರಿಕಾಭವನದಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ನೀರಾವರಿ ಜಮೀನಿಗೆ ಎಕರೆಗೆ ₹40 ಲಕ್ಷ, ಒಣಬೇಸಾಯಕ್ಕೆ 30 ಲಕ್ಷ ಪರಿಹಾರವನ್ನು ಸರಕಾರ ಘೋಷಣೆ ಮಾಡಿದ್ದು, ನಾವೆಲ್ಲ ಸಂತ್ರಸ್ತರ ಜೊತೆ ಸೇರಿ ಹೋರಾಟ ಮಾಡಿದ್ದರ ಫಲವಾಗಿದೆ. ಒಂದೇ ರೀತಿಯ ಬೆಲೆಯ ಘೋಷಣೆಯಿಂದ ಎಲ್ಲ ರೈತರಿಗೂ ಅನುಕೂಲವಾಗಲಿದೆ. ಸರ್ಕಾರ ಆದಷ್ಟು ಬೇಗ ಒಂದೇ ಹಂತದಲ್ಲಿ ಭೂಮಿ ಖರೀದಿ ಮಾಡಿ ರೈತರಿಗೆ ಪರಿಹಾರ ನೀಡಬೇಕು ಎಂದು ಹೇಳಿದರು.

ನಾವು ಮೊದಲು ನೀರಾವರಿಗೆ ಪ್ರತಿ ಎಕರೆಗೆ ₹50 ಲಕ್ಷ ಹಾಗೂ ಒಣಬೇಸಾಯಕ್ಕೆ ₹40 ಲಕ್ಷ ಕೇಳಿದ್ದೇವು. ಸರ್ಕಾರ ಇದಕ್ಕಾಗಿ ಮೂರ್ನಾಲ್ಕು ಸಭೆ ನಡೆಸಿತು. ಅದರಲ್ಲಿಯೂ ನಾವೆಲ್ಲರೂ ಏಕರೂಪರದ ಪರಿಹಾರಕ್ಕೆ ಒತ್ತಾಯ ಮಾಡಿದ್ದೆವು. ಅದಕ್ಕಾಗಿಯೇ ವಿಶೇಷ ಸಭೆ ಕರೆದು ರೈತರಿಗೆ ಅನುಕೂಲವಾಗುವ ರೀತಿಯಲ್ಲಿಯೇ ಬೆಲೆ ಘೋಷಣೆ ಮಾಡಿದ್ದು ಇದೊಂದು ಐತಿಹಾಸಿಕ ನಿರ್ಧಾರವಾಗಿದೆ ಎಂದು ಹೇಳಿದರು.

ಸರ್ಕಾರ ಸಂಪೂರ್ಣ ಭೂಸ್ವಾಧೀನಕ್ಕಾಗಿ ಮೂರು ವರ್ಷ ಕಾಲಾವಧಿ ನಿಗದಿ ಮಾಡಿದೆ. ಅದಕ್ಕೆ ಹಣ ಹೊಂದಿಸಿಕೊಳ್ಳುವುದಾಗಿಯೂ ಸಿಎಂ ಹೇಳಿದ್ದಾರೆ. ಸರ್ಕಾರ ಮೊದಲು ಕೃಷ್ಣಾ ಮೇಲ್ದಂಡೆ ಯೋಜನೆಯ ಭೂಸ್ವಾಧೀನ ಕಚೇರಿಗೆ ಪೂರ್ಣಾವಧಿಯ ಆಯುಕ್ತರು ಸೇರಿ ಸಿಬ್ಬಂದಿ ನೇಮಕ ಮಾಡಬೇಕು. ಅಂದಾಗ ಮಾತ್ರ ಸ್ವಾಧೀನ ಕಾರ್ಯ ಯಶಸ್ವಿಯಾಗಲು ಸಾಧ್ಯ ಎಂದು ತಿಳಿಸಿದರು.