ಸಮರ್ಪಕವಾಗಿ ಬಸ್‌ ಓಡಿಸುವಂತೆ ರಸ್ತೆ ತಡೆದು ಧರಣಿ

ಕನ್ನಡಪ್ರಭ ವಾರ್ತೆ ಅಥಣಿ

ತಾಲೂಕಿನ ಮುರುಗುಂಡಿ ಗ್ರಾಮದಲ್ಲಿ ಸಾರಿಗೆ ಬಸ್‌ ತಡೆದು ವಿದ್ಯಾರ್ಥಿಗಳು ಮತ್ತು ಪ್ರಯಾಣಿಕರು ಕಿಡಿಕಾರಿದರು. ನಂತರ ವಿಷಯ ತಿಳಿದ ಪೊಲೀಸ್ ಅಧಿಕಾರಿಗಳು, ಅಥಣಿ ಸಾರಿಗೆ ಘಟಕದ ಅಧಿಕಾರಿಗಳು ಸ್ಥಳಕ್ಕೆ ಆಗಮಿಸಿ ವಿದ್ಯಾರ್ಥಿಗಳು ಮತ್ತು ಪ್ರಯಾಣಿಕರ ಮನವೊಲಿಸಿದರು. ಜೊತೆಗೆ ಹೆಚ್ಚುವರಿ ಬಸ್‌ ಓಡಿಸುವ ಮೂಲಕ ಸಮಸ್ಯೆ ಬಗೆಹರಿಸುವುದಾಗಿ ಹೇಳಿದರು. ಹೀಗಾಗಿ ಪ್ರತಿಭಟನೆಯನ್ನು ಹಿಂಪಡೆಯಲಾಯಿತು.ಈ ಸಂದರ್ಭದಲ್ಲಿ ಕಾಲೇಜಿನ ವಿದ್ಯಾರ್ಥಿ ಸುರೇಶ ವಾಘಮೋರೆ ಮಾತನಾಡಿ, ತಾಲೂಕಿನ ಮುರಗುಂಡಿ, ಕವಲಗುಡ್ಡ, ಮೋಳೆ, ಐನಾಪುರ ಮಾರ್ಗದಲ್ಲಿ ಓಡಾಡುವ ಬಸ್‌ಗಳಿಗೆ ನಿತ್ಯ ನೂರಾರು ವಿದ್ಯಾರ್ಥಿಗಳು ಶಾಲಾ ಕಾಲೇಜುಗಳಿಗೆ ಹೋಗಿ ಬರುತ್ತೇವೆ. ಆದರೆ ನಮಗೆ ಸಕಾಲಕ್ಕೆ ಬಸ್‌ಗಳು ಬರುತ್ತಿಲ್ಲ. ಇದರಿಂದ ತರಗತಿ, ಪರೀಕ್ಷೆಗಳಿಗೆ ಹಾಜರಾಗಲು ಸಮಸ್ಯೆಯಾಗುತ್ತಿದೆ ಎಂದು ಅಧಿಕಾರಿಗಳ ಮುಂದೆ ತಮ್ಮ ಅಳಲು ತೋಡಿಕೊಂಡರು.ಸಾಮಾಜಿಕ ಕಾರ್ಯಕರ್ತ ಪ್ರಶಾಂತ ತೋಡ್ಕರ ಮಾತನಾಡಿ, ಇದೊಂದೇ ಮಾರ್ಗದ ಸಮಸ್ಯೆಯಲ್ಲ. ಜನ ನಿತ್ಯ ಐನಾಪುರ ಮಾರ್ಗದಲ್ಲಿ ತಂಗಡಿ, ಶಿನಾಳ, ಹುಲಗಬಾಳಿ ಗ್ರಾಮಗಳಿಗೆ ಮತ್ತು ಖಿಳೇಗಾವಿ ಮಾರ್ಗದಲ್ಲಿನ ಪಾರ್ಥನಹಳ್ಳಿ, ಗುಂಡಿವಾಡಿ, ಬಳ್ಳಿಗೇರಿ ಮತ್ತು ಮಲಬಾದ ಅನಂತಪುರ, ಕೊಟ್ಟಲಗಿ ಮಾರ್ಗದಲ್ಲಿನ ಯಂಕಂಚಿ, ಎಲಡಗಿ, ಅಡಹಳ್ಳಿ, ಕೋಹಳ್ಳಿ, ಐಗಳಿ, ಅರಟಾಳ ಮತ್ತು ಬಾಡಗಿ ಗ್ರಾಮಗಳಿಗೆ, ಶಿರಹಟ್ಟಿ ಮಾರ್ಗದಲ್ಲಿನ ಗ್ರಾಮಗಳಿಗೆ ಸಾರಿಗೆ ಬಸ್‌ ಕೊರತೆ ಇದೆ. ಹೀಗಾಗಿ ವಿದ್ಯಾರ್ಥಿಗಳು ವಿದ್ಯಾರ್ಥಿಗಳು ಸಕಾಲಕ್ಕೆ ಶಾಲಾ-ಕಾಲೇಜಿಗೆ ಹೋಗದೆ ಸಮಸ್ಯೆ ಎದುರಿಸುವಂತಾಗಿದೆ. ಕೂಡಲೇ ಅಧಿಕಾರಿಗಳು ಸಮಸ್ಯೆಗೆ ಸ್ಪಂದಿಸಬೇಕು ಎಂದು ಆಗ್ರಹಿಸಿದರು.ಅಥಣಿ ಸಾರಿಗೆ ಘಟಕದಲ್ಲಿ ಸಾರಿಗೆ ಬಸ್‌ಗಳ ಕೊರತೆ ಇದ್ದು, ಹುಬ್ಬಳ್ಳಿ ಸಾರಿಗೆ ನಿಗಮದ ಅಧ್ಯಕ್ಷರು ಹಾಗೂ ಕಾಗವಾಡ ಮತಕ್ಷೇತ್ರದ ಶಾಸಕರಾಗಿರುವ ರಾಜು ಕಾಗೆಯವರು ಈ ಘಟಕಕ್ಕೆ ಹೆಚ್ಚುವರಿ ಬಸ್‌ಗಳನ್ನು ಒದಗಿಸಬೇಕು. ಘಟಕ ವ್ಯವಸ್ಥಾಪಕರು ಕೂಡ ಮೇಲಧಿಕಾರಿಗಳೊಂದಿಗೆ ಚರ್ಚಿಸಿ ಹೆಚ್ಚುವರಿ ಬಸ್‌ಗಳ ವ್ಯವಸ್ಥೆ ಮಾಡಬೇಕು.