ತಾಲೂಕಿನ ಡಿಗ್ಗಿ ಗ್ರಾಮದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸಬೇಕೆಂದು ಒತ್ತಾಯಿಸಿ ವಿವಿಧ ಬಡಾವಣೆಯ ಮಹಿಳೆಯರು, ಯುವಕರು ಗ್ರಾಮ ಪಂಚಾಯಿತಿ ಎದುರು ಖಾಲಿ ಕೊಡಗಳನ್ನು ಹಿಡಿದು ಪ್ರತಿಭಟನೆ ನಡೆಸಿದರು.
ಕನ್ನಡಪ್ರಭ ವಾರ್ತೆ ಕಮಲನಗರ
ತಾಲೂಕಿನ ಡಿಗ್ಗಿ ಗ್ರಾಮದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸಬೇಕೆಂದು ಒತ್ತಾಯಿಸಿ ವಿವಿಧ ಬಡಾವಣೆಯ ಮಹಿಳೆಯರು, ಯುವಕರು ಗ್ರಾಮ ಪಂಚಾಯಿತಿ ಎದುರು ಖಾಲಿ ಕೊಡಗಳನ್ನು ಹಿಡಿದು ಪ್ರತಿಭಟನೆ ನಡೆಸಿದರು.ಗ್ರಾಮದಲ್ಲಿ ಕಳೆದ 15 ದಿನಗಳಿಂದ ಕುಡಿಯುವ ನೀರಿನ ಸಮಸ್ಯೆ ಉಲ್ಬಣಿಸಿದ್ದು, ಈ ಕುರಿತು ಗ್ರಾಮ ಪಂಚಾಯಿತಿ, ತಾ.ಪಂ ಹಾಗೂ ಜಿ.ಪಂ ಅಧಿಕಾರಿಗಳಿಗೆ ಹಲವು ಬಾರಿ ಮನವಿ ಸಲ್ಲಿಸಿದರೂ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಕರವೇ ಗ್ರಾಮ ಘಟಕದ ಅಧ್ಯಕ್ಷ ಸಂಗಮನಾಥ ಬಿರಾದಾರ ದೂರಿದರು.
ಕೂಡಲೇ ಹೊಸ ಕೊಳವೆ ಬಾವಿ ಕೊರೆಯಿಸಿ ಶಾಶ್ವತವಾಗಿ ನೀರಿನ ಸಮಸ್ಯೆ ಬಗೆಹರಿಸಬೇಕು. ಒಂದು ವೇಳೆ 48 ಗಂಟೆ ಒಳಗಾಗಿ ನೀರಿನ ಸಮಸ್ಯೆ ಬಗೆಹರಿಸದಿದ್ದಲ್ಲಿ ಪಂಚಾಯಿತಿ ಎದುರು ಉಗ್ರ ಹೋರಾಟ ಮಾಡಲಾಗುವುದು ಎಂದು ಎಚ್ಚರಿಸಿದರು.ಸ್ಥಳಕ್ಕೆ ತಾ.ಪಂ ಇಒ ಹಣಮಂತರಾಯ ಕೌಟಗೆ ಭೇಟಿ ನೀಡಿ ಶೀಘ್ರವೇ ನೀರಿನ ಸಮಸ್ಯೆ ಬಗೆಹರಿಸಲಾಗುವುದು ಎಂದು ಭರವಸೆ ನೀಡಿದರು.
ಪ್ರತಿಭಟನೆಯಲ್ಲಿ ಗ್ರಾಪಂ ಮಾಜಿ ಸದಸ್ಯೆ ಸುಶಿಲಾಬಾಯಿ ಮೇತ್ರೆ, ಸಂತೋಷ ಕಾಂಬಳೆ, ಸಂದೀಪ ಗಾಯಕವಾಡ್, ವಿಜಯಕುಮಾರ ಬರ್ಗೆ, ನೀಲಮ್ಮಾ, ಶೋಭಾ ಮೇತ್ರೆ, ಕವಿತಾ ಸಂತೋಷ, ಲತಾ ಧನರಾಜ, ಚಂದ್ರಕಲಾ ಬಾಬುರಾವ, ಚಂದ್ರಕಲಾ ರಾಜಕುಮಾರ, ಪ್ರೇಮಿಲಾ ಮಾರುತಿ, ಫುಲಾಬಾಯಿ ಮಾಧವರಾವ, ಲಕ್ಷ್ಮೀಬಾಯಿ ಭೀಮರಾವ, ಸಪನಾ ವಿಶಾಲ, ನಿರ್ಮಲಾ ನರಸಿಂಗ, ಸಾಗರಬಾಯಿ ಬಾಲಾಜಿ, ಉಷಾ ಬಾಬುರಾವ ಸೇರಿದಂತೆ ಇನ್ನಿತರ ಮಹಿಳೆಯರು ಇದ್ದರು.