ಅನಾಥರಿಗೆ ಜಾತಿ ಪ್ರಮಾಣ ಒದಗಿಸಲು ರಾಮಾಂಜಿ ಆಗ್ರಹ

ಕನ್ನಡಪ್ರಭ ವಾರ್ತೆ ಉಡುಪಿಅನಾಥ ಮಕ್ಕಳಿಗೂ ಜಾತಿ ಪ್ರಮಾಣ ಪತ್ರ ನೀಡಲು ಅನುಕೂಲವಾಗುವಂತಹ ಕಾನೂನಾತ್ಮಕ ಕ್ರಮ ಕೈಗೊಳ್ಳುವಂತೆ ಸರ್ಕಾರವನ್ನು ಆಗ್ರಹಿಸಿ, ಅನಾಥರ ಪ್ರತಿನಿಧಿಯಾಗಿ ‘ಕುಂದಾಪುರ ನಮ್ಮಭೂಮಿ’ಯ ರಾಮಾಂಜಿ ಅವರು ಕರ್ನಾಟಕ ಹಿಂದುಳಿದ ವರ್ಗಗಳ ಶಾಶ್ವತ ಆಯೋಗದ ನಿಕಟಪೂರ್ವ ಅಧ್ಯಕ್ಷ ಕೆ. ಜಯಪ್ರಕಾಶ್ ಹೆಗ್ಡೆ ಅವರ ಮೂಲಕ ಮನವಿ ಸಲ್ಲಿಸಿದರು.ಸಮಾಜದಲ್ಲಿ ಅನಾಥರಾಗಿರುವ ಸಾಕಷ್ಟು ಮಂದಿ ಮಕ್ಕಳು ಜಾತಿ ವಿಷಯದಲ್ಲಿ ಗಂಭೀರ ಸಮಸ್ಯೆ ಎದುರಿಸುತ್ತಿದ್ದಾರೆ. ರಾಜ್ಯದಲ್ಲಿ ಜಾತಿ ಮತ್ತು ಆದಾಯ ದೃಢೀಕರಣ ಪತ್ರವನ್ನು ಜಂಟಿಯಾಗಿ ನೀಡಲಾಗುತ್ತದೆ. ಶಿಕ್ಷಣ, ಉದ್ಯೋಗ ಸಹಿತ ಹಲವಾರು ಅಗತ್ಯಗಳಿಗೆ ಜಾತಿ ಪ್ರಮಾಣ ಪತ್ರ ಅತ್ಯಗತ್ಯವಾಗಿದೆ. ಅನಾಥ ಮಕ್ಕಳು ಶಿಕ್ಷಣ, ಉದ್ಯೋಗಕ್ಕಾಗಿ ಜಾತಿ ಪ್ರಮಾಣ ಪತ್ರಕ್ಕೆ ಅರ್ಜಿ ಸಲ್ಲಿಸಿದರೆ, ತಹಸೀಲ್ದಾರ್ ಅಥವಾ ಇತರ ಅಧಿಕಾರಿಗಳು ಜಾತಿಯನ್ನು ದೃಢಪಡಿಸುವ ದಾಖಲೆ ಕೇಳುತ್ತಾರೆ. ಆದರೆ ಅನಾಥ ಮಕ್ಕಳಿಗೆ ತಮ್ಮ ಹುಟ್ಟಿದ ಮೂಲವೇ ಗೊತ್ತಿಲ್ಲದಿರುವಾಗ ತಮ್ಮ ಜಾತಿಯ ಪರಿಕಲ್ಪನೆಯೂ ಅವರಿಗಿಲ್ಲದಿರುವಾಗ ದಾಖಲೆಗಳನ್ನು ಎಲ್ಲಿಂದ ಒದಗಿಸಬೇಕು ಎಂದವರು ಮನವಿಯಲ್ಲಿ ಹೇಳಿದ್ದಾರೆ.