ತಾತ್ಕಾಲಿಕ ಶೆಡ್‌ ತೆರಳಲು ನಿರಾಶ್ರಿತರ ನಕಾರ

ವಿಶ್ವನಾಥ ಮುನವಳ್ಳಿ

ಘಟಪ್ರಭಾ ನದಿ ಪ್ರವಾಹದಿಂದ ತಾಲೂಕಿನ ಅನೇಕ ಗ್ರಾಮಗಳಲ್ಲಿ ಪ್ರವಾಹ ತಗ್ಗಿದೆ ನಿಜ. ಆದ್ರೆ, ಈ ಮೊದಲು ವಾಸಿಸುತ್ತಿದ್ದ ತಾತ್ಕಾಲಿಕ ಶೆಡ್‌ಗಳಿಗೆ ವಾಪಸ್ ಹೋಗಲು ಸಾಕಷ್ಟು ತೊಂದರೆಯಾಗಿದೆ ಎಂದು ನಿರಾಶ್ರಿತರು ಸಂಕಟ ಅನುಭವಿಸುತ್ತಿದ್ದಾರೆ. ಶೆಡ್‌ಗಳಲ್ಲಿ ನೀರು ನಿಂತು, ನೆಲವೆಲ್ಲ ಸಂಪೂರ್ಣ ಒದ್ದೆಯಾಗಿದೆ. ಶೆಡ್‌ನಲ್ಲಿ ಇರುವುದು ಅಸಾಧ್ಯ, ಶೆಡ್‌ಗಳಲ್ಲಿ ವಿಷ ಜಂತುಗಳು ವಾಸವಾಗುತ್ತಿವೆ. ಅವುಗಳಿಂದ ಅಪಾಯವೇ ಹೆಚ್ಚು. ಇಂತಹ ಪರಿಸ್ಥಿತಿಯಲ್ಲಿ ನಾವು ಹೇಗೆ ವಾಸಮಾಡಬೇಕೆಂದು ತಿಳಿದು ಕಾಳಜಿ ಕೇಂದ್ರದಲ್ಲಿಯೇ ಇದ್ದೇವೆ ಎಂದು ಮುಧೋಳ ಕಲ್ಮೇಶ್ವರ ಎಂ.ಕೆ.ಬಿ.ಎಸ್ ಶಾಲೆಯ ಕಾಳಜಿ ಕೇಂದ್ರದಲ್ಲಿರುವ ಕುಂಬಾರ ಗಲ್ಲಿಯ ನಿವಾಸಿಗಳಾದ ಸುಶೀಲವ್ವ ಪಟ್ಟದ, ಸವಿತಾ ದರೂರ, ಸುಮಿತ್ರಾ ಗಸ್ತಿ, ರೇಖಾ ಕುಂದರಗಿ, ಶೋಭಾ ಸಾರವಾಡ, ಸುಜಾತಾ ತೇಲಿ, ಬೋರಮ್ಮ ಪಟ್ಟದ ಸೇರಿದಂತೆ ಮಹಿಳೆಯರು ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ.

ಪ್ರವಾಹ ಪರಿಸ್ಥಿತಿ ವೀಕ್ಷಿಸಲು ಮಂತ್ರಿಗಳು ಹಾಗೂ ಅಧಿಕಾರಿಗಳು ಬರುತ್ತಾರೆ, ನಮ್ಮನ್ನು ಮಾತನಾಡಿಸುತ್ತಾರೆ. ಪ್ರಚಾರ ಪಡೆದುಕೊಂಡು ತೆರಳುತ್ತಾರೆ, ಆದ್ರೆ ನಮ್ಮ ಕಷ್ಟಕ್ಕೆ ಯಾರೂ ಈವರೆಗೂ ಸ್ಪಂದಿಸುತ್ತಿಲ್ಲ. ಕಳೇದ ನಾಲ್ಕೈದು ದಿನಗಳ ಹಿಂದೆ ರಾಜ್ಯದ ಕಂದಾಯ ಸಚಿವರು, ಕ್ಷೇತ್ರದ ಶಾಸಕರು ಹಾಗೂ ಜಿಲ್ಲಾ ಮತ್ತು ತಾಲೂಕಾ ಮಟ್ಟದ ಅಧಿಕಾರಿಗಳು ಬಂದು ಭರಪೂರ ಭರವಸೆಯ ಸುರಿಮಳೆಯನ್ನೇ ಸುರಿಸಿದರು. ಆದ್ರೆ ಅವರ ಭರವಸೆಗಳ ಮಾತುಗಳ ಮೇಲೆ ನಮಗೆ ವಿಶ್ವಾಸವಿಲ್ಲವೆಂದು ಪರಿಸ್ಥಿತಿಯನ್ನು ನೈಜ ಪರಿಸ್ಥಿತಿಯನ್ನು ತೆರೆದಿಟ್ಟರು.

---------------------------------------------

ಸಾಹೇಬ್ರ ನಾವು ಹೇಗೆ ಇದ್ದೀವಿ ಎಂಬುದನ್ನು ತಾವೇ ಕಣ್ಣಾರೆ ಕಂಡಿದ್ದೀರಿ, ಈ ನೋವು, ಕಷ್ಟ ಇನ್ನಾರಿಗೂ ಬರಬಾರದು. ಸರ್ಕಾರ ಸಾಕಷ್ಟು ಉಚಿತ ಯೋಜನೆ ನೀಡಿದೆ. ಆದ್ರೆ ನಮಗೆ ಶಾಶ್ವತ ಸೂರು ಕೊಡುತ್ತಿಲ್ಲ. ನಮಗಂತೂ ಮುಂದೇನು ಅಂತ ತಿಳಿಯುತ್ತಲೇ ಇಲ್ಲ.

----------------------------------------

ಏನ ಮಾಡುದು ಬಿಡ್ರಿ,ನಾವು ಇಷ್ಟೇ ಬೇಡಕೊಂಡ ಬಂದಿದ್ದೀವಿ, ನಮ್ಮ ಹಣೆಬರಹದಾಗ ಅಷ್ಟ ಐತಿ,

ಸವಿತಾ ದರೂರ, ನೊಂದ ಸಂತ್ರಸ್ಥೆ