ರಸ್ತೆ ಅಗಲೀಕರಣಕ್ಕೆ ಮರ ಕಟಾವು ಮಾಡದಂತೆ ಮನವಿ

ಯಲ್ಲಾಪುರ: ಕೈಗಾ-ಬಾರೆ ಘಟ್ಟದಲ್ಲಿ ರಸ್ತೆ ಅಗಲೀಕರಣಕ್ಕಾಗಿ ಸಾವಿರಾರು ಮರ ಕಟಾವು ಕಾಮಗಾರಿಯನ್ನು ನಿಲ್ಲಿಸಬೇಕು. ಭಾರೀ ಭೂಕುಸಿತ ಸೂಕ್ಷ್ಮ ಪ್ರದೇಶಗಳ ಕಾಳಿ ಕಣಿವೆ ಇದಾಗಿದೆ. ವ್ಯಾಪಕ ಮಳೆ ಬೀಳುವ ಬಾರೆ ಘಟ್ಟದಲ್ಲಿ ಈಗಿರುವ ರಸ್ತೆ ಅಭಿವೃದ್ಧಿ ಮಾಡಿ, ಅಗಲೀಕರಣ ಕೈಬಿಡಿ ಎಂದು ವೃಕ್ಷಲಕ್ಷ ಆಂದೋಲನ, ಪರಿಸರ, ರೈತ ಕಿಸಾನ್, ವನವಾಸಿ ಸಂಘಟನೆ ವತಿಯಿಂದ ರಾಜ್ಯ ಅರಣ್ಯ ಸಚಿವರು ಮತ್ತು ಪಿಸಿಸಿಎಫ್ ಅವರಿಗೆ ಮನವಿ ಸಲ್ಲಿಸಲಾಗಿದೆ.ವೃಕ್ಷಲಕ್ಷ ಆಂದೋಲನದ ಅಧ್ಯಕ್ಷ ಅನಂತ ಹೆಗಡೆ ಅಶೀಸರ ನೇತೃತ್ವದಲ್ಲಿ ಇಲ್ಲಿಯ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಕಛೇರಿ ಮೂಲಕ ಅರಣ್ಯ ಇಲಾಖೆ ಸಚಿವರಿಗೆ ಮನವಿ ಪತ್ರ ನೀಡಲಾಯಿತು.

ಗೋವಾ ಬೃಹತ್ ತಂತಿ ಮಾರ್ಗ ನಿರ್ಮಾಣಕ್ಕೆ (ಮಹದಾಯಿ ಅರಣ್ಯ) ಅರಣ್ಯ ಸಚಿವರು ತಡೆ ನೀಡಿದ್ದನ್ನು ಪರಿಸರ ಸಂಘಟನೆಗಳು ಅಭಿನಂದಿಸಿದೆ. ಯಲ್ಲಾಪುರಕ್ಕೆ-ಬಾರೆ ಘಟ್ಟಕ್ಕೆ ಭೇಟಿ ನೀಡಿ ಎಂದು ಅರಣ್ಯ ಪರಿಸರ ಸಚಿವರಾದ ಈಶ್ವರ ಖಂಡ್ರೆ ಅವರಿಗೆ ವೃಕ್ಷ ಆಂದೋಲನದ ಅಧ್ಯಕ್ಷ ಅನಂತ ಹೆಗಡೆ ಅಶೀಸರ, ಸಂಚಾಲಕ ನರಸಿಂಹ ಸಾತೊಡ್ಡಿ ಜಂಟಿಯಾಗಿ ಮನವಿ ಮಾಡಿದ್ದಾರೆ.

ಪರಿಸರ ಕಾರ್ಯಕರ್ತರ ಮನವಿಯಂತೆ ಮಳೆಗಾಲದಲ್ಲಿ ಮರ ಕಟಾವು ಕಾಮಗಾರಿಗೆ ತಡೆ ನೀಡಿದ್ದೀರಿ. ಆದರೆ ಮುಂದೆಯೂ ಪುನಃ ಕಟಾವು ಮಾಡದಂತೆ ಶಾಶ್ವತವಾಗಿ ಇದಕ್ಕೆ ತಡೆ ನೀಡಬೇಕು ಎಂದು ಮನವಿಯಲ್ಲಿ ಆಗ್ರಹ ಮಾಡಿದೆ.