ಕೆಲಸಕ್ಕೆ ವೇಗ ನೀಡಿ ಜನರ ಅಲೆದಾಟ ತಪ್ಪಿಸಿ: ಕೆ.ನೇಮರಾಜನಾಯ್ಕ

ಕಂದಾಯ ದಿನಾಚರಣೆ ಸಮಾರಂಭ ಉದ್ಘಾಟಿಸಿದ ಶಾಸಕ

ತಾಲೂಕಿನ ಕಂದಾಯ ಇಲಾಖೆಯಲ್ಲಿನ ಹಲವಾರು ಸೇವೆಗಳನ್ನು ಜನತೆಗೆ ತಡವಿಲ್ಲದೇ ತಲುಪಿಸಲು ಗ್ರಾಮ ಸಹಾಯಕರಿಂದ ತಹಸೀಲ್ದಾರರವರೆಗಿನ ಎಲ್ಲ ಸಿಬ್ಬಂದಿ ಕೆಲಸಕ್ಕೆ ವೇಗ ನೀಡಬೇಕು ಶಾಸಕ ಕೆ.ನೇಮರಾಜನಾಯ್ಕ ಹೇಳಿದರು.

ಕೂಡ್ಲಿಗಿಯಿಂದ ತಾಲೂಕು ಪ್ರತ್ಯೇಕಗೊಂಡ ನಂತರ ಈ ಭಾಗದ ಕಂದಾಯ ಸೇವೆಗಳಲ್ಲಿ ವ್ಯತಯವಾಗುತ್ತಿರುವುದು ಗಮನಕ್ಕೆ ಬಂದಿದೆ. ಕಚೇರಿಗೆ ಬರುವ ಜನರನ್ನು ಕೂರಿಸಿ ಸಮಾಧಾನದಿಂದ ಮಾತನಾಡಿಸಿ ಹೆಚ್ಚು ಅಲೆದಾಡಿಸದೇ ಅವರ ಕೆಲಸಗಳನ್ನು ಸಿಬ್ಬಂದಿ ತಡವಿಲ್ಲದೇ ಮಾಡಿಕೊಂಡಬೇಕು. ಇದಕ್ಕಾಗಿ ಗ್ರಾಮ ಸಹಾಯಕರು, ವಿಎ, ಆರ್‌ಐ, ಶಿರಸ್ತೇದಾರ, ಉಪ ತಹಸೀಲ್ದಾರ್ ಹಾಗೂ ತಹಸೀಲ್ದಾರರು ಒಟ್ಟಾಗಿ ಕೆಲಸ ನಿರ್ವಹಿಸಬೇಕು ಎಂದರು.

ತಹಸೀಲ್ದಾರ ಜಿ.ಕೆ. ಅಮರೇಶ ಮಾತನಾಡಿ, ತಾಲೂಕಿನಲ್ಲಿ ಕಂದಾಯ ಇಲಾಖೆಯ ಎಲ್ಲ ದಾಖಲೆಗಳ ಡಿಜಿಟಿಲೀಕರಣ ಕಾರ್ಯ ಪ್ರಗತಿಯಲ್ಲಿದೆ. ಈಗಾಗಲೆ 7.23 ಲಕ್ಷ ಪ್ರತಿಗಳು ಶಿರಸ್ತೇದಾರರ ಸಹಿಯೊಂದಿಗೆ ಡಿಜಿಟಲ್ ಆಗಿದ್ದು, ಜನರು ನೇರವಾಗಿ ಪ್ರತಿ ಪಡೆಯಬಹುದಾಗಿದೆ. ಕಂದಾಯ ಇಲಾಖೆಯ ಗ್ರಾಮ ಲೆಕ್ಕಾಧಿಕಾರಿಗಳಿಗೆ ಲ್ಯಾಪ್ ಟಾಪ್ ವಿತರಣೆ ಮಾಡಿರುವುದರಿಂದ ಕೆಲಸಕ್ಕೆ ವೇಗ ಸಿಗಲಿದೆ. ತಾಲೂಕಿನಾದ್ಯಂತ ನಮ್ಮ ಇಲಾಖೆಯ ಸಿಬ್ಬಂದಿಯವರು ಜನತೆಗೆ ಸೂಕ್ತವಾಗಿ ಸ್ಪಂದಿಸಿ ಕೆಲಸ ಮಾಡುತ್ತಿದ್ದಾರೆ ಎಂದರು.

ಇದೇ ವೇಳೆ ಗ್ರಾಮ ಲೆಕ್ಕಾಧಿಕಾರಿಗಳಿಗೆ ಸರ್ಕಾರ ನೀಡಿರುವ ಲ್ಯಾಪ್‌ಟಾಪ್‌ಗಳನ್ನು 14 ಗ್ರಾಮ ಲೆಕ್ಕಾಧಿಕಾರಿಗಳಿಗೆ ಹಾಗೂ ಫಲಾನುಭವಿಗಳಿಗೆ ಡಿಜಿಟಲ್ ದಾಖಲೆಗಳನ್ನು ಶಾಸಕರು ವಿತರಿಸಿದರು.