ಮಳೆಗೆ ಹದಗೆಟ್ಟ ರಸ್ತೆ, ಸಾರ್ವಜನಿಕರ ಸಂಚಾರಕ್ಕೆ ತೊಂದರೆ

ಶರಣು ಸೊಲಗಿ ಮುಂಡರಗಿ

ತಾಲೂಕಿನ ರಾಮೇನಹಳ್ಳಿ-ನಾಗರಹಳ್ಳಿ ರಸ್ತೆ, ಹೆಸರೂರು ರಸ್ತೆ, ಕಕ್ಕೂರು ತಾಂಡಾ-ಕಕ್ಕೂರು ರಸ್ತೆ, ಮುಂಡರಗಿ ಘಟ್ಟಿರಡ್ಡಿಹಾಳ, ಕಲಕೇರಿ-ಬಿಡನಾಳ-ಗಂಗಾಪುರ ರಸ್ತೆ, ಕಲಕೇರಿ-ಮುಷ್ಠಿಕೊಪ್ಪ ರಸ್ತೆ, ಹಮ್ಮಿಗಿ- ಗುಮ್ಮಗೋಳ ರಸ್ತೆ, ಬಾಗೇವಾಡಿ-ಜಾಲವಾಡಗಿ ರಸ್ತೆ, ಜಾಲವಾಗಿ-ಮುಂಡವಾಡ-ಬಿದರಹಳ್ಳಿ ರಸ್ತೆ, ಗಂಗಾಪುರ-ಶೀರನಹಳ್ಳಿ-ಸಿಂಗಟಾಲೂರು ರಸ್ತೆ ಸೇರಿದಂತೆ ವಿವಿಧೆಡೆಗಳಲ್ಲಿ ಎಲ್ಲೆಂದರಲ್ಲಿ ದೊಡ್ಡ ದೊಡ್ಡ ತಗ್ಗುಗಳು ಬಿದ್ದಿವೆ. ಕೆಲವೆಡೆ ರಸ್ತೆ ಕಿತ್ತು ಹೋಗಿದೆ. ನಿತ್ಯ ಈ ರಸ್ತೆಯಲ್ಲಿ ಸಂಚರಿಸಲು ಸಾರ್ವಜನಿಕರು ಹರಸಾಹಸಪಡುತ್ತಿರುವುದು ಕಂಡು ಬರುತ್ತಿದೆ.

ಕಳೆದ ಒಂದೂವರೆ ವರ್ಷದಲ್ಲಿ ಯಾವುದೇ ರಸ್ತೆ ಕಾಮಗಾರಿಗಳು ನಡೆಯದಿರುವುದರಿಂದ ರಸ್ತೆಗಳು ಹೆಚ್ಚಿನ ಪ್ರಮಾಣದಲ್ಲಿ ಹದಗೆಟ್ಟು ಹೋಗಿವೆ. ಸಂಬಂಧಪಟ್ಟ ಇಲಾಖೆ ಈ ಕೂಡಲೇ ತಾಲೂಕಿನಲ್ಲಿ ಪ್ರಕೃತಿ ವಿಕೋಪಕ್ಕೆ ಹಾಳಾದ ರಸ್ತೆಗಳ ಮಾಹಿತಿ ನೀಡುವ ಮೂಲಕ ರಸ್ತೆ ನಿರ್ಮಾಣ ಹಾಗೂ ಸಣ್ಣಪುಟ್ಟ ಹಾಳಾದಲ್ಲಿ ರಸ್ತೆಗಳ ರಿಪೇರಿಗೆ ಅನುದಾನ ನೀಡುವಂತೆ ಸರ್ಕಾರಕ್ಕೆ ಒತ್ತಾಯಿಸುವ ಮೂಲಕ ತಾಲೂಕಿನ ಎಲ್ಲ ಗ್ರಾಮಗಳ ಜನತೆ ಸುಗಮವಾಗಿ ಬಸ್‌ ಹಾಗೂ ವೈಯಕ್ತಿಕ ವಾಹನಗಳ ಮೂಲಕ ಸಂಚಾರ ಮಾಡಲು ಅನುಕೂಲ ಮಾಡಿಕೊಡಬೇಕೆಂದು ಒತ್ತಾಯಿಸಿದ್ದಾರೆ.

ಸರ್ಕಾರ ಈಗಾಗಲೇ ಮುಂಡರಗಿ ತಾಲೂಕಿನ ಬಹುತೇಕ ಹಾಳಾದ ರಸ್ತೆಗಳ ವಾರ್ಷಿಕ ನಿರ್ವಹಣೆಗಾಗಿ ಹಣ ಬಿಡುಗಡೆ ಮಾಡಿದೆ. 6 ಪ್ಯಾಕೇಜ್‌ಗಳ ಮೂಲಕ ಕಾಮಗಾರಿ ಪ್ರಾರಂಭಿಸಲಾಗಿದೆ. ಈಗಾಗಲೇ ಜಂಗಲ್ ಕಟಿಂಗ್ ಪ್ರಾರಂಭಿಸಿದ್ದು, ಮಳೆ ಕಡಿಮೆಯಾದ ತಕ್ಷಣವೇ ಹೊಂಡ ಮುಚ್ಚುವ ಕಾಮಗಾರಿ ಪ್ರಾರಂಭಿಸಲಾಗುವುದು ಎಂದು ಎಇಇ, ಲೋಕೋಪಯೋಗಿ ಇಲಾಖೆ ಬಸವರಾಜ್ ಎಚ್, ಹೇಳಿದರು.