ರಡ್ಡಿ ಸಮಾಜ ದಾನ, ಧರ್ಮ ಕಾರ್ಯದಲ್ಲಿ ಮುಂಚೂಣಿ: ಎಸ್.ಆರ್. ಪಾಟೀಲ

ನರಗುಂದ: ರಡ್ಡಿ ಸಮಾಜದವರು ಹಿಂದಿನಿಂದಲು ದಾನ, ಧರ್ಮ, ಸಾಮಾಜಿಕ ಕಾರ್ಯಗಳನ್ನು ಮಾಡುವುದರಲ್ಲಿ ದೊಡ್ಡ ಗುಣದವರಾಗಿದ್ದಾರೆ. ನಾಯಕತ್ವ ಗುಣ ರಡ್ಡಿ ಸಮಾಜದವರಿಗೆ ರಕ್ತಗತವಾಗಿ ಬಂದಿದೆ ಎಂದು ಮಾಜಿ ಸಚಿವ ಎಸ್.ಆರ್. ಪಾಟೀಲ ತಿಳಿಸಿದರು.

ರಡ್ಡಿ ಸಮಾಜದವರು ಸ್ಥಿತಿವಂತರಾಗಿರಬೇಕೆಂದು ಮಹಾಸಾಧ್ವಿ ಶಿವಶರಣೆ ಹೇಮರಡ್ಡಿ ಮಲಮ್ಮವನವರು ಶ್ರೀಶೈಲ ಮಲ್ಲಿಕಾರ್ಜುನ ದೇವರಿಂದ ಆಶೀರ್ವಾದ ಪಡೆದುಕೊಂಡಿದ್ದಾರೆ. ಹೀಗಾಗಿ ಸಮಾಜದವರು ಸಮಾಜದಲ್ಲಿ ಸ್ಥಿತಿವಂತರಾಗಿದ್ದಾರೆ. ರಡ್ಡಿ ಸಮಾಜದವರು ದಾನ, ಧರ್ಮ, ಸಾಮಾಜಿಕ ಕಾರ್ಯಗಳಲ್ಲಿ ಸಹಾಯ ಮಾಡುವುದರಲ್ಲಿ ಹಿಂದೆ ಮುಂದೆ ನೋಡುವುದಿಲ್ಲವೆಂದರು. ಉಪನ್ಯಾಸಕಿ ಡಾ. ವಿಜಯಲಕ್ಷ್ಮೀ ದಾನರಡ್ಡಿ ಮಾತನಾಡಿ, ಜೀವನಮೌಲ್ಯಗಳನ್ನು ಮರೆಯದೇ ಬದುಕು ಸಾಗಿಸಬೇಕು. ಮೊಬೈಲ್ ಯುಗದಲ್ಲಿ ಭಾರತೀಯ ಸಂಸ್ಕೃತಿಯನ್ನು ಮರೆಯುತ್ತಿದ್ದೇವೆ. ಮುಂದಿನ ಪೀಳಿಗೆಗಾಗಿ ಸಂಸ್ಕೃತಿಯನ್ನು ಉಳಿಸಲು ಜಯಂತಿಗಳು ನಮ್ಮನ್ನು ಜಾಗೃತಿಗೊಳಿಸಬೇಕು. ಅವಿಭಕ್ತ ಕುಟುಂಬ ವ್ಯವಸ್ಥೆಯಲ್ಲಿ ಜೀವನ ಮಾಡಬೇಕು. ಸ್ವಂತದ ಬದುಕಿಗೆ ಚಿಂತಿಸುವುದು ದುರಂತಮಯವಾಗಿದೆ. ಭಾರತ ಜಗತ್ತಿಗೆ ಗುರುವಾಗಬೇಕು. ಕೇವಲ ಶ್ರೀಮಂತಿಕೆಯಲ್ಲಿ ಕಾಲ ಕಳೆಯದೇ, ದೇಶ ಮತ್ತು ಸಮಾಜವನ್ನು ಸುರಕ್ಷಿತವಾಗಿಡುವಲ್ಲಿ ರಡ್ಡಿ ಸಮಾಜದವರು ಸದಾ ಒಗ್ಗಟ್ಟಾಗಿರಬೇಕು ಎಂದರು.ಮಾಜಿ ಶಾಸಕ ಬಿ.ಆರ್. ಯಾವಗಲ್ಲ ಮಾತನಾಡಿ, ಸಮಾಜದ ಅಸ್ತಿತ್ವ ಉಳಿಸಲು ಬದಲಾಗಬೇಕು. ಸಮಾಜದಲ್ಲಿ ಒಳ್ಳೆಯ ಕೆಲಸ, ಕಾರ್ಯಗಳನ್ನು ಮಾಡಲು ಸರ್ವರೊಂದಿಗೂ ಹೊಂದಿಕೊಂಡು ಹೋಗಬೇಕು ಎಂದರು.ಪಂಚಗೃಹ ಗುಡ್ಡದ ಹಿರೇಮಠದ ಸಿದ್ಧಲಿಂಗ ಶ್ರೀಗಳು, ಪತ್ರೀವನ ಮಠದ ಗುರು ಸಿದ್ಧವೀರ ಶಿವಾಚಾರ್ಯ ಶ್ರೀಗಳು ಆರ್ಶೀವಚನ ನೀಡಿದರು.