ತ್ಯಾಗರ್ತಿ: ಒಂದು ವರ್ಷದಿಂದ ನೆಡೆಯುತ್ತಿದೆ 1ಕಿ.ಮೀ ಮಾದರಿ ರಸ್ತೆ ಕಾಮಗಾರಿ

ತ್ಯಾಗರ್ತಿ: ಸಾಗರ ತಾಲೂಕಿನ ತ್ಯಾಗರ್ತಿಯ ಮುಖ್ಯ ರಸ್ತೆಗೆ 2022ರಲ್ಲಿ 3 ಕೋಟಿ ರು. ಅನುಮೋದನೆ ಪಡೆದು ಜನವರಿ 2023ರಂದು ಟೆಂಡರ್ ಪ್ರಕಟಣೆಗೊಂಡು ಮೇ 2024ರಂದು ಕಾಮಗಾರಿಗೆ ಚಾಲನೆ ನೀಡಲಾಗಿದ್ದು, ಇದುವರೆಗೂ ಪ್ರತಿನಿತ್ಯ ಕಾಮಗಾರಿ ನೆಡೆಯುತ್ತಿದೆ ಎಂದು ಧೂಳೆಬ್ಬಿಸುತ್ತಿದ್ದಾರೆ.

ಕಾಮಗಾರಿಯು ಉದ್ಘಾಟನೆಗೊಂಡು ಪ್ರಾರಂಭಗೊಳ್ಳುವಾಗ ವಿದ್ಯುತ್ ಕಂಬ ಅಡಚಣೆ ನೀಡುತ್ತಿದೆಯೆಂದು ನೆಪವೊಡ್ಡಿ ಕೆಲವು ತಿಂಗಳು ಕಳೆದು ನಂತರ ಮಳೆಗಾಲದಲ್ಲಿ ರಸ್ತೆ ಕಾಮಗಾರಿ ಮಾಡಲು ಸಾಧ್ಯವಿಲ್ಲವೆಂದು ಕಾಮಗಾರಿ ಮುಂದೂಡಿದರು. ನಂತರ ಅಕ್ಟೋಬರ್ 2024ರಂದು ಕಾಮಗಾರಿ ಪ್ರಾರಂಭಿಸಿ ಮೂಲ ರಸ್ತೆಯ ಅಕ್ಕಪಕ್ಕ ಅಗಲೀಕರಣಗೊಳಿಸಲು ಜೆಸಿಬಿ ಮುಖಾಂತರ ಕೆಲಸ ಪ್ರಾರಂಭಿಸಿ 1 ಕಿ.ಮೀ. ರಸ್ತೆಯನ್ನು 3 ತಿಂಗಳಲ್ಲಿ ಸಿಮೆಂಟ್‍ಮಿಶ್ರಿತ ಜೆಲ್ಲಿಕಲ್ಲುಗಳಿಂದ ಅಗಲೀಕರಣಗೊಳಿಸಿದರು. ನಂತರ ತ್ಯಾಗರ್ತಿ ಜಾತ್ರೆಯ ಅಂಗವಾಗಿ ಕಾಮಗಾರಿ ನಿಲ್ಲಿಸಲಾಯಿತು. ಫೆಬ್ರವರಿ 2025ರಲ್ಲಿ ರಸ್ತೆಗೆ ಹೊಂದಿಕೊಂಡಿರುವ ಮೋರಿ ಕಾಮಗಾರಿಗಳನ್ನು ಪ್ರಾರಂಭಿಸಿ ತಿಂಗಳಿಗೊಂದರಂತೆ ಎರಡು ಮೋರಿ ಕಾಮಗಾರಿಗಳನ್ನು ಪೂರೈಸಿದ್ದಾರೆ. ರಸ್ತೆಯ ಎರಡೂ ಬದಿಯ ಚರಂಡಿ ಕಾಮಗಾರಿಯನ್ನು ನೆಡೆಸುತ್ತಿದ್ದು, ತಿಂಗಳುಗಳೇ ಕಳೆಯುತ್ತಿದೆ.

ಗುತ್ತಿಗೆದಾರರು 2 ತಿಂಗಳಿಗೊಮ್ಮೆ ಜನ ಕಳುಹಿಸಿ ರಸ್ತೆಯ ಧೂಳು ಗುಡಿಸಿ ನಾಳೆಯಿಂದ ಡಾಂಬರೀಕರಣ ಕೆಲಸ ಪ್ರಾರಂಭಿಸುವುದಾಗಿ ಹೇಳುತ್ತಾರೆಯೇ ಹೊರತು ನಾಳೆಯೆಂಬುದು ಇಂದಾಗುವ ಲಕ್ಷಣಗಳು ಗೋಚರಿಸುತ್ತಿಲ್ಲ.

- ಅನಿಲ್, ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ ಪಿಡಬ್ಲೂಡಿ ಸಾಗರ