ಸೈನಿಕ ಹುಳುವಿನ ಪಾಲಾದ ಸಜ್ಜೆ

ಎಂ. ಪ್ರಹ್ಲಾದ್ ಕನಕಗಿರಿ

ಹೌದು, ತಾಲೂಕಿನ ಹುಡೇಜಾಲಿ, ಚಿಕ್ಕಮಾದಿನಾಳ, ಓಬಳಬಂಡಿ, ರಾಮದುರ್ಗಾ, ಮುಸಲಾಪುರ, ರಾಂಪುರ, ನಾಗಲಾಪುರ, ಹಿರೇ ಮಾದಿನಾಳ ಸೋಮಸಾಗರ, ಕನಕಗಿರಿ ಸೇರಿದಂತೆ ಸುತ್ತಮುತ್ತಲಿನ ಹಲವು ಗ್ರಾಮಗಳಲ್ಲಿನ ರೈತರು ಬೆಳೆದ ಸಜ್ಜೆ ಬೆಳೆ ಸೈನಿಕ ಹುಳುವಿನ ಪಾಲಾಗುತ್ತಿದೆ.

ಅಧಿಕಾರಿಗಳ ಬಳಿ ಸಲಹೆ ಪಡೆದು ಕ್ರಿಮಿನಾಶಕ ಸಿಂಪಡಿಸಿದರೂ ಹುಳು ಬಾಧೆ ನಿಯಂತ್ರಣವಾಗಿಲ್ಲ. ಬೆಳಗಿನ ಜಾವ ಮತ್ತು ಸಂಜೆ ವೇಳೆ ತೆನೆಯಿಂದ ಬೀಜ ತಿಂದು ಹಾಕುತ್ತಿರುವುದರಿಂದ ಹುಳುವಿನ ನಿಯಂತ್ರಣ ಕಷ್ಟಸಾಧ್ಯವಾಗಿದೆ. ಹುಳುವಿನ ಬಾಧೆಯಿಂದ ರೈತ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದಾನೆ.

ಕನಕಗಿರಿ ತಾಲೂಕಿನಾದ್ಯಂತ ಸಜ್ಜೆ ಬೆಳೆಗೆ ಸೈನಿಕ ಹುಳು ಬಿದ್ದು ರೈತರಿಗೆ ನಷ್ಟವಾಗಿದೆ. ಪ್ರತಿ ತೆನೆಗೆ ೧೦ರಿಂದ ೧೫ ಹುಳು ಸೇರಿಕೊಂಡು ಕಾಳನ್ನು ಸಂಪೂರ್ಣವಾಗಿ ತಿನ್ನುತ್ತಿವೆ. ಸಂಬಂಧಪಟ್ಟ ಅಧಿಕಾರಿಗಳು ಹಾನಿಯಾದ ಪ್ರದೇಶ ಪರಿಶೀಲಿಸಿ ರೈತರಿಗೆ ಪರಿಹಾರ ನೀಡಬೇಕು ಎಂದು ರೈತ ಮುಖಂಡ ಕನಕಪ್ಪ ಮಮ್ಮಳಿ ತಿಳಿಸಿದ್ದಾರೆ.