ಅಸಲಿ ಎಂದು ನಂಬಿಸಿ, ನಕಲಿ ಚಿನ್ನ ಮಾರಾಟ: ಓರ್ವ ಬಂಧನ

ಕನ್ನಡಪ್ರಭ ವಾರ್ತೆ ಬೀರೂರು

ತಮಿಳುನಾಡಿನ ಮಧುರೈ ನಿವಾಸಿ ವೆಂಕಟೇಶನ್ ಎಂಬುವರಿಗೆ ಕರ್ನಾಟಕದ ರವಿ ಎಂಬಾತ ಫೋನ್ ಕರೆ ಮಾಡಿ ನಾನು ಜಮೀನಿನಲ್ಲಿ ಕೆಲಸ ಮಾಡುತ್ತಿದ್ದಾಗ ಹಲವಾರು ಚಿನ್ನದ ನಾಣ್ಯ ಸಿಕ್ಕಿವೆ, ಅದನ್ನು ಕಡಿಮೆ ಬೆಲೆಗೆ ಮಾರಾಟ ಮಾಡುತ್ತೇನೆಂದು ನಂಬಿಸಿ ಜೂ.7ರಂದು ಅವರನ್ನು ಬೀರೂರಿನ ಠಾಣಾ ಸರಹದ್ದಿಗೆ ಕರೆಸಿಕೊಂಡು ಒಂದು ಅಸಲಿ ಚಿನ್ನದ ನಾಣ್ಯ ಸ್ಯಾಂಪಲ್‌ಗೆ ಕೊಟ್ಟು ಕಳುಹಿಸಿರುತ್ತಾನೆ. ಇದನ್ನು ಪರಿಶೀಲಿಸಿ ವೆಂಕಟೇಶನ್ ಅಸಲಿ ಎಂದು ತಿಳಿದ ಮೇಲೆ ಆ.29ರಂದು ₹2 ಲಕ್ಷವನ್ನು ಅವರ ಸ್ನೇಹಿತರ ಬಳಿ ಸಾಲ ಮಾಡಿ ಹೊಂದಿಸಿಕೊಂಡು ಪುನಃ ಬೀರೂರಿಗೆ ಬಂದು ರವಿಗೆ ಹಣ ನೀಡಿದ್ದಾನೆ. ರವಿಯು ಸುಮಾರು 200ಗ್ರಾಂ ನಷ್ಟು ನಕಲಿ ಚಿನ್ನದ ನಾಣ್ಯ ನೀಡಿದ್ದು, ನಂತರದಲ್ಲಿ ಪರಿಶೀಲಿಸಿದಾಗ ಆತನಿಂದ ಮೋಸ ಹೋಗಿರುವ ವಿಚಾರ ತಿಳಿದು ಆ.30ರಂದು ಬೀರೂರು ಪೊಲೀಸ್ ಠಾಣೆಗೆ ವೆಂಕಟೇಶನ್ ಬಂದು ದೂರು ನೀಡಿದ್ದು, ಅದರಂತೆ ಬೀರೂರು ಪೊಲೀಸ್ ಠಾಣಾ ಮೊ.ನಂ 109/2024 ಕಲಂ 318 (2) 318 (4) ಬಿ.ಎನ್.ಎಸ್. ರೀತ್ಯಾ ಪ್ರಕರಣ ದಾಖಲಾಗಿರುತ್ತದೆ.