ಎಸ್ಸಿ, ಎಸ್ಟಿ ರೇಷ್ಮೆ ಬೆಳೆಗಾರರ ಆಸೆಗೆ ಎಳ್ಳುನೀರು!

ಖಾಜು ಸಿಂಗೆಗೋಳ

ನೀರು ಹಾಗೂ ಸಿಬ್ಬಂದಿ ಕೊರತೆಯಿಂದ ಹಾಗೂ ನಿರ್ವಹಣೆ ಇಲ್ಲದೇ ಮೂರುವರೆ ದಶಕಗಳ ಹಿಂದಿನ ರೇಷ್ಮೆ ಬೆಳೆಗಾರರ ಸಮುದಾಯದ ಅಭಿವೃದ್ಧಿ ಕೇಂದ್ರ ಪಾಳು ಬಿದ್ದಿದ್ದು, ರೇಷ್ಮೆ ಬೆಳೆಯುವ ಎಸ್ಸಿ, ಎಸ್ಟಿ ರೈತರ ಆಸೆಗೆ ಎಳ್ಳುನೀರು ಬಿಟ್ಟಂತಾಗಿದೆ.1985ರಲ್ಲಿ ರೇಷ್ಮೆ ಇಲಾಖೆಯಿಂದ 5 ಎಕರೆ ಜಮೀನಿನಲ್ಲಿ ₹10 ಲಕ್ಷ ವೆಚ್ಚದಲ್ಲಿ 39 ವರ್ಷಗಳ ಹಿಂದೆ ವಿಜಯಪುರ ಜಿಲ್ಲೆಯ ಇಂಡಿ ತಾಲೂಕಿನ ಮಾವಿನಹಳ್ಳಿ ಗ್ರಾಮದಲ್ಲಿ ಎಸ್ಸಿ, ಎಸ್ಟಿ ರೇಷ್ಮೆ ಬೆಳೆಯುವ ರೈತರಿಗೆ ರೇಷ್ಮೆ ಹುಳು ಸಾಕಲು, ಗೂಡು ಕಟ್ಟಲು, ರೇಷ್ಮೆ ತಯಾರಿಸುವ ಉದ್ದೇಶದಿಂದ ನಿರ್ಮಿಸಿದ ರೇಷ್ಮೆ ಬೆಳೆಗಾರರ ಸಮುದಾಯದ ಅಭಿವೃದ್ಧಿ ಕೇಂದ್ರ ಬಳಕೆ ಮಾಡಿಕೊಳ್ಳದೇ ಉಪಯೋಗಕ್ಕೆ ಬಾರದಂತಾಗಿದೆ. ಕಳೆದ ಒಂದೂವರೆ ದಶಕಗಳಿಂದ ನಿರ್ವಹಣೆಯೇ ಇಲ್ಲದೇ ಪಾಳು ಬಿದ್ದಿದೆ.ರೇಷ್ಮೆ ಇಲಾಖೆ ಅಧಿಕಾರಿಗಳ ಮಾಹಿತಿ ಪ್ರಕಾರ 1985ರಲ್ಲಿ ರೇಷ್ಮೆ ಇಲಾಖೆಯಲ್ಲಿ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಸಾಕಷ್ಟಿತ್ತು. ಅಂದು ಈ ಯೋಜನೆ ಆರಂಭಗೊಳಿಸಿದ್ದಾರೆ. ಅಂದು ಕರ್ತವ್ಯ ನಿರ್ವಹಿಸುತ್ತಿದ್ದ ಅಧಿಕಾರಿಗಳು ಹಾಗೂ ಸಿಬ್ಬಂದಿ ನಿವೃತ್ತಿ ಹೊಂದಿದ ಮೇಲೆ ಪುನಃ ಅಧಿಕಾರಿ ಹಾಗೂ ಸಿಬ್ಬಂದಿ ನೇಮಕ ಮಾಡಿಕೊಳ್ಳದೇ ಹಾಗೂ ನೀರಿನ ಕೊರತೆಯಿಂದ ಮಾವಿನಹಳ್ಳಿ ಗ್ರಾಮದಲ್ಲಿರುವ ರೇಷ್ಮೆ ಸಮುದಾಯ ಅಭಿವೃದ್ಧಿ ಕೇಂದ್ರ ಹಾಳು ಬಿದ್ದಿದೆ.ಅಂದು 50 ಜನ ರೈತರಿಂದ ಬಳಕೆ, ಇಂದು ದುಸ್ಥಿತಿಯಲ್ಲಿ:

ರೇಷ್ಮೆ ಇಲಾಖೆ ಹೆಸರಿನಲ್ಲಿರುವ ಜಮೀನಿನಲ್ಲಿ ರೇಷ್ಮೆ ಸಸಿಗಳನ್ನು ಬೆಳೆಸಿ ರೈತರಿಗೆ ವಿತರಣೆ ಮಾಡಲು ರೇಷ್ಮೆ ಸಸಿ ನರ್ಸರಿ ಮಾಡಬೇಕೆಂಬ ಉದ್ದೇಶದಿಂದ ಕಳೆದ ವರ್ಷದ ಹಿಂದೆ ಬೋರ್‌ವೆಲ್‌ ಕೊರೆಸಿದ್ದರೂ ನೀರು ಬಾರದೇ ಇರುವುದರಿಂದ ನರ್ಸರಿ ಮಾಡುವುದು ಕೈಬಿಡಲಾಗಿದೆ. ಅಭಿವೃದ್ಧಿ ಹೊಂದುತ್ತಿರುವ ನಾಡಿನಲ್ಲಿ ನೀರಿನ ಕೊರತೆಯಿಂದ ರೇಷ್ಮೆ ಬೆಳೆ ಅಭಿವೃದ್ಧಿಪಡಿಸಬೇಕಾದ ಇಲಾಖೆ ನೀರಿನ ಕೊರತೆ ನೆಪದಲ್ಲಿ ಕಟ್ಟಡ ಹಾಗೂ ಜಮೀನು ಹಾಳುಗೆಡವಿರುವುದು ಯೋಜನೆ ಹಿನ್ನಡೆಗೆ ಕಾರಣವಾಗಿದೆ.

ತಾಲೂಕಿನಲ್ಲಿ ಕೇವಲ 250 ಎಕರೆ ರೇಷ್ಮೆ ಬೆಳೆ ಬೆಳೆಯಲಾಗುತ್ತಿದೆ. ರೇಷ್ಮೆ ಬೆಳೆಗಾರರಿಗೆ ಸರ್ಕಾರಿ ಸೌಲಭ್ಯ ದೊರಕಿಸಿಕೊಡಬೇಕಾದರೆ ಸಿಬ್ಬಂದಿ, ಅಧಿಕಾರಿಗಳ ಕೊರತೆ ಮಧ್ಯೆ ರೇಷ್ಮೆ ಇಲಾಖೆ ನರಳುತ್ತಿದೆ. ಇಂಡಿ ರೇಷ್ಮೆ ಇಲಾಖೆಗೆ ಅಧಿಕಾರಿ, ಸಿಬ್ಬಂದಿ ಸೇರಿ 6 ಜನ ಸಿಬ್ಬಂದಿ ಇರಬೇಕು. ಆದರೆ, ಕೇವಲ ಒಬ್ಬ ಅಧಿಕಾರಿ ಇರುವುದರಿಂದ ಇಂಡಿ, ಚಡಚಣ ಸೇರಿ 120 ಗ್ರಾಮಗಳಲ್ಲಿ ರೇಷ್ಮೆ ಬೆಳೆ ಹೆಚ್ಚಿಸುವ ಕೆಲಸ ಮಾಡಲು ಸಾಧ್ಯವೇ ಎಂಬ ಪ್ರಶ್ನೆ ರೇಷ್ಮೆ ಬೆಳೆಗಾರರದ್ದು.