ಸಿರಿ ಸಂಸ್ಥೆಯಲ್ಲ, ಅದು ಕೂಡು ಕುಟುಂಬದ ಮನೆ: ಹರೀಶ್ ಪೂಂಜಾ

ಬೆಳ್ತಂಗಡಿ: ಸಿರಿ ಸಿಬ್ಬಂದಿ ತಯಾರಿಸಿದ ಉತ್ಪನ್ನಗಳು ದೇಶ ವಿದೇಶಗಳಲ್ಲಿ ಮಾರುಕಟ್ಟೆ ತಲುಪಿವೆ ಎಂದರೆ ನಮ್ಮ ತಾಲೂಕಿನ ಜನತೆಗೆ ಹೆಮ್ಮೆ. ತಾಲೂಕಿನವರೇ ತಯಾರಿಸಿದ ಉತ್ಪನ್ನ ಸಿರಿ ಕಲ್ಪನೆಯ ರೂವಾರಿಗಳಾದ ಡಾ. ಡಿ. ವೀರೇಂದ್ರ ಹೆಗ್ಗಡೆ, ಹೇಮಾವತಿ ಹೆಗ್ಗಡೆಯವರು ಒಂದು ಸಂಸ್ಥೆಯನ್ನು ಲಾಭದ ಉದ್ದೇಶಕ್ಕಾಗಿಯೇ ಮಾಡದೆ ಅಲ್ಲಿನ ಸಿಬ್ಬಂದಿ ಭವಿಷ್ಯವನ್ನು ರೂಪಿಸುವ ಸಂಸ್ಥೆಯಾಗಿಸಿರುತ್ತಾರೆ. ಸಿರಿ ಸಿಬ್ಬಂದಿಗಳ ನಯ ವಿನಯ, ತಮ್ಮದೇ ಸಿರಿ ಎಂಭ ಭಾವನೆಯಿಂದ ದುಡಿಯುವ ರೀತಿ ನೋಡಿದರೆ ಸಿರಿ ಸಂಸ್ಥೆಯಲ್ಲ ಸಿರಿ ಕೂಡು ಕುಟುಂಬದ ಮನೆಯಂತೆ ಎಂದು ಶಾಸಕ ಹರೀಶ್ ಪೂಂಜಾ ಅಭಿಪ್ರಾಯಪಟ್ಟಿದ್ದಾರೆ.

ಶನಿವಾರ ಬೆಳ್ತಂಗಡಿಯ ರೆಂಕೆದಗುತ್ತು ಬಳಿ ಇರುವ‌ ಸಿರಿ ನ್ಯೂ ಇಂಡಸ್ಟಿಯಲ್ ಪಾರ್ಕ್ ನಲ್ಲಿ ಸಿರಿ ಹಬ್ಬದ ಪ್ರಯುಕ್ತ ನಡೆದ ಸಿರಿ ಸಿಬ್ಬಂದಿಗಳ ವಿವಿಧ ಸ್ಪರ್ದೆಗಳ ವಿಜೇತರಿಗೆ ಬಹುಮಾನ ವಿತರಿಸಿ ಮಾತನಾಡಿ, ಸಿರಿ ಸಂಸ್ಥೆಯು ಒಂದು ಸಾವಿರಕ್ಕೂ ಅಧಿಕ ಮಂದಿಗೆ ಉದ್ಯೋಗ ನೀಡಿದೆ ಎಂದರೆ ಒಂದು ಸಾವಿರ ಕುಟುಂಬಕ್ಕೆ ಬೆಳಕು ಬಂದಿದೆ ಎಂದರ್ಥ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಉದ್ಯೋಗ ನೀಡಲು ಡಾ. ಹೆಗ್ಗಡೆಯವರು ಚಿಂತಿಸಿದ್ದು, ಈ ಕ್ಷೇತ್ರದ ಶಾಸಕನಾಗಿ ಸಂಪೂರ್ಣ ಸಹಕಾರ ನೀಡುವುದಾಗಿ ತಿಳಿಸಿದರು.

ಬೆಳ್ತಂಗಡಿ ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ತುಕರಾಮ್, ಖ್ಯಾತ ಸೌಂದರ್ಯ ತಜ್ನೆ ಉಮಾ ಜಯಕುಮಾರ್, ಸಿರಿ ಕ್ಲಬ್ ಅದ್ಯಕ್ಷೆ ಉಷಾ ಉಪಸ್ಥಿತರಿದ್ದರು. ಸಿರಿ ಸಂಸ್ಥೆಯಲ್ಲಿ ಆರಂಭದಿಂದ ಇದ್ದ ಸಿಬ್ಬಂದಿ, ಸಿರಿ ಸಂಸ್ಥೆಯ ನಿರ್ದೇಶಕರು, ಸಿಬ್ಬಂದಿಗಳ ಸ್ಪರ್ಧೆಯ ವಿಜೇತರನ್ನು ಗೌರವಿಸಲಾಯಿತು.