ಗಗನಕ್ಕೇರಿದ ಎತ್ತುಗಳ ಬೆಲೆ, ಹೈರಾಣಾದ ರೈತರು

ಅಶೋಕ ಸೊರಟೂರ ಲಕ್ಷ್ಮೇಶ್ವರ

ಮುಂಗಾರು ಹಂಗಾಮಿನ ಮಾಗಿ ಉಳುಮೆ ಮಾಡಲು ಹಾಗೂ ಬಿತ್ತನೆ ಮಾಡಲು ರೈತರಿಗೆ ಎತ್ತುಗಳು ಅವಶ್ಯಕವಾಗಿವೆ. ಎತ್ತುಗಳನ್ನು ಖರೀದಿಸಲು ಲಕ್ಷ್ಮೇಶ್ವರ ಜಾನುವಾರು ಸಂತೆಗೆ ಹೋದಾಗ ರೈತರು ತಮ್ಮ ಕೃಷಿ ಚಟುವಟಿಕೆಗಳಿಗೆ ಆಧಾರವಾಗಿರುವ ಎತ್ತುಗಳು ಬೆಲೆ ಕೇಳಿ ಕಂಗಾಲಾಗುತ್ತಿದ್ದಾರೆ. ಸುಮಾರು ₹70-80 ಸಾವಿರದಿಂದ ಆರಂಭವಾಗಿ ₹1.50 ಲಕ್ಷದವರೆಗೆ ಎತ್ತುಗಳ ಬೆಲೆ ಏರಿದೆ. ರೈತರು ಬೆಲೆ ಕೇಳಿ ಹೌಹಾರುತ್ತಿದ್ದಾರೆ. ಖರೀದಿಸಲೇ ಬೇಕಾದ ಒತ್ತಡದಲ್ಲೂ ಇದ್ದಾರೆ.

ಒಕ್ಕುಲತನವು ಯಾಂತ್ರಿಕೃತವಾಗುತ್ತಿರುವ ಹಿನ್ನೆಲೆಯಲ್ಲಿ ರೈತರು ಟ್ರ್ಯಾಕ್ಟರ್, ಟಿಲ್ಲರ್ ಗಳ ಸಹಾಯದಿಂದ ಉಳುಮೆ ಹಾಗೂ ಬಿತ್ತನೆ ಮಾಡಲು ಆರಂಭಿಸಿದ್ದರಿಂದ ಜಾನುವಾರುಗಳ ಅವಲಂಬನೆ ಕಡಿಮೆಯಾದಂತೆ ಕಂಡು ಬಂದರು ಜಾನುವಾರುಗಳು ಇಲ್ಲದೆ ರೈತನ ಬಾಳು ಅಪೂರ್ಣ ಎಂಬ ಮಾತು ಎಲ್ಲೆಡೆ ಕೇಳಿ ಬರುತ್ತಿದೆ.

ಆದ್ದರಿಂದ ಎತ್ತುಗಳು ರೈತರು ಜೀವನಾಡಿಯಾಗಿವೆ ಹಾಗೂ ಎಷ್ಟೇ ಬೆಲೆ ಹೆಚ್ಚಾದರೂ ಕೊಳ್ಳುವುದನ್ನು ನಿಲ್ಲಿಸುವುದಿಲ್ಲ ಎಂಬ ಮಾತುಗಳು ಕೇಳಿ ಬಂದವು.

ಜಾನುವಾರುಗಳನ್ನು ಸಾಕುವುದರಿಂದ ಹೊಲಕ್ಕೆ ಬೇಕಾದ ಕೊಟ್ಟಿಗೆ ಗೊಬ್ಬರ ಜೊತೆಯಲ್ಲಿ ಕುಟುಂಬದ ಸಂರಕ್ಷಣೆಗಾಗಿ ಹಾಲು, ಮೊಸರು, ಮಜ್ಜಿಗೆ, ಬೆಣ್ಣೆ, ತುಪ್ಪ ಮನೆಯಲ್ಲಿಯೇ ಸಿಗುತ್ತವೆ. ಅದೂ ಕಲಬೆರಕೆ ಇಲ್ಲದೆ ಆರೋಗ್ಯ ಪೂರ್ಣ ಸಮಾಜದ ನಿರ್ಮಾಣಕ್ಕೆ ಜಾನುವಾರುಗಳ ಕೊಡುಗೆ ಅಮೂಲ್ಯವಾಗಿದೆ ಎಂದು ಪ್ರಗತಿ ಪರ ರೈತ ಮಂಜುನಾಥ ಬಟ್ಟೂರ ಹೇಳಿದರು.