ಸಾಮಾಜಿಕ ಸಮೀಕ್ಷೆ, ಯಲಬುರ್ಗಾಕ್ಕೆ 2ನೇ ಸ್ಥಾನ

ಯಲಬುರ್ಗಾ: ರಾಜ್ಯ ಸರ್ಕಾರ ಹಿಂದುಳಿದ ವರ್ಗಗಳ ಆಯೋಗದಿಂದ ನಡೆಸುತ್ತಿರುವ ಸಾಮಾಜಿಕ, ಶೈಕ್ಷಣಿಕ ಮತ್ತು ಆರ್ಥಿಕ ಸಮೀಕ್ಷೆಯ ಕಾರ್ಯವು ತಾಂತ್ರಿಕ ಸಮಸ್ಯೆಯಿಂದ ಆರಂಭದಲ್ಲಿಯೇ ಮುಗ್ಗರಿಸಿತ್ತು. ಈಗ ಸಮಸ್ಯೆ ಪರಿಹಾರವಾಗಿ ಗಣತಿಕಾರ್ಯ ವೇಗ ಪಡೆದುಕೊಂಡಿದ್ದು, ಉತ್ತಮ ಪ್ರಗತಿಯಿಂದಾಗಿ ಜಿಲ್ಲೆಯಲ್ಲಿ ಯಲಬುರ್ಗಾ ಎರಡನೇ ಸ್ಥಾನದಲ್ಲಿದೆ.

ಆರಂಭದಲ್ಲಿ ತಾಂತ್ರಿಕ ಸಮಸ್ಯೆಯಿಂದಾಗಿ ಗಣತಿ ಕಾರ್ಯ ಮಂದಗತಿಯಲ್ಲಿ ಸಾಗಿತ್ತು. ಇದರಿಂದ ಗಣತಿದಾರರು ಉತ್ಸಾಹ ಕಳೆದುಕೊಳ್ಳುವ ಜತೆಗೆ ಒತ್ತಡಕ್ಕೆ ಒಳಗಾಗಿದ್ದರು. ದಿನಗಳೆದಂತೆ ಸರ್ವರ್ ವೇಗ ಪಡೆದುಕೊಂಡು ಸಮಸ್ಯೆಗೆ ಪರಿಹಾರ ದೊರಕಿದೆ. ಹೀಗಾಗಿ ಜಿಲ್ಲೆಯಲ್ಲಿ ಯಲಬುರ್ಗಾ ತಾಲೂಕು ಸಮೀಕ್ಷೆಯಲ್ಲಿ ಮುಂಚೂಣಿಯಲ್ಲಿದೆ. ಇದು ಸಮೀಕ್ಷೆಗೆ ನಿಯೋಜನೆಗೊಂಡ ಅಧಿಕಾರಿಗಳು ಮತ್ತು ಸಿಬ್ಬಂದಿ ಕಾರ್ಯಕ್ಷಮತೆಗೆ ಸಾಕ್ಷಿಯಾಗಿದೆ.

ಡಿಸಿಯಿಂದ ಪ್ರಶಂಸನಾ ಪತ್ರ: ಸಮೀಕ್ಷೆಗೆ ನಿಯೋಜಿಸಲಾದ ಗಣತಿದಾರರು ನಿಗದಿತ ಅವಧಿಯಲ್ಲಿ ಗಣತಿ ಕಾರ್ಯವನ್ನು ಗುರಿ ಮೀರಿ ಸಾಧನೆ ಮಾಡಿದವರಿಗೆ ಡಿಸಿಯಿಂದ ಪ್ರಶಂಸನಾ ಪತ್ರ ನೀಡಲಾಗುತ್ತಿದೆ. ಅಂಥವರಲ್ಲಿ ವಜ್ರಬಂಡಿಯ ರಾಘವೇಂದ್ರ, ಹಿರೇಅರಳಿಹಳ್ಳಿಯ ರಾಮಪ್ಪ ಭಜಂತ್ರಿ, ಮುರಡಿಯ ರಮೇಶ ಹಾಗೂ ಸಂಗನಾಳದ ಮಂಜುನಾಥ ಬೂದಿಹಾಳ ಗಣತಿ ಕಾರ್ಯದಲ್ಲಿ ಗುರಿ ಮೀರಿ ಸಾಧನೆ ಮಾಡಿದ್ದಾರೆ. ಅಲ್ಲದೆ ಮತ್ತೆ ಹೆಚ್ಚುವರಿ ಸಮೀಕ್ಷೆ ಕಾರ್ಯದಲ್ಲಿ ತೊಡಗಿಸಿಕೊಂಡಿರುವುದು ವಿಶೇಷ.

ಸರ್ಕಾರ ಗಣತಿ ಕಾರ್ಯಕ್ಕೆ ವೇಗ ನೀಡಲು ತಂತ್ರಾಂಶದ ಗೂಗಲ್ ಲಿಂಕ್ ಮೂಲಕ ತಮ್ಮ ಕುಟುಂಬದ ವೈಯಕ್ತಿಕ ಮಾಹಿತಿ ಅಳವಡಿಸಲು ಸಾರ್ವಜನಿಕರಿಗೆ ಅವಕಾಶ ಒದಗಿಸಲಾಗಿದೆ. ಸಮೀಕ್ಷೆಯಿಂದ ಹೊರಗುಳಿದವರನ್ನು ಗಣತಿ ಕಾರ್ಯಕ್ಕೆ ಸಹಕರಿಸಲು ಗ್ರಾಪಂ ಮೂಲಕ ಸಾರಲಾಗುತ್ತದೆ. ಶೇ. ೧೦೦ರಷ್ಟು ಗುರಿ ಸಾಧಿಸುವ ಕೆಲಸ ಮಾಡಲಾಗುವುದು. ಇದಕ್ಕೆ ಸಾರ್ವಜನಿಕರು ಸಹಕಾರ ನೀಡಬೇಕು ಎಂದು ಯಲಬುರ್ಗಾ ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯ ಶಿವಶಂಕರ ಕರಡಕಲ್ ಹೇಳಿದರು.