ಮುರುಗೀ ಪರಂಪರೆಯಿಂದ ಸಮಾಜಮುಖಿ ಕಾರ್ಯ: ಶಾಂತವೀರ ಮುರುಘರಾಜೇಂದ್ರ ಸ್ವಾಮೀಜಿ

ಕನ್ನಡಪ್ರಭ ವಾರ್ತೆ ಹೊಳಲ್ಕೆರೆ

ಶ್ರೀ ಜಗದ್ಗುರು ಮುರುಘರಾಜೇಂದ್ರ ಬೃಹನ್ಮಠದಿಂದ ಹೊಳಲ್ಕೆರೆ ತಾಲೂಕು ಗಿಲಿಕೇನಹಳ್ಳಿ ಗ್ರಾಮದಲ್ಲಿ ನಡೆದ ಅನುಭಾವ ಶ್ರಾವಣದ 3ನೇ ದಿನದ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಶ್ರೀಗಳು, ಸರ್ವಕ್ಷೇತ್ರಗಳಲ್ಲಿ ಶ್ರೀಮಠದ ಗುರುತರವಾದ ಕೊಡುಗೆ ಕಾಣಬಹುದಾಗಿದೆ. ಹಾಗಾಗಿ ಗಿಲಿಕೇನಹಳ್ಳಿ ಗ್ರಾಮ ಸಹ ಪೀಠ ಪರಂಪರೆ ಜತೆಗೆ ಗುರುತಿಸಿಕೊಂಡಿರುವುದು ಸಹಿತವಾಗಿದೆ ಎಂದು ನುಡಿದರು.

ಡಾ.ಬಸವಪ್ರಭು ಸ್ವಾಮೀಜಿ ಮಾತನಾಡಿ, ಗಣ್ಯ ಪರಂಪರೆ ಹೊಂದಿರುವ ಮುರುಘಾಮಠವು ಸಾಮಾಜಿಕ, ಧಾರ್ಮಿಕ ಹಾಗೂ ಶಿಕ್ಷಣ ಕ್ಷೇತ್ರದಲ್ಲಿ ಅನುಪಮ ಸೇವೆ ಸಲ್ಲಿಸುತ್ತಾ ಬಂದಿದೆ. ಶ್ರೀಮಠವು ನಾಡಿನಾದ್ಯಂತ ಸ್ಥಾಪಿಸಿರುವ ಹಾಸ್ಟೆಲ್‍ಗಳಲ್ಲಿದ್ದು ಓದಿದವರು ಸಮಾಜದಲ್ಲಿ ಅತ್ಯುನ್ನತ ಸ್ಥಾನದಲ್ಲಿರುವು ಈ ನಾಡಿಗೆ ಶೋಭೆ ತರುವ ವಿಚಾರವೆಂದರು.

ಶ್ರೀಮುರುಘಾಮಠ ಮತ್ತು ವಿದ್ಯಾಪೀಠ ಆಡಳಿತ ಮಂಡಳಿ ಸದಸ್ಯರಾದ ಡಾ.ಬಸವಕುಮಾರ ಸ್ವಾಮೀಜಿ ಮಾತನಾಡಿ, ಸಾಮಾಜಿಕ ಕಳಕಳಿಯೇ ಮುರುಘಾಮಠದ ಮೂಲ ಧ್ಯೇಯವಾಗಿತ್ತು. ಅದು ಈಗಲೂ ನಡೆದಿದೆ ಎಂದು ನುಡಿದರು. ಬಸವಕಲ್ಯಾಣದ ಶಿವಕುಮಾರ ಸ್ವಾಮೀಜಿ, ಒಂಟಿಕುಂಬ ಮುರುಘಾಮಠದ ಶ್ರೀ ತಿಪ್ಪೇರುದ್ರ ಸ್ವಾಮೀಜಿ, ಕಲ್ಕೆರೆಯ ಶ್ರೀ ಪೂರ್ಣಾನಂದ ಸ್ವಾಮೀಜಿ ವೇದಿಕೆಯಲ್ಲಿದ್ದರು. ಮುರಿಗೆ ಶಾಂತವೀರ ಸ್ವಾಮೀಜಿ ಕಾಲದಿಂದ ಸಾಗಿಬಂದಿರುವ ಗುರುಪರಂಪರೆ ಒಂದನೇಯ ಮುರಿಗೆ ಶಾಂತವೀರ ಸ್ವಾಮೀಜಿಗಳಿಂದ ಹಿಡಿದು ಒಟ್ಟು ಪೀಠ ಪರಂಪರೆ ಇಪ್ಪತ್ತು ಪೀಠಾಧೀಶರ ಸಾಮಾಜಿಕ ಧಾರ್ಮಿಕ ಶೈಕ್ಷಣಿಕ ಕೆಲಸಗಳನ್ನು ಅಲ್ಲಮಪ್ರಭು ಸಂಶೋಧನಾ ಕೇಂದ್ರದ ಡಾ.ವಿ ನಾಗರಾಜ್ ಸಭೆಯಲ್ಲಿ ವಿವರಿಸಿದರು.