ಅವ್ಯವಸ್ಥೆ, ಭ್ರಷ್ಟಾಚಾರ ಕಂಡು ಉಪಲೋಕಾಯುಕ್ತ ಕೆಂಡಾಮಂಡಲ

ಕೊಪ್ಪಳ: ಚರಂಡಿ ನೀರು ಹಳ್ಳ ಸೇರುತ್ತಿರುವುದು, ಆಸ್ಪತ್ರೆಯಲ್ಲಿ ಅವಧಿ ಮುಗಿದ ಜೌಷಧಿ, ಹರಿದ ದಿಂಬು, ಗಾದಿ, ಚಿಕಿತ್ಸೆ ಸಿಗದೇ ಪರದಾಡುತ್ತಿರುವ ರೋಗಿಗಳು, ಕೊಪ್ಪಳ ನಗರಸಭೆಯಲ್ಲಿ ತಾಂಡವವಾಡುತ್ತಿರುವ ಭ್ರಷ್ಟಾಚಾರ, ಸರ್ಕಾರಕ್ಕೆ ತುಂಬಬೇಕಾದ ಜಿಎಸ್‌ಟಿ ಎತ್ತಿ ಹಾಕಿರುವುದು, ಅಷ್ಟೆ ಅಲ್ಲ, ನಿತ್ಯ ಎಣ್ಣೆ ಹೊಡೆಯಲು (ಮದ್ಯಪಾನ ಮಾಡಲು) ಮದ್ಯದಂಗಡಿಗೆ ಪೋನ್‌ ಪೇ ಮಾಡುತ್ತಿದ್ದ ನಗರಸಭೆ ನೌಕರ.

ಹೌದು, ಬೆಳಗ್ಗೆ ಹಂಪಿ ಎಕ್ಸ್ ಪ್ರೆಸ್ ರೈಲು ಮೂಲಕ ಆಗಮಿಸಿದ ಉಪಲೋಕಾಯುಕ್ತ ಬಿ.ವೀರಪ್ಪ, ಕೊಪ್ಪಳಕ್ಕೆ ಆಗಮಿಸುತ್ತಿದ್ದಂತೆ ಇಡೀ ನಗರದ ಚರಂಡಿ ನೀರು ಹರಿದು ಹಳ್ಳ ಸೇರುತ್ತಿರುವುದನ್ನು ಕಂಡು ತೀವ್ರ ಬೇಸರ ವ್ಯಕ್ತಪಡಿಸಿದರು.

ನಂತರ ಜಿಲ್ಲಾಸ್ಪತ್ರೆಗೆ ಭೇಟಿ ನೀಡಿ ಅಲ್ಲಿ ಹರಿದ ದಿಂಬು, ಅವಧಿ ಮುಗಿದ ಔಷಧಿ, ಚಿಕಿತ್ಸೆಗಾಗಿ ಪರಿತಪಿಸುತ್ತಿದ್ದ ರೋಗಿಗಳು, ಕುಡಿಯಲು ನೀರು ಸಹ ಇಲ್ಲದಿರುವುದನ್ನು ಕಂಡು ವೈದ್ಯರು ಮತ್ತು ವೈದ್ಯಾಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು.

ನಗರಸಭೆ ಅಧಿಕಾರಿಗಳ ವಿರುದ್ಧ ದೂರು ದಾಖಲು: ಬಳಿಕ ಕೊಪ್ಪಳ ನಗರಸಭೆಗೆ ಭೇಟಿ ನೀಡಿ ನಗರಸಭೆ ಅಧಿಕಾರಿಗಳನ್ನು ತೀವ್ರ ತರಾಟೆಗೆ ತೆಗೆದುಕೊಂಡರು. ನಗರದಲ್ಲಿ ಬೀದಿ ದೀಪ ಇಲ್ಲ, ಕಸದ ರಾಶಿ ಬಿದ್ದಿವೆ. ಅತಿಕ್ರಮಣ ತೆರವು ಮಾಡಿಲ್ಲ, ಫುಟ್‌ಪಾತ್ ತೆರವು ಮಾಡದೇ ಇರುವ ಕುರಿತು ಸಾಲು ಸಾಲು ಪ್ರಶ್ನೆ ಕೇಳಿ ತರಾಟೆಗೆ ತೆಗೆದುಕೊಂಡರು.

ನಗರಸಭೆಯಲ್ಲಿನ ಲೆಕ್ಕಪತ್ರ, ಅಂಗಡಿಗಳ ಪರವಾನಗಿ ಶುಲ್ಕ ಹೀಗೆ ಹಲವು ರೀತಿ ಪ್ರಶ್ನೆ ಮಾಡಿದರು. ಎಇ ಸೋಮಲಿಂಗಪ್ಪ ಅವರನ್ನು ಕೆಲಕಾಲ ವಿಚಾರಣೆ ನಡೆಸಿದರಲ್ಲದೇ ಅವರ ವಿರುದ್ಧ ದೂರು ದಾಖಲಾಗಿರುವ ಮಾಹಿತಿ ಪಡೆದರು. ಇವರ ಕುರಿತು ಉಪಲೋಕಾಯುಕ್ತ ಕಚೇರಿಯಲ್ಲಿಯೂ ಒಂದು ದೂರು ದಾಖಲಿಸಿಕೊಳ್ಳುವಂತೆ ಸೂಚಿಸಿದರು.

ನಗರಸಭೆಯ ಎಲ್ಲ ಅಕ್ರಮದ ಕುರಿತು ಪ್ರತ್ಯೇಕ ದೂರು ದಾಖಲಿಸಿಕೊಳ್ಳುವಂತೆ ಸ್ಥಳದಲ್ಲಿಯೇ ಇದ್ದ ತಮ್ಮ ಸಿಬ್ಬಂದಿಗೆ ಸೂಚನೆ ನೀಡಿದರು.

ಅದಾದ ನಂತರ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಗೆ ಭೇಟಿ ನೀಡಿ, ಅಲ್ಲಿಯ ಅಕ್ರಮದ ಕುರಿತು ಸ್ವಯಂ ದೂರು ದಾಖಲಿಸಿಕೊಳ್ಳುವುದಾಗಿ ಎಚ್ಚರಿಕೆ ನೀಡಿದರು. ಜಿಪಂ ಸಿಇಓ ವರ್ಣೀತ್ ನೇಗಿ, ಅಪರ ಜಿಲ್ಲಾಧಿಕಾರಿ ಸಿದ್ದರಾಮೇಶ್ವರ, ಎಸ್ಪಿ ಡಾ.ರಾಮ ಎಲ್. ಅರಸಿದ್ದಿ, ಎಸಿ. ಕ್ಯಾ.ಮಹೇಶ ಮಾಲಗಿತ್ತಿ ಸೇರಿದಂತೆ ಅನೇಕ ಅಧಿಕಾರಿಗಳು ಇದ್ದರು.

ಕೊಪ್ಪಳ ನಗರಸಭೆಯಲ್ಲಿನ ಸಿಬ್ಬಂದಿಗಳ ವಿಚಾರಣೆ ಮಾಡುತ್ತಿದ್ದ ವೇಳೆ ಮೊಬೈಲ್ ಪಡೆದು ಅವರ ಪೋನೇ ಪೇ ವ್ಯವಹಾರ ಪರಿಶೀಲನೆ ಮಾಡಲಾಯಿತು. ಅದರಲ್ಲಿ ಓರ್ವ ಸಿಬ್ಬಂದಿ ಪೋನ್ ಪೇ ಇತಿಹಾಸ ನೋಡಿದಾಗ ನಿತ್ಯವೂ ಡೈಮಂಡ್ ಲಿಕ್ಕರ್ ಖಾತೆಗೆ ₹150 ಪೇ ಆಗಿರುವ ಮಾಹಿತಿ ಗೊತ್ತಾಯಿತು. ಇದನ್ನು ನೋಡಿದ ಉಪಲೋಕಾಯುಕ್ತರು, ನಿತ್ಯ ಅಷ್ಟೇ ಪ್ರಮಾಣದಲ್ಲಿ ಹೊಡಿತೀಯಾ ಎಂದು ಛೇಡಿಸಿದರು.