ವಿದ್ಯಾರ್ಥಿಗಳಿಗೆ ಇತಿಹಾಸದ ಹೊಸ ಮಗ್ಗಲು ತಿಳಿಸಿ: ಡಾ.ವಿಜಯ ಪೂಣಚ್ಚ

ಹೊಸಪೇಟೆ: ಇತಿಹಾಸದ ಹೊಸ ಮಗ್ಗಲುಗಳನ್ನು ಇಂದಿನ ವಿದ್ಯಾರ್ಥಿಗಳಿಗೆ ತಿಳಿಸುವುದು ಅವಶ್ಯಕವಾಗಿದೆ ಎಂದು ಕನ್ನಡ ವಿಶ್ವವಿದ್ಯಾಲಯದ ಕುಲಸಚಿವ ಡಾ.ವಿಜಯ್ ಪೂಣಚ್ಚ ತಂಬಂಡ ಹೇಳಿದರು.

ಇತಿಹಾಸದ ಸಂಶೋಧನೆಯಲ್ಲಿ ಸಿದ್ಧಪಡಿಸಿದ ವಿಷಯಗಳು ತೀರ್ಪುಗಳಂತೆ ಸ್ಥಿರವಾಗಿರದೆ ಸಂಶೋಧನೆಯಿಂದ ಹೊಸ ವಿಷಯಗಳಿಂದ ಮಾರ್ಪಾಡು ಪಡೆಯುತ್ತವೆ. ಇತಿಹಾಸವನ್ನು ಬರವಣೆಗೆಯೂ ಅನೇಕ ಆಕಾರಗಳ ಆಧಾರದಲ್ಲಿ ಸತ್ಯಾಂಶ ಶೋಧನೆಯಾಗಿದೆ. ಇತಿಹಾಸವು ಧಾರ್ಮಿಕ ಚರಿತ್ರೆ, ರಾಜಕೇಂದ್ರಿತ ಚರಿತ್ರೆ, ಸಮುದಾಯ ಕೇಂದ್ರಿತ ಚರಿತ್ರೆ ಹೀಗೆ ಪ್ರಕಾರಗಳನ್ನು ಒಳಗೊಂಡಿದೆ. ಇದನ್ನು ಕಟ್ಟಿಕೊಡುವಲ್ಲಿ ಯುವ ಸಂಶೋಧನಾರ್ಥಿಗಳು ಕೆಲವು ಸೂಕ್ಷ್ಮಗಳನ್ನು ಗಮನದಲ್ಲಿಟ್ಟುಕೊಳ್ಳಬೇಕು ಎಂದರು.

ಇತಿಹಾಸ ಮತ್ತು ಪುರಾತತ್ವ ವಿಭಾಗ ಪ್ರಾಧ್ಯಾಪಕ ಡಾ.ಎಸ್.ವೈ. ಸೋಮಶೇಖರ್ ಮಾತನಾಡಿ, ವಿಜಯನಗರ ಪೂರ್ವ ಕಾಲದಲ್ಲಿ ನಿರ್ಮಾಣವಾದ ದೇವಾಲಯಗಳು ಪಾಂಸನ ಶೈಲಿಯಲ್ಲಿರುವುದನ್ನು ಕಾಣುತ್ತೇವೆ. ವಿಜಯನಗರ ಸಾಮ್ರಾಜ್ಯದಲ್ಲೂ ಸಂಗಮ ಮತ್ತು ಸಾಳುವ ಮನೆತನಗಳು ಈ ಪಾಂಸನ ಶೈಲಿಯಲ್ಲಿಯೇ ದೇವಾಲಯಗಳನ್ನು ನಿರ್ಮಿಸಿದ್ದಾರೆ. ತುಳುವ ಮನೆತನದ ಆಡಳಿತಾವಧಿಯಲ್ಲಿ ದ್ರಾವಿಡ ಶೈಲಿ ಪ್ರಬುದ್ಧಮಾನಕ್ಕೆ ಬಂದಿರುವುದನ್ನು ಕಾಣಬಹುದಾಗಿದೆ. ವಿಜಯನಗರ ಸಾಮ್ರಾಜ್ಯದ ವೈಭವವನ್ನು ಸಾರುವಲ್ಲಿ ವಿರುಪಾಕ್ಷ ಬಜಾರು, ವಿಠಲ ಬಜಾರು, ಕೃಷ್ಣ ಬಜಾರು, ಪಾನ್‌ಸುಪಾರಿ ಬಜಾರು ಸೇರಿದಂತೆ ಏಳು ಪ್ರಮುಖ ಬಜಾರುಗಳು ಮಹತ್ವದ್ದಾಗಿವೆ. ಹಂಪಿ ಸುತ್ತಮುತ್ತಲಿನ ಬೆಟ್ಟ ಗುಡ್ಡಗಳು ಆದಿ ಮಾನವನ ನೆಲೆಗಳಾಗಿವೆ ಎಂದರು.