ಹಾನಗಲ್ಲ ಪುರಸಭೆ ಕುರ್ಚಿಗಾಗಿ ಶುರುವಾಗಿದೆ ಪೈಪೋಟಿ

ಹಾನಗಲ್ಲ: ಇಪ್ಪತ್ಮೂರು ಸದಸ್ಯ ಬಲ ಹೊಂದಿದ ಹಾನಗಲ್ಲ ಪುರಸಭೆಗೆ ಸಾಮಾನ್ಯ ಅಧ್ಯಕ್ಷ, ಹಿಂದುಳಿದ ಬ ವರ್ಗದ ಮಹಿಳೆ ಉಪಾಧ್ಯಕ್ಷ ಸ್ಥಾನ ಮೀಸಲಾಗಿರುವುದರಿಂದ ಸದಸ್ಯರಲ್ಲಿ ತೀವ್ರ ಪೈಪೋಟಿ ಇದೆ. ಹೈಕಮಾಂಡ್ ನಿರ್ಣಯವೇ ಸೈ ಎಂಬ ಕೈ ಸದಸ್ಯರಲ್ಲಿ ಒಮ್ಮತಾಭಿಪ್ರಾಯ ಮೂಡಿದಂತಿದೆ. ಸಾಮಾಜಿಕ ನ್ಯಾಯದ ದಂಡ ಶಾಸಕ ಶ್ರೀನಿವಾಸ ಮಾನೆ ಅವರ ಕೈಯಲ್ಲಿದೆ.

ಸಾಮಾಜಿಕ ನ್ಯಾಯದ ನೆಲೆಯಲ್ಲಿ ಹಾನಗಲ್ಲ ಪುರಸಭೆ ಆದಾಗಿನಿಂದ ಇಲ್ಲಿನ ಬ್ರಾಹ್ಮಣ ಸಮುದಾಯಕ್ಕೆ ಅಧ್ಯಕ್ಷ ಸ್ಥಾನ ಲಭಿಸಿಲ್ಲ ಎಂಬ ಚರ್ಚೆ ನಡೆಯುತ್ತಿದೆ. ಹಾಗೇನಾದರೂ ಆದಲ್ಲಿ ರಾಧಿಕಾ ದೇಶಪಾಂಡೆ ಅಧ್ಯಕ್ಷರಾಗುವುದು ಬಹುತೇಕ ಖಚಿತ. ಅಧ್ಯಕ್ಷರಾಗಲು ಭಾರೀ ಅಕಾಂಕ್ಷೆ ಹೊಂದಿರುವ ಮಹೇಶ ಪವಾಡಿ ಇದೇ ಅವಧಿಯಲ್ಲಿ ಉಪಾಧ್ಯಕ್ಷರಾಗಿ ಅಧಿಕಾರ ಅನುಭವಿಸಿದ್ದಾರೆ ಎಂಬ ಚರ್ಚೆಯೂ ಇದೆ. ಇನ್ನು ವೀಣಾ ಗುಡಿ ಅವರಿಗೆ ಉಪಾಧ್ಯಕ್ಷ ಸ್ಥಾನ ಖಚಿತ ಎಂತಾದರೂ ಅಧ್ಯಕ್ಷರಾಗುವ ಹಂಬಲ ಹೊಂದಿದ್ದಾರೆ. ಉಪಾಧ್ಯಕ್ಷರಾಗಲು ಅವರೊಬ್ಬರೇ ಅಧಿಕೃತ ಮೀಸಲು ಅಭ್ಯರ್ಥಿಯಾಗಿರುವುದರಿಂದ ಹೈಕಮಾಂಡ್ ಅವರ ಮನವೊಲಿಸುವ ಸಾಧ್ಯತೆ ಇದೆ.

ಅವಧಿ ಹಂಚಿಕೆ: ಅಧ್ಯಕ್ಷ ಉಪಾಧ್ಯಕ್ಷ ಸ್ಥಾನಕ್ಕೆ ಈಗ ಉಳಿದಿರುವ ಅವಧಿ ಕೇವಲ ೧೩ ತಿಂಗಳು. ಅದರಲ್ಲಿಯೇ ಮತ್ತೆ ಅವಧಿ ಹಂಚಿಕೆ ಅಸಾಧ್ಯ ಎಂಬ ಚರ್ಚೆ ಇದೆಯಾದರೂ, ಹಿಂದಿನಂತೆ ಈ ಅವಧಿಯನ್ನು ಎರಡು ಅವಧಿ ಮಾಡಲಿ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಎಲ್ಲವೂ ಹೈಕಮಾಂಡ್ ಅಂಗಳದಲ್ಲಿದೆ. ಶಾಸಕ ಶ್ರೀನಿವಾಸ ಮಾನೆ ಅವರೇ ಈಗ ಎಲ್ಲವನ್ನೂ ಸಮತೋಲನದಲ್ಲಿ ನಿರ್ಣಯಿಸಬೇಕಾದ ಅನಿವಾರ್ಯತೆ ಇದೆ.