ವಿಶ್ವಕ್ಕೆ ವಚನ ಸಾಹಿತ್ಯದ ಕೊಡುಗೆ ಅಪಾರ: ಸಿಂಧು ಗಿರೀಶ

ಬಸಮ್ಮ ಎಸ್.ಎಂ.ಕೊಟ್ರಯ್ಯ ದತ್ತಿ ಕಾರ್ಯಕ್ರಮದಲ್ಲಿ 12ನೇ ಶತಮಾನದ ಬಸವ ದರ್ಶನ ಕುರಿತು ಉಪನ್ಯಾಸ

ಸರಳ ಕನ್ನಡ ಭಾಷೆಯಲ್ಲಿ 12 ನೇ ಶತಮಾನದಲ್ಲಿ ಅಸಂಖ್ಯಾತ ಶರಣರಿಂದ ರಚನೆಯಾಗಿರುವ ವಚನ ಸಾಹಿತ್ಯ ಇಡೀ ವಿಶ್ವಕ್ಕೆ ದೊಡ್ಡ ಕೊಡುಗೆಯಾಗಿದೆ ಎಂದು ಕನ್ನಡ ಪ್ರಾಧ್ಯಾಪಕಿ ಸಿ.ಎಂ. ಸಿಂಧು ಗಿರೀಶ ಹೇಳಿದರು.

ಸಾಮಾನ್ಯ ಜನರಿಗೂ ಅರ್ಥವಾಗುವಂತೆ ಸರಳ ಕನ್ನಡಯಲ್ಲಿ ವಚನಗಳನ್ನು ಬಸವಣ್ಣನವರು ಸೇರಿದಂತೆ ಅನೇಕರು ರಚಿಸಿದ್ದರು. ಬಸವಣ್ಣನವರ ಅಂದಿನ ಸಾಮಾಜಿಕ ನ್ಯಾಯ ಇಂದಿಗೂ ಮಾದರಿಯಾಗಿದೆ. ವ್ಯಕ್ತಿ ಮತ್ತು ಸಮಾಜ ಕಲ್ಯಾಣ ಎಂಬ ಎರಡು ಗಿರಿ ಒಳಗೊಂಡಿರುವುದೇ ವಚನ ಸಾಹಿತ್ಯವಾಗಿದೆ. 24700 ವಚನಗಳನ್ನು ಶರಣರು ರಚಿಸಿದ್ದರು. ಬಸವಣ್ಣನವರು 1.90 ಲಕ್ಷ ಜಂಗಮರನ್ನು ಕಲ್ಯಾಣಕ್ಕೆ ಕರೆ ತಂದಿದ್ದರು. ಬಸವಣ್ಣ ಮತ್ತು ಅವರ ವಚನ ಸಾಹಿತ್ಯ ಟೀಕಿಸುವ ಅನೇಕ ಕಾರ್ಯಗಳು ಬಹು ಹಿಂದಿನಿಂದಲೂ ನಡೆದಿದ್ದವು. ಆದರೆ ಬಸವಣ್ಣನವರು ಹಾಕಿಕೊಟ್ಟ ಸಾಮಾಜಿಕ ಸಮಾನತೆ, ಕಲ್ಯಾಣ ಕ್ರಾಂತಿ ಯಾರಿಂದಲೂ ಅಳಿಸಲು ಸಾಧ್ಯವಿಲ್ಲ ಎಂದು ಹೇಳಿದರು.

ಅಧ್ಯಕ್ಷತೆ ವಹಿಸಿದ್ದ ತಾಲೂಕು ಶಸಾಪ ಅಧ್ಯಕ್ಷ ದೇವರಮನಿ ಕರಿಯಪ್ಪ ಮಾತನಾಡಿ, ಶರಣರ ವಚನಗಳ ಸಾರ ಸಮಾಜಕ್ಕೆ ತಿಳಿಸುವುದು ಅವಶ್ಯವಾಗಿದೆ. ಪರಿಷತ್‌ನ ಕಾರ್ಯಕ್ರಮಗಳ ಮೂಲಕ ಶರಣ ಪರಿಚಯ ಮಾಡುವ ಕಾರ್ಯ ನಡೆಸಲಾಗುತ್ತಿದೆ ಎಂದರು.