ಬತ್ತದ ಬೆಳೆ ಕಟಾವು ವೆಚ್ಚ ಮೈಮೇಲೆ

ಸಂತೋಷ ದೈವಜ್ಞ

ಪ್ರಸಕ್ತ ಸಾಲಿನಲ್ಲಿ ಮಳೆ ಕೈಕೊಟ್ಟಿದ್ದರಿಂದ ಕೃಷಿ ಕ್ಷೇತ್ರಕ್ಕೆ ತೀವ್ರ ಹಿನ್ನಡೆಯಾಗಿದೆ. ಈ ನಡುವೆ ಹೆಸರಿಗೆ ಮಾತ್ರ ಬೆಳೆದು ನಿಂತಿರುವ ಬತ್ತದ ಬೆಳೆ ಕಟಾವು ಮಾಡಿಸಿದ ವೆಚ್ಚ ಕೂಡ ಮೈಮೇಲೆ ಬಂದಿದ್ದು, ರೈತರಿಗೆ ಬರ ಬಡಿದಂತಾಗಿದೆ.

ಸರ್ಕಾರವೇನೊ ಈ ತಾಲೂಕನ್ನು ಬರಗಾಲ ಪ್ರದೇಶ ವ್ಯಾಪ್ತಿಗೊಳಪಡಿಸಿದೆ. ಕೃಷಿ ಹಾಗೂ ಕಂದಾಯ ಇಲಾಖೆಗಳು ತಾಲೂಕಿನ ಪಾಳಾ ಹಾಗೂ ಮಂಡಗೋಡ ಹೋಬಳಿ ವ್ಯಾಪ್ತಿಯಲ್ಲಿ ಸಮೀಕ್ಷೆ ನಡೆಸಿ ಇಲ್ಲಿಯ ಬೆಳೆಗಳ ಸ್ಥಿತಿಗತಿ ಬಗ್ಗೆ ಸಮರ್ಪಕವಾದ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಿದೆ. ಹೆಚ್ಚಿನ ಪರಿಹಾರಕ್ಕಾಗಿ ಇಲ್ಲಿಯ ರೈತರು ಕಾಯುತ್ತಿದ್ದಾರೆ.ಗೋವಿನ ಜೋಳ ಹಾಗೂ ಕಬ್ಬಿನ ಬೆಳೆ ಸಾಧಾರಣ ಮಟ್ಟಿಗಿದ್ದರೂ ಬಹುತೇಕ ರೈತರ ಕಷ್ಟದ ಮುಂದೆ ಇದಾವ ಲೆಕ್ಕವು ಅಲ್ಲ. ಗೋವಿನ ಜೋಳ ಉತ್ತಮ ಬೆಳೆ ಬಂದಿರಬಹುದು. ಆದರೆ ಅದಕ್ಕೆ ತಕ್ಕಂತೆ ಬೆಲೆ ಕೂಡ ಸಿಗಬೇಕಾದರೆ ಸ್ಥಳೀಯವಾಗಿ ಖರೀದಿ ಕೇಂದ್ರ ತೆರೆಯಬೇಕಿರುವುದು ಅತ್ಯವಶ್ಯವಾಗಿದೆ.

ಈ ಹಿಂದೆಲ್ಲ ಕೂರ್ಗೆ ಬತ್ತ ೧ ಎಕರೆಗೆ ೨೦ರಿಂದ ೨೫ ಕ್ವಿಂಟಲ್ ಬೆಳೆಯಲಾಗುತ್ತಿತ್ತು. ಮಳೆಯ ಕೊರತೆಯಿಂದಾಗಿ ಈ ಬಾರಿ ಎಕರೆಗೆ ೨ರಿಂದ೩ ಕ್ವಿಂಟಲ್ ಬತ್ತ ಕೂಡ ಕೈಗೆ ಸಿಗುತ್ತಿಲ್ಲ. ಇದರಿಂದ ಕಟಾವು ಮಾಡಿಸಿದ ವೆಚ್ಚ ಮೈಮೇಲೆ ಬರುತ್ತಿದ್ದರೂ ಜಾನುವಾರುಗಳಿಗೆ ಮೇವು ಸಿಗುತ್ತದೆ ಎಂಬ ಕಾರಣಕ್ಕೆ ಕಟಾವು ಮಾಡಿಸಲಾಗುತ್ತಿದೆ. ಸರ್ಕಾರ ಈ ಬಗ್ಗೆ ಗಮನಹರಿಸಿ ಸೂಕ್ತ ಪರಿಹಾರ ಒದಗಿಸಿ ರೈತರ ನೆರವಿಗೆ ಬರಬೇಕು ಎಂದು ರೈತ ರಾಜು ಗುಬ್ಬಕ್ಕನವರ ಹೇಳಿದರು.ಮಳೆ ಕೊರತೆಯಿಂದ ತಾಲೂಕಿನಲ್ಲಿ ಶೇ. ೫೦ರಷ್ಟು ಕೂರ್ಗೆ ಬಭತ್ತದ ಬೆಳೆ ಕುಂಟಿತವಾಗಿದ್ದು, ರೈತರು ಭತ್ತದ ಗದ್ದೆಗಳನ್ನು ಸಮರ್ಪಕ ನಿರ್ವಹಣೆ ಮಾಡದೆ ಕೈ ಚೆಲ್ಲಿ ಕುಳಿತಿದ್ದು, ಹೆಚ್ಚಿನ ಪ್ರಮಾಣದ ಬೆಳೆ ಹಾನಿಗೆ ಕಾರಣವಾಗಿದೆ. ನಾಟಿ ಬತ್ತಕ್ಕೆ ಯಾವುದೇ ತೊಂದರೆ ಇಲ್ಲ. ಕೃಷಿ ಹಾಗೂ ಕಂದಾಯ ಇಲಾಖೆ ಜಂಟಿಯಾಗಿ ಸಮೀಕ್ಷೆ ನಡೆಸಿ ಸರ್ಕಾರಕ್ಕೆ ವರದಿ ಸಲ್ಲಿಸಲಾಗಿದೆ. ಪ್ರಸಕ್ತ ಸಾಲಿನಲ್ಲಿ ಮುಂಗಾರು ಕೈಕೊಟ್ಟಿದ್ದರಿಂದ ಹಿಂಗಾರು (ಬೇಸಿಗೆ) ಬೆಳೆಗೆ ಹೆಚ್ಚಿನ ಒತ್ತು ನೀಡಲಾಗುತ್ತಿದೆ ಸಹಾಯಕ ಕೃಷಿ ನಿರ್ದೇಶಕ ಎಂ.ಎಸ್‌. ಕುಲಕರ್ಣಿ