ಪ್ರತ್ಯಾರೋಪಕ್ಕೆ ನಗರಸಭೆಯ ಸಾಮಾನ್ಯ ಸಭೆ ಸಾಕ್ಷಿ

ಶಿರಸಿ: ನಗರಸಭೆ ಹಿಂಭಾಗದಲ್ಲಿರುವ ಅತಿಕ್ರಮಣ ಜಾಗ ತೆರವುಗೊಳಿಸುವ ಚರ್ಚೆ ವಿಷಯದಲ್ಲಿ ಆಡಳಿತ ಹಾಗೂ ವಿರೋಧ ಪಕ್ಷದ ಸದಸ್ಯರ ನಡುವೆ ಜಟಾಪಟಿ ನಡೆದು ನಗರಸಭೆಯ ಆಡಳಿತ ಕಾಂಗ್ರೆಸ್‌ನ ಕೈನಲ್ಲಿದ್ದಾಗ ಯಾಕೆ ಮೌನ ವಹಿಸಿರುವುದು? ಹಾಲಿ ಬಿಜೆಪಿ ಆಡಳಿತದಲ್ಲಿ ತೆರವುಗೊಳಿಸಲು ಮೀನಮೇಷ ಮಾಡುತ್ತಿರುವುದು ಯಾಕೆ? ಎಂಬ ಸದಸ್ಯರ ಆರೋಪ ಪ್ರತ್ಯಾರೋಪಕ್ಕೆ ನಗರಸಭೆಯ ಸಾಮಾನ್ಯ ಸಭೆ ಸಾಕ್ಷಿಯಾಯಿತು.

ನೀವು ಸಹ ಹಣ ಪಡೆದುಕೊಂಡಿರುವ ಅನುಮಾನವಿದೆ. ನಿಮ್ಮ ಆಡಳಿತದಲ್ಲಿ ಯಾಕೆ ತೆರವುಗೊಳಿಸಲು ಸಾಧ್ಯವಾಗಿಲ್ಲ ಎಂದು ಬಿಜೆಪಿ ಸದಸ್ಯರು ಪ್ರಶ್ನಿಸಿದಾಗ, ವಿರೋಧ ವ್ಯಕ್ತಪಡಿಸಿದ ವಿರೋಧ ಪಕ್ಷದ ನಾಯಕ ಪ್ರದೀಪ ಶೆಟ್ಟಿ, ಫ್ರಾನ್ಸಿಸ್ ನರೋನಾ, ದಯಾನಂದ ನಾಯ್ಕ ಮತ್ತಿತರರ ಸದಸ್ಯರು, ೨೦೧೮ ರಿಂದ ಬಿಜೆಪಿ ನಗರಸಭೆಯಲ್ಲಿ ಅಧಿಕಾರದಲ್ಲಿದೆ. ಯಾಕೆ ಅತಿಕ್ರಮಣ ತೆರವುಗೊಳಿಸಲು ಸಾಧ್ಯವಾಗಿಲ್ಲ. ಅತಿಕ್ರಮಣದಾರರ ಜತೆ ಕೈಜೋಡಿಸಿ, ₹೩ ಲಕ್ಷ ಲಂಚ ಸ್ವೀಕರಿಸುತ್ತಿರುವಾಗ ಲೋಕಾಯುಕ್ತ ಬಲೆಗೆ ರೆಡ್ ಹ್ಯಾಂಡ್ ಆಗಿ ಸಿಕ್ಕಿ ಬಿದ್ದಿರುವವರು ಯಾರ ಪಕ್ಷದವರು ? ಬಿಜೆಪಿ ಪಕ್ಷದ ಸದಸ್ಯರಲ್ಲವೇ ಎಂದು ಆರೋಪಿಸಿದರು.

ಸರ್ವೆ ನಂಬರ್ ೭೩ರಲ್ಲಿ ಅತಿಕ್ರಮಣ ಖುಲ್ಲಾ ಪಡಿಸಲು ನಿರ್ಧಾರ ಮಾಡಿದವು. ಅತಿಕ್ರಮಣದಾರ ಜತೆ ಒಪ್ಪಂದ ಮಾಡಿಕೊಂಡು ಮಾಜಿ ಅಧ್ಯಕ್ಷ ಹಾಗೂ ಹಾಲಿ ಸದಸ್ಯ ಗಣಪತಿ ನಾಯ್ಕ ಮತ್ತು ಕಂದಾಯ ನಿರೀಕ್ಷಕ ಆರ್.ಎಂ. ವೆರ್ಣೇಕರ ಹಣ ಪಡೆಯುವಾಗ ಲೋಕಾಯುಕ್ತರ ಕೈಯಲ್ಲಿ ಸಿಲುಕಿಕೊಂಡರು. ಆಡಳಿತ ಪಕ್ಷದ ತಪ್ಪಿನಿಂದ ವಿರೋಧ ಪಕ್ಷದವರು ಹೇಳಿಸಿಕೊಳ್ಳಬೇಕಾಗಿದೆ. ನಗರಸಭೆಯ ಬಿಜೆಪಿ ಆಡಳಿತ ಶೂನ್ಯ ಸಾಧನೆಯಾಗಿದೆ. ಶೌಚಾಲಯವು ಬಾವಿ ತೆಗೆಯಲು ಸಾಧ್ಯವಿಲ್ಲ. ರಸ್ತೆಗಳೆಲ್ಲವೂ ಹೊಂಡಗಳ ರಾಶಿ. ಇದಕ್ಕೆಲ್ಲ ಸ್ಪಷ್ಟ ಉತ್ತರ ನೀಡಬೇಕು. ಇಲ್ಲವಾದಲ್ಲಿ ಸಭೆಯಿಂದ ಏಳುವುದಿಲ್ಲ ಎಂದು ಪಟ್ಟು ಹಿಡಿದರು.

ಸದಸ್ಯ ಖಾದರ ಆನವಟ್ಟಿ ಮಾತನಾಡಿ, ನಗರದಲ್ಲಿ ವಾಣಿಜ್ಯ ತೆರಿಗೆ ಕಡಿಮೆ ಬರುತ್ತಿದೆ. ಸರ್ವೆ ಮಾಡಬೇಕು. ಅವರಿಗೆ ಸರಿಯಾದ ತೆರಿಗೆ ವಿಧಿಸಲು ಕ್ರಮ ಕೈಗೊಳ್ಳಬೇಕೆಂದರು.

ಸ್ಥಾಯಿ ಸಮಿತಿಯ ಅನುದಾನದಲ್ಲಿ ₹೩.೫ ಕೋಟಿಗಿಂತ ಹೆಚ್ಚು ಕೆಲಸ ತೆಗೆದುಕೊಳ್ಳಲಾಗಿದೆ. ವಿಶೇಷವಾಗಿ ₹೨೫ ಲಕ್ಷ. ಹೊಂಡ-ಗುಂಡಿ ತುಂಬಲು ಮೀಸಲು ಇಟ್ಟಿದ್ದೇವೆ. ಚೌತಿಯಲ್ಲಿ ಗಣೇಶಮೂರ್ತಿ ಮೆರವಣಿಗೆ ತೆರಳುವ ಮಾರ್ಗಗಳ ಹೊಂಡ ತುಂಬಲು ₹೫ ಲಕ್ಷ ಅನುದಾನ ಮೀಸಲಿಟ್ಟಿದ್ದೇವೆ. ವಿಶೇಷ ಅನುದಾನ ಇಲ್ಲ. ನಗರಸಭೆ ಅನುದಾನ ಬಳಕೆ ಮಾಡಿಕೊಳ್ಳಬೇಕು. ಜಾತ್ರೆಯ ವಿಶೇಷ ಅನುದಾನ ಇನ್ನೂ ಬಂದಿಲ್ಲ ಎಂದು ನಗರಸಭೆ ಅಧ್ಯಕ್ಷೆ ಶರ್ಮಿಳಾ ಮಾದನಗೇರಿ ಹೇಳಿದರು.