ಸರ್ಕಾರ ಕೊಟ್ಟ ದುಡ್ಡಲ್ಲೇ ಒಳ್ಳೆ ಕಂಚಿನ ಪ್ರತಿಮೆ ಆಗ್ತಿತ್ತು

ಚಿಕ್ಕಪ್ಪನಹಳ್ಳಿ ಷಣ್ಮಖ

2013 ಮಾ.1ರಂದು ಜಿಲ್ಲಾಧಿಕಾರಿಗಳ ಮೂಲಕ ರಾಜ್ಯ ಸರ್ಕಾರಕ್ಕೆ ಪತ್ರ ಬರೆದ ಮುರುಘಾಮಠದ ಪೀಠಾಧಿಪತಿಗಳು ಜಗಜ್ಯೋತಿ ಬಸವೇಶ್ವರರ ಏಕ ಶಿಲಾಮೂರ್ತಿ ಪ್ರಸ್ತಾವನೆ ಪರಿಷ್ಕರಿಸಿ ಕಂಚಿನ ಪ್ರತಿಮೆ ಸ್ಥಾಪಿಸಲು ಅಂದಾಜು ಪಟ್ಟಿ ತಯಾರಿಸಿ ತಾಂತ್ರಿಕ ಮಂಜೂರಾತಿ ನೀಡುವಂತೆ ಕೋರಲಾಗಿತ್ತು. ಏಕಶಿಲಾ ಮೂರ್ತಿ ಪ್ರತಿಷ್ಠಾಪನೆ ಕಷ್ಟ ಸಾಧ್ಯವೆಂಬುದ ಪತ್ರದಲ್ಲಿ ಸೊಗಸಾಗಿ ನಿರೂಪಿಸಲಾಗಿತ್ತು. ರಾಜ್ಯ ಸರ್ಕಾರ ಮೊದಲು ಏಕಶಿಲಾ ಮೂರ್ತಿಗೆ 5 ಕೋಟಿ ರು. ಅನುದಾನ ಬಿಡುಗಡೆ ಮಾಡಿ ಅದರಲ್ಲಿ 2 ಕೋಟಿ ರು. ಮೊತ್ತ ಮುರುಘಾಮಠಕ್ಕೆ ನೀಡಿತ್ತು. 13.42 ಕೋಟಿ ರು. ಮೊತ್ತದ ಏಕಶಿಲಾ ಮೂರ್ತಿ ಪ್ರತಿಷ್ಠಾಪನೆ ಇದಾಗಿದ್ದು, 12 ವರ್ಷದ ಹಿಂದೆಯೇ ಅಂದರೆ 2011 ನ.11ರಂದು ಅನುಮೋದನೆ ನೀಡಿತ್ತು. ಏಕಶಿಲೆ ಲಭ್ಯವಾಗದ ಕಾರಣ ಕಂಚಿನ ಪ್ರತಿಮೆಗೆ ಪ್ರಸ್ತಾವನೆ ಪರಿಷ್ಕರಿಸಲಾಗಿತ್ತು.

ಐದು ಕೋಟಿ ಸಾಕು: ಇದೇ ಪತ್ರದಲ್ಲಿ ಮುರುಘಾಮಠ ಸರ್ಕಾರದ ಗಮನಕ್ಕೆ ತರಲಾದ ಸಂಗತಿಯಲ್ಲಿ ವಾಸ್ತವದ ಅರಿವಿನ ವಿಷಯವೊಂದನ್ನು ಪ್ರಸ್ತಾಪಿಸಲಾಗಿದೆ. ಜಗಜ್ಯೋತಿ ಬಸವೇಶ್ವರರ ಏಕಶಿಲಾ ಮೂರ್ತಿಯ ಬದಲಾಗಿ ಕಂಚಿನ ಪುತ್ಥಳಿಯ ಸ್ಥಾಪಿಸಲು 26 ಕೋಟಿ ರುಪಾಯಿ ಪ್ರಸ್ತಾವನೆ ತಯಾರಿಸಿ ಸಲ್ಲಿಸಲಾಗಿದೆ. 26 ಕೋಟಿ ರುಪಾಯಿ ಮೊತ್ತದಲ್ಲಿ ಸರ್ಕಾರ ಬಿಡುಗಡೆ ಮಾಡಿರುವ ರು.ಐದು ಕೋಟಿ ಹೊರತು ಪಡಿಸಿ ಉಳಿದ ಮೊತ್ತವನ್ನು ಶ್ರೀಮಠ ಮತ್ತು ಭಕ್ತಾಧಿಗಳಿಂದಲೇ ಭರಿಸಲಾಗುವುದು. ಹಾಗಾಗಿ 26 ಕೋಟಿ ರುಪಾಯಿ ವೆಚ್ದ ಅಂದಾಜು ಪಟ್ಟಿಗೆ ಸಕ್ಷಮ ಪ್ರಾಧಿಕಾರದಿಂದ ಮಂಜೂರಾತಿ ಪಡೆಯುವಂತೆ ಜಿಲ್ಲಾಧಿಕಾರಿಗೆ ಮುರುಘಾಮಠ ಬರೆದ ಪತ್ರದಲ್ಲಿ ವಿನಂತಿಸಿತ್ತು.

ಅಂದಹಾಗೆ ಮುರುಘಾಮಠ ಈ ಮೊದಲು ಏಕಶಿಲೆಯಿಂದ 154 ಅಡಿ ಕಂಚಿನ ಪ್ರತಿಮೆಗೆ ಪರಿಷ್ಕೃತ ಅಂದಾಜು ಕೇವಲ 26 ಕೋಟಿ ರುಪಾಯಿ ಮಾತ್ರ ನಮೂದಿಸಿತ್ತು. ರಾಜ್ಯ ಸರ್ಕಾರ ಇದುವರೆಗೂ 35 ಕೋಟಿ ರು. ಬಿಡುಗಡೆ ಮಾಡಿದೆ. ಅಂದರೆ ಸರ್ಕಾರ ಬಿಡುಗಡೆ ಮಾಡಿದ ದುಡ್ಡಿನಲ್ಲಿಯೇ ಮುರುಘಾಮಠ 154 ಅಡಿ ಎತ್ತರದ ಪ್ರತಿಮೆ ನಿರ್ಮಿಸಿ ಆಶಯಗಳ ಈಡೇರಿಸಿಕೊಳ್ಳಬಹುದಿತ್ತು. ಅದು ಸಾಧ್ಯವಾಗದೇ ಹೋಗಿದೆ. ಎತ್ತರಕ್ಕೇರುವ ಶ್ರೇಷ್ಠತೆ ವ್ಯಸನಕ್ಕೆ ಮುಗಿಬಿದ್ದ ಪರಿಣಾಮ 25 ಕೋಟಿ ರು. ಸುರಿದರೂ ಕಾಮಗಾರಿ ಇನ್ನು ನೆಲ ಬಿಟ್ಟು ಮೇಲೆದ್ದಿಲ್ಲ.