ಸೌಲಭ್ಯ ಕಲ್ಪಿಸುವಲ್ಲಿ ಸಂಸ್ಥೆಗೆ ಹಿಂಜರಿಕೆಯಿಲ್ಲ: ಜಿ.ಟಿ. ಹೆಗಡೆ ತಟ್ಟೀಸರ

ಶಿರಸಿ: ಸದಸ್ಯರಿಗೆ ನ್ಯಾಯ ಒದಗಿಸುವಲ್ಲಿ, ಸೌಲಭ್ಯ ಕಲ್ಪಿಸುವಲ್ಲಿ ಸಂಸ್ಥೆಗೆ ಹಿಂಜರಿಕೆಯಿಲ್ಲ. ನ್ಯಾಯಯುತ ದರ, ತೂಕ ಒದಗಿಸುವುದಕ್ಕೆ ಸಂಘ ಕಟಿಬದ್ಧವಾಗಿದೆ. ಈ ಬಾರಿ ಲಕ್ಷಕ್ಕೂ ಹೆಚ್ಚು ಕ್ವಿಂಟಲ್ ಮಹಸೂಲುಗಳು ಮಾರಾಟವಾಗಿ ದಾಖಲೆಯಾಗಿದೆ. ರೈತರಿಗೆ ಹೆಚ್ಚಿನ ದರ ಸಿಗಲಿ ಎಂಬ ಕಾರಣಕ್ಕೆ ಸಂಸ್ಥೆ ದಲಾಲಿಯ ಜತೆಗೆ ನೇರ ಖರೀದಿ ಮಾಡುತ್ತಿದೆ ಎಂದು ಟಿಎಂಎಸ್ ಅಧ್ಯಕ್ಷ ಜಿ.ಟಿ. ಹೆಗಡೆ ತಟ್ಟೀಸರ ಹೇಳಿದರು.

ರೈತರು ಮಹಸೂಲುಗಳ ಮಾರಾಟ ಹೆಚ್ಚಾದ್ದರಿಂದ ಅವುಗಳ ದಾಸ್ತಾನು ಹಾಗೂ ವಿಕ್ರಿಗೆ ಜಾಗ ಸಾಲದಾಗಿದೆ. ಹೀಗಾಗಿ ನಾಲ್ಕು ಅಂತಸ್ತಿನ ಕಟ್ಟಡ ನಿರ್ಮಾಣ ಮಾಡುತ್ತಿದ್ದೇವೆ. ಸುಮಾರು ಅರ್ಧಭಾಗ ಕಟ್ಟಡ ಮುಗಿದಿದೆ. ಮುಂದಿನ ಹಂಗಾಮಿನಲ್ಲಿ ಇದು ಬಳಕೆಗೆ ಸಿಗಬಹುದು. ಈ ಸೌಲಭ್ಯ ದೊರೆಯುವುದರಿಂದ ಇನ್ನು ನಾಲ್ಕೈದು ವರ್ಷ ಗೋದಾಮಿನ ಸಮಸ್ಯೆ ಆಗುವುದಿಲ್ಲ ಎಂದರು.

ಮುಖ್ಯ ಕಾರ್ಯ ನಿರ್ವಾಹಕ ವಿನಯ ಹೆಗಡೆ ಮಂಡೆಮನೆ ಮಾತನಾಡಿ, ಸಂಸ್ಥೆಯ ಸ್ವಂತ ಬಂಡವಾಳ ₹೫೭.೫೨ಕೋಟಿ ಹೆಚ್ಚಾಗಿದೆ. ಸದಸ್ಯರ ಠೇವು ₹೧೦೧ ಕೋಟಿ ಆಗಿದ್ದು ಕಳೆದ ವರ್ಷಕ್ಕೆ ಹೋಲಿಸಿದರೆ ₹೧೩.೨೦ಕೋಟಿ ಹೆಚ್ಚಳವಾಗಿದೆ ಎಂದರು.