ವರ್ಷಧಾರೆಗೆ ಧಾರವಾಡ ಜನ ತತ್ತರ!

ಧಾರವಾಡ:

ಮಂಗಳವಾರ ಸಂಜೆ ದೊಡ್ಡ ಮಳೆಯಾಗಿತ್ತು. ಆದರೆ, ಕೆಲಹೊತ್ತಿಗೆ ಮಾತ್ರ ಸೀಮಿತವಾದ ಕಾರಣ ಅಷ್ಟೊಂದು ಪರಿಣಾಮ ಬೀರಲಿಲ್ಲ. ಆದರೆ, ಬುಧವಾರ ನಸುಕಿನ 4ರಿಂದ 6ರ ವರೆಗೆ ಹಾಗೂ ಬುಧವಾರ ಮಧ್ಯಾಹ್ನ 3ರಿಂದ 7ರ ವರೆಗೆ ಸುರಿದ ಭಾರೀ ಪ್ರಮಾಣದ ಗುಡುಗು ಸಮೇತ ಮಳೆಯು ಇಡೀ ಧಾರವಾಡ ನಗರವನ್ನು ತೊಯ್ದು ತೊಪ್ಪೆಯಂತೆ ಮಾಡಿತು. ದೊಡ್ಡ ಹನಿಯ ಮಳೆಯು ತುಸು ಹೊತ್ತು ಬಿಡುವು ನೀಡದೇ ಹಲವು ಗಂಟೆಗಳ ಕಾಲ ಜೋರಾಗಿ ಸುರಿದ ಪರಿಣಾಮ ತಗ್ಗು ಪ್ರದೇಶಗಳಲ್ಲಿ ನೀರು ನುಗ್ಗಿದರೆ, ರಸ್ತೆ ಹಾಗೂ ಗಟಾರುಗಳಲ್ಲಿ ಮಳೆ ನೀರು ಆವರಿಸಿ ಅವಾಂತರ ಸೃಷ್ಟಿಯಾಯಿತು.

ತಗ್ಗು ಪ್ರದೇಶಗಳಾದ ಶ್ರೀನಗರ ಕೆಳಗಿನ ಪ್ರದೇಶಗಳಾದ ಭಾವಿಕಟ್ಟಿ ಪ್ಲಾಟ್‌, ಶಕ್ತಿ ಕಾಲನಿ, ಮಾಕಡವಾಲಾ ಪ್ಲಾಟ್‌, ಬಸವನಗರ ಭಾಗ, ಗೌಡರ ಕಾಲನಿ, ಜಾಧವ ಪ್ಲಾಟ್‌ನ ನೂರಾರು ಮನೆಗಳಲ್ಲಿ ಮಳೆ ನೀರು ಹೊಕ್ಕು ಅವಾಂತರ ಸೃಷ್ಟಿಯಾಗಿದೆ. ಇನ್ನು, ಕೆಲಗೇರಿ ಸಮೀಪದ ಸರೋವರ ನಗರ, ಶ್ರೀಶ ನಗರ, ಗಾಯಿತ್ರಿ ಪುರಂ, ಸಿದ್ಧಾರೂಢ ಕಾಲನಿ, ಬಿ.ಡಿ. ಪಾಟೀಲ ಕಲ್ಯಾಣ ಮಂಟಪ ಹಿಂಬದಿ, ಎನ್‌ಟಿಎಸ್‌ಎಸ್‌ ಪಿಯು ಕಾಲೇಜು ಎದುರಿನ ಬಡಾವಣೆ, ರಸ್ತೆ ಹಾಗೂ ಗಟಾರುಗಳು ಸಂಪೂರ್ಣ ನೀರಿನಿಂದ ಆವೃತಗೊಂಡಿದ್ದು ಯಾವ ಕ್ಷಣ ಮಳೆ ನೀರು ಎಲ್ಲಿ ಹರಿಯುತ್ತದೆ ಎಂಬುದು ಗೊತ್ತಾಗದ ಸ್ಥಿತಿ ಉಂಟಾಗಿದೆ. ಹಾವು-ಚೇಳು ಹಾಗೂ ಚರಂಡಿಯಲ್ಲಿರುವ ಹುಳುಗಳು ಅಡುಗೆ ಮನೆಗೆ ಹೋಗುತ್ತಿದ್ದು ಜನರಿಗೆ ಅನಿರೀಕ್ಷಿತ ಮಳೆಯು ತುಂಬ ಕಸಿವಿಸಿ ಉಂಟು ಮಾಡಿದೆ.

ಕ್ರಮ ವಹಿಸಿ:

ಮಂಗಳವಾರ ಬೆಳಗ್ಗೆ 8ರಿಂದ ಬುಧವಾರ ಬೆಳಗ್ಗೆ 8ರ ವರೆಗೆ ಜಿಲ್ಲೆಯಲ್ಲಿ 4.4 ಮಿ.ಮೀ ವಾಡಿಕೆ ಮಳೆಯ ಪೈಕಿ ಆಗಿದ್ದು ಬರೋಬ್ಬರಿ 26.8 ಮಿ.ಮೀ. ಅದರಲ್ಲೂ ಧಾರವಾಡ ನಗರದಲ್ಲಿ ವಾಡಿಕೆಯ 6 ಮಿ.ಮೀ. ಪೈಕಿ ಆಗಿದ್ದು 28 ಮಿ.ಮೀ. ಮುಂದುವರಿದ ಭಾಗವಾಗಿ ಬುಧವಾರ ಬೆಳಗ್ಗೆಯಿಂದ ರಾತ್ರಿ ವರೆಗೆ ಅಂದಾಜು 50 ಮೀಮೀ ಮಳೆಯಾಗಿರುವ ಸಾಧ್ಯತೆ ಇದ್ದು, ಯಾವುದೇ ಆಸ್ತಿ-ಪಾಸ್ತಿ ಹಾಗೂ ಪ್ರಾಣ ಹಾನಿ ಆಗಿಲ್ಲ ಎಂದು ತಿಳಿದು ಬಂದಿದೆ.