ಹೊಸವರ್ಷವನ್ನು ಅದ್ಧೂರಿಯಾಗಿ ಬರಮಾಡಿಕೊಂಡ ಹುಬ್ಬಳ್ಳಿಗರು

ಹುಬ್ಬಳ್ಳಿ: ವಾಣಿಜ್ಯನಗರಿ ಹುಬ್ಬಳ್ಳಿಯ ಜನತೆ ಭಾನುವಾರ ರಾತ್ರಿ 2023ಕ್ಕೆ ವಿದಾಯ ಹೇಳಿ, 2024ನೇ ವರ್ಷವನ್ನು ಅದ್ಧೂರಿಯಾಗಿ ಹರ್ಷೋದ್ಗಾರಗಳೊಂದಿಗೆ ಬರಮಾಡಿಕೊಂಡರು. ಕೆಲವಡೆ ಪಟಾಕಿ ಸಿಡಿಸಿ, ಕೇಕ್ ಕತ್ತರಿಸಿ ಹೊಸ ವರ್ಷ ಸ್ವಾಗತಿಸಿದರೆ, ಇನ್ನೂ ಕೆಲವರು ಡಿಜೆಗೆ ಹೆಜ್ಜೆ ಹಾಕಿ ಸಂಭ್ರಮಿಸಿದರು.

ಭಾನುವಾರ ರಾತ್ರಿ 9 ಗಂಟೆಯಿಂದ 7 ಕೆಎಸ್‌ಆರ್‌ಪಿ, 10 ಸಿಆರ್‌ಪಿ ತುಕಡಿ ನಿಯೋಜಿಸಲಾಗಿತ್ತು. ಬೈಕ್ ವ್ಹೀಲಿಂಗ್, ಡ್ರಿಂಕ್ ಆ್ಯಂಡ್ ಡ್ರೈವ್ ತಡೆಗೆ ಪ್ರಮುಖ ವೃತ್ತಗಳಲ್ಲಿ ವಿಶೇಷ ತಂಡಗಳನ್ನು ನೇಮಕ ಮಾಡಲಾಗಿತ್ತು. ಪಂಚತಾರಾ ಹೋಟೆಲ್, ಬಾರ್ ಆ್ಯಂಡ್ ರೆಸ್ಟೋರೆಂಟ್, ಪಾರ್ಟಿ ಹಾಲ್‌ಗಳಲ್ಲಿ ಹೊಸ ವರ್ಷಾಚರಣೆಗೆ ಅವಕಾಶ ಕಲ್ಪಿಸಲಾಗಿತ್ತು.

ನೂತನ ವರ್ಷಕ್ಕಾಗಿ ಬೇಕರಿಗಳಲ್ಲಿ ಸಿದ್ಧಗೊಂಡಿದ್ದ ತರಹೇವಾರಿ ಚಾಕ್ಲೇಟ್‌ ಕೇಕ್‌, ವೆನಿಲಾ ಕೇಕ್‌, ಸ್ಟ್ರಾಬರಿ, ಆರಂಜ್‌, ಕ್ರೀಮ್‌, ಫ್ಲಾವರ್‌, ಹನಿ, ಜೆಮ್‌ ಪೇಸ್ಟ್‌, ಜಾಮೂನ್‌, ರೌಂಡ್‌ ಕೇಕ್‌, ಸ್ಲೈಸ್‌ ಕೇಕ್‌, ಬಟ್ಟರ್‌ ಕ್ರೀಮ್‌ ಕೇಕ್‌ ಸೇರಿದಂತೆ ಹಲವು ಬಗೆಬಗೆಯ ಕೇಕ್‌ಗಳನ್ನು ಖರೀದಿಸಿ ಸ್ನೇಹಿತರು, ಕುಟುಂಬಸ್ಥರು ಸೇರಿ ಕೇಕ್‌ ಕತ್ತರಿಸಿ ಹೊಸ ವರ್ಷವನ್ನು ಸ್ವಾಗತಿಸಿದರು.

ಬೈಕ್‌ ರೈಡಿಂಗ್‌ ಜೋರು: 2023ರ ಕೊನೆಯ ದಿನ ಭಾನುವಾರ ಬಂದ ಹಿನ್ನೆಲೆಯಲ್ಲಿ ಮಧ್ಯಾಹ್ನದಿಂದಲೇ ನಗರದ ಪ್ರಮುಖ ರಸ್ತೆಗಳು ಬಿಕೋ ಎನ್ನುತ್ತಿದ್ದವು. ಇಲ್ಲಿನ ಕೇಶ್ವಾಪುರ, ರಾಣಿ ಚೆನ್ನಮ್ಮ, ಕುಸುಗಲ್ಲ ರಸ್ತೆ, ಸಿಬಿಟಿ, ಗೋಕುಲ ರಸ್ತೆಯಲ್ಲಿ ರಾತ್ರಿ 9 ಗಂಟೆಯ ವರೆಗೂ ಜನಸಂಚಾರ ತುಂಬಾ ವಿರಳವಾಗಿತ್ತು. ರಾತ್ರಿ 10 ಗಂಟೆಯ ನಂತರ ವಾಹನ ಸಂಚಾರ ದಟ್ಟಣೆ ಹೆಚ್ಚಾಗಿರುವುದು ಕಂಡುಬಂದಿತು. ಇನ್ನು ಯುವಕ- ಯುವತಿಯರು ನಗರದಾದ್ಯಂತ ರಾತ್ರಿಯಿಡೀ ದ್ವಿಚಕ್ರ ವಾಹನದಲ್ಲಿ ರೈಡ್‌ ಮಾಡುತ್ತಾ ಹೊಸವರ್ಷವನ್ನು ಅದ್ಧೂರಿಯಾಗಿ ಬರಮಾಡಿಕೊಂಡರು.