ಟಿಪ್ಪುವಿನ ವೀರತನ ಒಳಿತಿಗಿಂತ ಕೆಡುಕಿಗೆ ಹೆಚ್ಚು ಬಳಕೆಯಾಯಿತು: ವಿಕ್ರಂ ಸಂಪತ್

ಕನ್ನಡಪ್ರಭ ವಾರ್ತೆ ಗೋಣಿಕೊಪ್ಪ

ಗೋಣಿಕೊಪ್ಪಲುವಿನ ಪರಿಮಳ ಮಂಗಳ ಸಭಾಭವನದಲ್ಲಿ ಆಯೋಜಿತ ಕಲಿಸು ಫೌಂಡೇಷನ್ ಪ್ರಕಟಿಸಿರುವ ಟಿಪ್ಪು ಸುಲ್ತಾನ್ ಕೃತಿಯ ಲೋಕಾಪ೯ಣೆ ಸಮಾರಂಭದಲ್ಲಿ ಮಾತನಾಡಿದ ಇತಿಹಾಸ ಸಂಶೋಧಕರೂ ಆಗಿರುವ ಡಾ. ವಿಕ್ರಂ ಸಂಪತ್, ಇತಿಹಾಸ ಎಂಬುದು ಪಠ್ಯ ಪುಸ್ತಕಗಳಲ್ಲಿ ವಾಸ್ತವತೆಯ ನೆಲೆಗಟ್ಟಿನಲ್ಲಿ ದಾಖಲಾಗಬೇಕು. ಯಾರದ್ದೋ ಅಣತಿ ಪಾಲಿಸಲು, ಯಾರನ್ನೋ ಸಂತೋಷಪಡಿಸಲು ಇತಿಹಾಸದ ವಿಚಾರಗಳು ಕೃತಿ ಅಥವಾ ಪಠ್ಯದಲ್ಲಿ ಪ್ರಕಟವಾಗಿರಬಾರದು. ಇತಿಹಾಸದ ನೈಜಾಂಶಗಳನ್ನು ಗ್ರಹಿಸಿಕೊಂಡು ಮುಂದೆ ಸಾಗಿದರೆ ಭಾರತದ ಕನಸಾದ ವಿಕಸಿತ ಭಾರತದ ಗುರಿ ತಲುಪಲು ಸುಲಭಸಾಧ್ಯ ಎಂದು ಹೇಳಿದರು.

ಟಿಪ್ಪುಸುಲ್ತಾನ್ ಕೃತಿ ಲೋಕಾರ್ಪಣೆಗೊಳಿಸಿ ಮಾತನಾಡಿದ ಕೊಡಗು ಮೈಸೂರು ಸಂಸದ ಯದುವೀರ್ ಕೃಷ್ಣದತ್ತ ಒಡೆಯರ್, ಕೊಡಗಿನ ಸಂಸ್ಕೃತಿ, ಸಾಂಸ್ಕೃತಿಕ ಶ್ರೀಮಂತಿಕೆಯೇ ಕೊಡಗಿನ ಪರಿಚಯ ಮಾಡಿಕೊಡುತ್ತದೆ, ಟಿಪ್ಪು ಕಾಲದ ಕರಾಳತೆಯನ್ನು ಕೃತಿಯಲ್ಲಿ ಹೇಳಲಾಗಿದೆ. ಕೊಡಗಿನ ಸಮಗ್ರ ಇತಿಹಾಸ ಬಿಂಬಿಸುವ ದಾಖಲೆಯ ಆಧಾರದ ಕೃತಿಯೂ ಅಗತ್ಯವಾಗಿದೆ ಎಂದರಲ್ಲದೇ, ವಿಕಸಿತ ಭಾರತದ ಪರಿಕಲ್ಪನೆಯಲ್ಲಿ ಕೊಡಗನ್ನು ಪ್ರಗತಿಗೊಳಿಸಬೇಕು ಎಂದು ಯದುವೀರ್ ಹೇಳಿದರು.

ನಿತಿನ್ ಕಾರ್ಯಪ್ಪ ಲೇಖಕರೊಂದಿಗೆ ಸಂವಾದ ನಡೆಸಿದರು.